MATHI 20
20
Vain Low Ketsünyu
1“Lo tsangge Raja kethyü phen tsü le temi nme le meno a-vain low nyu tsügü thathyülo tseo lonyü nshwen tsügü me jonshe kelo hontse. 2Lo Tsükatsü a-le doli pe tsüti tseo me zen kenthon-o tsüdan nipe a-vain low ki shüla. 3Tson-o tegi tekü kevü gwünkho ki-e a-le gungü temi dan me le hakethyü bin nyu thathyümvu tse dun kebin hyulo. 4Lo a-le tsüdan ka, ‘Hagun ko a vain low ki tsüta, tsonlo ale hagun chün kho lope hagun tsüti le,’ tsonshü. Tsontsin anyugun le tsüla. 5Tsüsi ki-e a-le tegi tseryü kenyhun che kevü ki lo tegi kenshen kevü ki-e tse nichwi gü tsonshü. 6Lo tegi pvün kevü gwünkho ka ko nichwigü temi kechanyu dan me le kebin hyulo; tson-o tsüdan ka, ‘Hagun le nyuthyüo thathyümvuo jongwün hika dun bin nla?’ 7Tsontsin anyugun le a-ka, ‘Agun jonkeshe temi kendi genyu le.’ Tsügenyu a-le anyugun ka, ‘Hagun ko a vain low ki tsü nye.’
8“Tson-o khejeki low npugü le a-gogü ka, ‘Low nyu thathyü kebin dan koshüo, low nyu tsü kekhin tsin dan ka gun gü tsükeri tsin dan keti anyugun chün pe tsüshü nye.’ 9Tsontsin khejeki tegi pvün kevü ki ko kelonyue ryüo doli hyulo. 10Tsüsika keritsin ju le ryüo anyugun we me nye chon hyulo ti ado tse ryü; ai anyugun ko me hontse nme le doli hyulo. 11Lo anyugun le tsü hyulo ntsin a-npugü ge kenyo lola, tson-o a-ka, 12‘Kekhin hidan le tegi kevüja nme nyesin thathyü mvu, lo agun we jongwün tsang kenyen ka kenjünthyü thatho thyü-tson-e nle khipe agun ketsü kho khipe anyugun ko tsü laso!’
13“Ai a-le anyugun nme ka, ‘Apvügü ale nge a-zükemvu nme-e thyümvu amon? Nle nnyi doli nme titse kejozenlo mvu ole? 14Nhon tsü khilo njüo gunla, nketsü kho pe kekhin hidan tsüti letse kethyü a kendo. 15Ale a npvü ahon pe akendo kethyü le a-zümvu ole? Ale nho kethyü genyu nle a shwi pe nyhü kelu hü ole?’ ”
16Lo Jisu le jo kenkhin zo-o, “Tsühontse kerinyu le khin lati, lo kekhinnyu le rila ti.”
A-kesi lo Rhünni Keso Gwünshen Ge Gü
(Mk 10:32-34; Lk 18:31-34)
17Tsüselo Jisu le Jerusalem nyu gun kezhü ka senthyükelo tseryü kenyhunche ju zen kecha thyü kehü ka a-le tson nyu anyugun ka, 18“Hire, ngun Jerusalem nyu gunzhü nyo; lo gun ntsin mele Temi Nyugü ten pe peshükeda ju lo lesükeshatsin ju ben nyu shüla ti; tson-o anyugun le a-nkhin-o a-dushvula lotse soti. 19Lo a-khipe keyüthyü lo a-vü lo a-khipe krus ge hüla lo tse-o a-ten pe Sunggigü shakemvunyu ben nyu shüla ti; lo a-le jonshen nyü rhünniso lati.”
Jakob Lo Johan Au Jvü Kehi
(Mk 10:35-45)
20Tsükatsü Zebedi nyu hvu jvü le a-nyuhvu zen ryüo a-rüshvuo tha nme hi.
21Tsükatsü a-le tenunyu tsügi ka, “Nle nyu hinyü hü nla?”
Tsontsin tsügi le a-ka, “Nle nraja bin nyu anyuhvu nme no nnjüzin lo nme no n ngwazin tse bin kelo njo hoshüta; ” tsonshü.
22Ai Jisu le a-ka, “Hagun le hi kehügü shamvu tse hi hünyo. Hai le ahonpen nyu Ale tsüti tse ndo sen kebin gü tsülo gwa mon?”
Tsontsin au le a-ka, “Ayi le tsü thyülo gwa.”
23A-le au ka, “Hai le ahonpen nyu tsülo gwa ketsin; ai a njüzin lo a ngwazin bin kelo we a npvü khishü mvule Apvü le a-npvü ndo sen kebin nyu tsüti.”
24Lo tsüka mi tseryü dan le jo tsü shalo ntsin anyugun le tsa sikezen tsühvu ge anyugun nyun ntala.
25Ai Jisu le anyugun kozen-o a-ki ryülo njüo anyugun ka, “Me kentsen nyu le me sogon hünyo. Lo kekvunyu no anyugun so kedagü thyü kehü hagun le sha bin nyo. 26Ai hagun dan nyu we tson loho; tsonkethyü gü mvule hagun dan nyu temi ligühigüe gon kenyü gü le hagun go thyüti. 27Temi ligühigüe hagun dan nyu ri kenyü gü le hagun gonyu thyü mvuloshvu. 28Tsühontse Temi Nyugüe meno a-leyi titse mvule me keleyinyu thyü titse lo temi kechon rhinhilo nrün genyu a-phou hoshü titse tsükeryü genyu.”
Jisu le Yhükeponyu Mihvu No Tha Hyukelo
(Mk 10:46-52; Lk 18:35-43)
29Tsüselo anyugun le Jeriko nyu chwi kezhü ka temi danda nme le a-sithen hü. 30Tsükatsü yhükeponyu mihvu le tsonkhoka bin tse njüo Jisu le tsü denzin gunzhü nle tse kethyü shashüo nra sen-o, “David Nyugü! Nle ayi shwinjün shüta!”
31Tsontsin temi ju le au no nra nyalo tseo au kesü, ai au le nra sen ketsinni-o, “David Nyugü! Nle ayi njün shüta,” tson bin.
32Tsüka Jisu le sunlo njüo au ko-o au ka, “A no hai ge nyuthyü keshü hai kendo la?”
33Tsontsin au le a-ka, “Npugü, ayi yhütyü no tha hyulo ta.”
34Tsügenyu Jisu le au njün-o au yhütyü kesüshü; tsontsin au yhütyü le ko chwiryülo, tson-o au le a-sithen tinla.
Currently Selected:
MATHI 20: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
