APOSTELNYU THO 28

Melita Nyu Gunryü kelo

1Lo agun le tsünyu chwilo ntsin zükehun kazü tsügü tsü le Melita letse kethyü shalo. 2Lo tsükatsü tsünyu kebin nyu dan le agun shwinjün sashü, tsangri lo kun kethyü genyu anyugun le agun zenlo njüo mah-e thyüpe agun no ngvü. 3Tsükatsü Paul le san dun me senryüo khipe mah nyu shüshü ntsin ribo nme le chwiryüo, Paul ben ra penlo la. 4Tsüselo tsünyu kebin nyu dan le peri tsügü le a-ben ge rapvü kebin hyulo njüo anyugun le khinyu khinyu ka, “Lihithyüe temi higü hile me dukeshvunyu thyü tiso, a-le züda nyu a-si keniloe kenjü kesen gü le a-no rhün hü loho so.” 5Tson-e Paul le peri tsügü kezen pe mah nyu shwenshüla, lo a-ge tsü thame thyü mvula. 6Ai anyugun kerüchün le tsüle nmenlo nmvue chetsü gü si whütsela ti ado tsekethyü rüchün bin; ai anyugun le a-nri ri bin-o a-ge thame thyü mvu kela hyuo anyugun kerüchün kelu nio, “A-le teronyu nme sele tsekethyü zoni tinla!”

7Lo kazü tsügü kho kenika Publio tsekethyü zükehun kazü tsügü so keda thyü kebin gü kazü thyü bin. A-le agun zenlo njüo jonshen agun nsin kegwa thyüshü. 8Tsükatsü Publio a-pvü tsüle rüka lo tezi vü tse bin; tsüselo Paul le a-ka nyuki yügü Sunggigü ka hishüo a-ben shwen pe a-ge shüo a-thyü kesherhün shü. 9Lo tsonshü ntsin zükehun kazü tsünyu kebin nyu aphu anyugun kehokenyü aphu gunryüo a-no thyü kesherhün küshü. 10Tsüdan-e kenrun nyu tha kechon khishü tson-o agun le tin kezhü ka-e anyugun le agun sen mvulo keshvu tha kechon ki sen gunryüo run nyu agun tsüshü.

Paul Le Gungü Rom Tikelo

11Lo shyeshen siki Alekendria nyu run nme a-ge Dioskouroi letse thu kepvü nme le gunryüo tsünyu bin-o agun le tsüge külo-o tsonchü shü. 12Tson-o Sarakus nyu gungü jonshen tsünyu binlo. 13Tsüselo agun le tsünyu tsü run jen keze gungü Regium rünyi tilo. Lo tsüsinyü tesinzin tsangnbu gunryüo agun when sola, tson-o tsüsinyü agun le Puteoli nyu gunlo. 14Tson-o tsünyu agun pvünyu dan hyulo-o anyugun le agun no jon tsenyü anyugun zen-o bin shülo tse tenge tse sola; lo tsüsika agun le gungü Rom tilo. 15Lo tsükatsü agun pvünyu ju le agun le gunryü zhü tsekethyü shalo, Apia hakethyü bin lo tesin ka kenshen nyu ketso gunryüo agun zenlo. Lo Paul le anyugun hyulo ntsin Sunggigü shwen lo peche sin kvula. 16Tson-o agun le Rom rünyi nyu gunryülo ntsin Paul le shüpahünyu nme nti no a-khwen kehü nyeki a-no a-ka kecha thyüo bin tinla.

Sunggigü Jo Lope Rom nyu Senthyükeshü

17Lo jonshen bin kelo siki Paul le Judanyu dan nyu pelünyu ju ko küshü. Tson-o anyugun le gunryüo kequen külo ntsin a-le anyugun ka, “Hire, apvünyu ju, ale a npvü atemi dan-e shwinyü kemvu thyü hü mvu, lo tson-e mele Jerusalem nyu aten zen gunryüo Rom nyu ben nyu shü laso. 18Lo anyugun le aketso petsü sa keso ka, anyugun le adushvula kekü tho thame hyulo mvu kela genyu ahoshü la nyüso. 19Ai Judanyu dan le tsükatsü ahoshü nyalo tsela; tsügenyu ano Kaisar ki apil thyüni mvulo shvula. Tson yatse-e ale atemi dan nkhinla titse kethyü gü kemvu. 20Ale tsügenyu hagun no gunryüo azen kehyuo azen kenthonlo tse kethyü genyu ale hagun kokeshü gwünzin le. Ale meno tegiron higü pe adyü sen kehü hile kechamvule Israel nyu sidyü kegwa genyu le,” tsonshü.

21Tsontsin anyugun le a-ka, “Agun le Judia ki nrüla lesü nme-e hyulo mvu nmvue agun pvünyu dan temi nme-e rünyi hinyu hi gunryüo tephu-e shü mvu, nmvue n kenkhin jo nme-e shalo mvu. 22Ai nle nyu rüchün bin yo agun le tsü shashü nyü bin nyo; kechamvule senkethyü jo higü zen kehünyu rüla agun le shakelo le mele luki hiki tsüdan shwinyü kemvu zo kü hünyo,” tson zoshü.

23Lo anyugun le khenyü me a-ki ryü titse kethyü jon thoshüo, tsünyü tsü anyugun temi kechon ki kengüo a-bin ki ryü. Lo a-le lonyü nyu gungü khejeki keti anyugun mhundyü nyu Sunggigü keda rüla zoshwishü, lo tsüntimvule Mosa tejvü gü, lo sidyükeshanyu lesü nyue tse Jisu rüla zope anyugun thukeyhun sashü. 24Tsükatsü peha le a-le kezo jo tenyenlo, ai peha le tenyenlo mvula 25Tson-o anyugun le kejorhünlo mvula ntsin tinla. Ai anyugun le tinkela mhundyü Paul le anyugun ka, Isaya sidyükesha gü mün nyu, “Kenshün Kapu le nduka hagun pepvünyu ka zo tsentsü pe bin kenjü le! 26A-le kezo le,

‘Nle temi hidanka gungü zoshü nye:

Hagun le kenyü we nyü loti, ai thame

ka-e shalo ho;

lo hagun le kehyu we hyuti, ai thame

rüchün loho,

27Temi hidan hile anyugun nyun nsü mvu,

lo anyugun nyetin-e rügü, lo anyugun

yhütyü-e kemi laso.

Kechamvule anyugun yhütyü pe tha hyu,

lo anyugun nyetin pe thakhwen-e nyü,

lo anyugun nyun pe tha shalo, tson-o

ranio aki ryüo,

Ano anyugun thyü ngwa shülo kenshvu

genyu le,’ tson njü.”

28Tha higü hi genyu hagun le shalo nye, “Sunggigü le temi kenikelo jo higü hi khipe Juda kemvunyu ki shüla lo anyugun le tsü nyülo ti.” tsonshü. 29(Lo Paul le Judanyu dan le tin kela mhundyü jo hilope anyugun ka zo ketse sashü la.)

30Tson-o Paul le chen hvu kho a-npvü me ka ngun kelo nme nyu bin tinla. 31Lo tsükatsü mele a-ki keryü nyu aphu ka Sunggigü keda rüla zo pe me hi; lo tsüntimvule peche sao Npugü Jisu Khrista rüla dan zo pe me sen thyü; lo temi nme-e a-khin mvu.

Currently Selected:

APOSTELNYU THO 28: REGSBSI

Highlight

Copy