MATHI 19

Kami kenrhokela Senkethyü Jo

(Mk 10:1-12)

1Lo Jisu le jo tsüdan zothü shüla ntsin Galil nyu tsonchüo Jordan perezin Judia terhi kipon gunla. 2Tsükatsü temi danda nme le a-sithen gunryü, lo a-le anyugun thyü ngwa shü.

3Lo tsükatsü Farisinyu danme le a-ki ryüo a-semen-o a-ka, “Temi le tha lihi genyue a-npvü anunyu khela zü le?”

4Tsontsin a-le, “Sokeri kanyu temi thyükeshü gü tsüle pechenyu lo tenunyu au thyüshü. 5‘Higenyu temi le a-pvü a-jvünyu khela njüo a-nunyu zen kengü tinla ti, lo au le nme thyü tinla ti,’ tsonkethyü hagun le swü mvu ole? 6Tson-o au le kenyhun mvule nme thyü laso. Tsügenyu Sunggigü le thyü kerhün keshü gü, temi no gwünrho nyalo.”

7Tsontsin Farisinyu dan le a-ka, “Tsonlo nyuthyüo Mosa le nduka a-nunyu khekela lesü khishüo khela lotse kethyü zoshü la?”

8Lo a-le anyugun ka, “Hagun nyun kerü genyu Mosa le hagun no hagun nunyu khela lotse shü le; ai sokerika we tsonshü mvu. 9Tsüntimvule ale hagun ka zo tsentsü shüti le, temi ligü higüe keyüla genyu kemvu we a-nunyu khela njüo kecha lo yatselo a-le keyüla laso.”

10Tsontsin senthyükelo ju le a-ka, “Temi le a-nyepvü a-nu au janyu tsonlo, kalvu kemvu we gwakvu.”

11Tson-e a-le anyugun ka, “Kekvu khipe tsü keshünyu kemvu we, temi aphu jo hizen külo nrün ndi. 12Kechamvule temi peha le a-jvü gin nyu kebin kanyu, lo peha le me kendo genyu lo peha le tsangge keda genyu sunthyü kevu le bin hünyo. Temi ligü higüe jo tsü zenlo kegwanyu no zenlo nye.”

Jisu Le Jochü pe Ntsenyudan Ketsü

(Mk 10:13-16; Lk 18:15-17)

13Tsükatsü Jisu no jochü pe anyugun ge shüti tseo mele ntsenyu dan me zen ryü; ai senthyükelo ju le tsü dan kesüla. 14Ai Jisu le anyugun ka, “Ntsenyu ju khinyao anyugun no aki ryülo; anyugun khinyalo; kechamvule tsangge raja phen le anyugun hon genyu.”

15Tson-o a-le a-ben pe tsüdan soge shüo tsünyu tinla.

Kenya Selo Gü

(Mk 10:17-31; Lk 18:18-30)

16Tsontsin hire, temi nme le a-ki ryüo a-ka, “Senkethyü gü, ale kethonthen kerhün hyulo nrün genyu thakegwa dihontse kethyü thyülo mvulo shvula?”

17Lo a-le tsügü ka, “Nle nyuthyüo kegwagü rüla ketso hü nla? Kegwagü le nme nti; ai nle kerhün nyu yülo nyülo, johokeshü dan zenlo nye.”

18Lo tsügü le a-ka, “Dihontse kethyü dan la?” tsonshü.

Tsontsin Jisu le a-ka, “Nle me dushvu loshvu, nle rühu loshvu, nle me ge kenku jün zoloshvu, 19Npvü njvünyu rühvulo, nle nkazonkazin sope n npvü nkeso hontselo mvuloshvu.”

20Tsontsin ponyu tsügü le a-ka, “Ale tha tsü aphu zenkü hünyo; ano tha dihontse kethyü zennilo mvuloshvu la?”

21Jisu le a-ka, “Nle gwa tilo nyülo, gungü nhon kebin aphu jwen lo-o khipe tha kendinyu tsüla nye; tsonla lo tsangge nhon nnyalo ti; tson-o ryüo asithenlo re.”

22Ai ponyu tsügü le jo tsü shalo njüo a-mhun gwamvu satse tinla; kechamvule a-le kenya ketsinnyu nme kethyü genyu.

23Tsontsin Jisu le senthyükelo ju ka, “Ale hagun ka zo tsentsü shüti, kenyanyu le tsangge keda nyu yüti tsekethyü le rüsa le. 24Tsüntimvule ale hagun ka zo tsentsü shüti, kenyanyu le Sunggigü Raja bin nyu keyü we mvu le ut nme no chwen küka nna kela we nne kvu ti.”

25Tsontsin senthyükelo dan le jotsü sha pe anyugun dun thyü salao a-ka, “Tson yatselo senyu no kenikelo hyulo mon?”

26Tsontsin Jisu le anyugun nrio anyugun ka, “Temi we thyülo nrün ndi; ai Sunggigü we tha aphu thyülo gwa.”

27Tsükatsü Pitor le a-ka, “Hire,agun we tha kebin aphu khela njüo nsithen hü laso; tsügenyu agun we nyu chwilo mon?”

28Tsontsin Jisu le anyugun ka, “Ale hagun ka zo tsentsü shüti, hagun asithen tinkela ju tha keshün thyüni kethyü gü ki Temi Nyugü le A-raja bin zankechwi kethyü bin ge bin kelo nyü hagun ko no raja bin tseryü kenyhun che ge bin-o Israel nyu tsipwen tseryü kenyhun che dan ketso kethyü nyu thyüti. 29Tsükatsü temi ligü higüe azan genyu a-ka, lo a-tsa sikezen nyu, a-lüginyu, a-pepvünyu, lo anyenyu lo a-kazü khekelanyu tsü jüntsi hyulo ti, lo tsüntimvule kethonthen kerhün-e hyulo ti. 30Ai rikehünyu kechon le khin lati, lo khinkehünyu kechon le rila ti.

Currently Selected:

MATHI 19: REGSBSI

Highlight

Copy