IBRINYU 13
13
Dihontse Sunggigü Kenyü Thyülo Mon
1Tsagü sikezen gü kekeso no binzin lo, lo tha lope tesin tsü la kethyü rüchün zinlo. 2Kechamvule nduka tsügenyu peha le shamvu tse tsangge jolonyu nsinlo kethyü genyu. 3Dothyü kebin nyu lo meno a-nshwen kebin nyue anyugun thyümin-e nthyü min a-keme letse kethyü rüchün-o tsüdan phin rüchünlo.
4Hagun aphu senkethyü rühvu mvulo shvu; lo sunkethyü zhü gü nrhula mvu bin mvulo shvu; kechamvule Sunggigü le kemeshün nyu lo keyüla nyu ketso nrün genyu.
5Pisa ketepen nyu hagun keyhun petsülo, lo hagun le nyu le bin yo tsü sen-o rünyu lo, kechamvule Sunggigü le, “Ale thame ka-e nhoshü loho; nmvue nkhela loho,” tse zoshü kela genyu. 6Tsügenyu nle pecheo,
“Npugü le akeche gü,
ale nshvu loho.
Temi le age nyu thyü shülo tila?”
7Hagun himhundyü ki Sunggigü jo pe hagun ka zo keshü hagun sharhinyu ju rüla rüchünlo; anyugun keyhun le dihontse yo rüchün shülo, lo tson-o anyugun ketenyen sithen lo. 8Jisu Khrista le ndu-e lo nthu-e lo kethonthen a-keme. 9Senkethyü jo keshün lo lile hile tse kethyü no hagun sa zentinla nya; ketyüketsü jvü mvule shwikenjün gü pe hagun nyun thyü nkolo kethyü gü we gwa, tsüdan, then kehü dan le a-kechwi hyulo hümvu.
10Ngun le kershvu phika gü nyu lotho thyü kehünyu le a-ge tyülo nrün kendi kershvubin nme le bin laso. 11Kechamvule kemu rotho thyü tseo peshükengun gü no a-zi sen-o kenshün bin nyu yükeryü nyukhu min dan tsü sen chwigü rünyi ngwen ki rola la tse gunryü. 12Tsügenyu Jisu ko a-npvü a-zi pe temi dan thyü kenshünlo nrün genyu chwida ngwen ki kenjün thyüla. 13Tsügenyu ngun chwida ngwenzin chwio a-ki gü a-genyu tetsin pvülo tile nu. 14Kechamvule hinyu we binzin nrün rünyi ndi, ai nle ryü kezhü rünyi nme tsü fü hünyo. 15Tsügenyu ngun a-zan sen-o Sunggigü keshwen kershvu thyü shü zin binlo nu, lo tson-o a-zan shao nmün lope a-zan shwen lonu. 16Thakegwa kethyü lo tha khipe metsü mejün kethyü nmhinla nya, kechamvule kershvu tsühontse kethyü tsüle Sunggigü le a-kenyü kehü genyu.
17Hagun sharhinyu jo zenlo, lo tsüdan hensin binlo; kechamvule tsüdan le anyugun tho rüla pe Sunggigü ka zo nrün genyu hagun kapu khwen ntsen bin kehü genyu. Tsügenyu anyugun no anyugun shekerhün thyüo thyülo; kechamvule anyugun no anyugun nyun gwamvula yatselo hagun ko kechwi nme-e ndi kethyü genyu.
18Agun genyu kehithyü binlo, kechamvule agun le thatho lihi nyu-e thatho kegwa thyü nyüo agun nshün kebin sha tsetsü bin nyo. 19A nipe hagun ki shü nshwenlo nrün genyu ale hagun no kehithyü kenyekvu binlo lotse hi tenge shü bin nyo.
Kehi Kethyü
20Nyunkebwen khishü kehü Sunggigü, kesinyu Npugü Jisu Tanyü kekhwen kedagü thyü nrhünni kelo gü, lo kethonthen kejopen kejozen kelo zi no, 21hagun pe a-kendo thyülo nrün genyu tha kegwa lihi aphu pe hagun ge shüo, Jisu Khrista nyu aphu dan nyu a-kenyü gü thyü binlo nda. A-no kethonthen zankechwi gü thyülo. Amen.
Jokekhin Lo Kelukeshü
22Apvünyu ju, hagun no ale hagun thukeyhun keshü jo hi hagun kenyü mvula nyao nyü shü lotse hagun ka hishü bin nle, kechamvule ale thu nzü sa shübin nyo. 23Ngun sikezen gü Timothi hoshü kela rüla ale hagun ko no shanyü, a-le nshwen gunryü yatselo ale a-zen ryüo hagun zen kehyu tile.
24Hagun sharhinyu ju lo kenshün nyu ju aphu kelushü le, Itali nyu kebin nyu ju le hagun kelushü le.
25Shwikenjün gü no hagun aphu zen bin kelo gü thyülo. Amen.
Currently Selected:
IBRINYU 13: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
