MATHI 18

Segü No Kedatsin Thyüti Yo Tsekethyü

(Mk 9:33-37; Lk 9:46-48)

1Tsügwünkho ka senthyükelonyu ju le Jisu ki ryüo a-ka, “Tsangge keda nyu segü le keda tsinla?” tson-o ketso.

2Tsontsin a-le ntsenyu nme ko zen-o a-ki ryülo, tson-o anyugun dan nyu binlo njüo, 3“Ale hagun ka zo tsentsü shüti, hagun le kelu pe ntsenyu hontselo kemvu we hagun le tsangge keda nyu yü loho. 4Tsügenyu temi ligü higüe a-npvü a-thyü ketsenyo pe ntsenyu higü hihontse kelonyu le tsangge keda tsin nyu so. 5Lo temi ligü higüe azan nyu ntsenyu hihontse kethyü nyu nme zenlo kehü nyu le, azen-e lo hünyo.

Kemu Kesemen

(Mk 9:42-48; Lk 17:1-2)

6“Ai temi ligü higüe atenyen kehü hidan nyu temi nme nti-e thyü nshvu kelanyu we, tha ketserütso keda nme pe a-gunda nyu dyülo njüo khipe züda kentsun nyu shweshü kela we a-chün gwa kvu ti. 7Thathyü kenshvu dan genyu kazü higü we chi, thyülo tiso! Kechamvule tha nsü kenshvu le ryü mvulo keho genyu- ai a-genyu thathyü kenshvu le ryü kehünyu we chi, thyülo tiso!

8“Lo nben nmvue npha le nthyü nshvu yatselo, nge tsü duthü pe shwenla chi; nben kenyhun lo npha kenyhun tse pvüo meno nkhi pe kethonthen kebin mah nyu shüla nrün we mvu, nben peha lo npha peha pvüo kerhün nyu keyü we njün gwakvu kethyü genyu. 9Tsüntimvule n-yhütyü le nthyü nshvulo nge tsü tseritho pe shwenla chi, nyhütyü kenyhun pvüo meno nshwen pe Gehena mah nyu shü kela we mvu, nyhütyü nme nti pvüo kerhün nyukeyü we njün gwakvu nrün genyu.

Tanyü Nmhenkela Jokejvü

(Lk 15:3-7)

10“Hagun keshen hidan nyu temi nme-e nkhin mvu kethyü tsü rüchün tonlo chi; Ale hagun ka zoshü ti, tsangge anyugun jolonyu le tsangge kebin Apvü mhun nrizin bin hünyo. 11Kechamvule Temi Nyugü le nmhenkelanyu kenilo titse gunkeryü genyu.

12“Hagun le dihontse rüchün bin nla? Temi nme le tanyü tsi le bin-o tsüdan nyu nme nmhenla lo, a-le henteküo tekü dan khetse njüo gungü kazüthun ge nmhenkela gü tsü fü mvu ti ole? 13Tson-o a-le tsü hyulo yatselo, Ale hagun ka zo tsentsü shüti, a-le henteküo tekü dan nyeki tsügü hyukelo genyu a-sherhün sati. 14Tsühontse tsangge kebin hagun Pvü ko keshentsin hidan nyu nme-e no nke kela a-kendo mvu.

Kemu N Sikezengü

15“Lo n sikezengü le nka kemu nme thyüshülo, gungü hai npvü ka a-kemu tsin pe a-zen nye; a-le njo nyülo yatselo nle n sikezengü hyulo laso. 16Ai a-le njo nyü mvu yatselo, nle mime nmvue mihvu zenni gunlo nye; tson yatselo mihvu mishen mün sen-o tha zoshü lo jo lihie a-zü loti. 17Lo a-le tsüdan khwen-e nyümvu yatselo, pe kehun ka zoshü nye; tson-o a-le kehun jo-e nyümvu yatselo, a-no Judakemvunyu lo khajana keshvu ju hontse tinla nye.

Khinkela Lo Khinshekeshü

18“Ale hagun ka zo tsentsü shüti, hagun le kazü hinyu tha lihie khin la lo, tsangge ko khinla ti; lo hagun le kazü hinyu tha lihie khinshe shülo tsangge ko khinshe shüti.

19“Tsüntimvule ale hagun ka zoshü ti, kazü hinyu hagun le mihvu nti kenyun rhün-o tha lihie kengüo hilo, tsangge kebin Apvü le tha tsüthyü pe tsünyu tsüti. 20Kechamvule mihvu mishen nti-e azan sen gungü kehun kequen kebin bin ka Ale tsü dan nyu bin nrün genyu.”

Kemu Jüpe Tsükemvu Gogü Jokejvü

21Tsontsin Pitor le ryüo a-ka, “Npugü, a sikezen gü le age kemu thyü gwün dije ge lo ano a-kemu gwün pe tsü mon! gwün tsenyü ge le?”

22Jisu le a-ka, “Gwün tsenyü ge titse ale nka zomvu, ai gwün hentsenyü ge thyü tsenyü ge. 23Tsügenyu tsangge keda le rajanyu nme le a-gonyu ju no a-npvü a-hisap khishülo tse kela hontse le. 24Lo a-le rüchün kegun ka talen yie tseryü a-pu pvü kebin nyu nme zen gunryü. 25Tson-e a-le a-pu thyü tilomvula kethyü genyu a-npugü le a-no a-nu a-nyu a-kanyü kebin aphu jwen sen ryüo a-pu thyülo tsela. 26Tsontsin a-gogü tsü le tsügü a-rüshvuo a-ka, ‘Npugü, a njünlo; matse ta ale npu thyükü shü tile.’ 27Tsontsin tego tsügü npugü le a-shwi njün-o a-hoshü la.

28“Ai tego tsügü le chwigü tego kecha nme le a-pu denari nme pvü kebin nme hyulo-o a-le tsügü tenlo njüo a-rühon techen penlo-o, ‘Nle apu pvü kebin tsü thoshülo,’ tsonso. 29Tsontsin tego tsügü tsüle tsügü zhülo njüo a-ka hi tenge tseo, ‘A njün lo matse ta, ako npu thyü pe ntsü tile,’ tson. 30Ai a-le a-pu thyüshü kemvuthen we nmvule tseo a-ten sen gungü doka nyu shüla. 31Lo tsükatsü a-pvünyu tego kechanyu dan le tsü shwi pe anyugun nyun gwamvu sala, tson-o ryüo anyugun npugü ka tha tsü aphu pe zoshü. 32Tsontsin a-npugü le a-ko zen ryüo a-ka, ‘Hire, tego njvü gwakemvu gü, nle aka nkenjün kehi genyu ale npu aphu gwün pe ntsü shü amon. 33Lo ale n shwinjü keshü hontse nko npvü gü shwi njünshü zü mvu ole?’ 34Tson-o a-npugü le a-nyun ntala njüo a-le a-pu pvü kebin tsü thyü pen pe a-tsü kemvuthen nmvu letseo a-ten pe do kekhwenyu dan tsüla.”

35Lo Jisu le jo kenkhin zo-o, “Tsühontse hagun ligü higüe hagun sikezen nyu kemu zhü ketsin thyü pe tsüla mvulo tsangge kebin Apvü ko hagun ge tsühontse thyü shüti.”

Currently Selected:

MATHI 18: REGSBSI

Highlight

Copy