IBRINYU 12
12
Sunggigü Le Npvü
1Tsügenyu jünkezo nmhu keda le nhunpvü kebin genyu ngun hüsü kehü lo kemu nkho nni n nsü kehü tsü kelila, lo tson-o nyhen thyü nmhundyü zin hü gunlo tinu. 2Tson-o n ketenyen khipe nketsü gü lo thyüpen shü kehü gü Jisu nrilo, a-le shekerhün le a mhundyü ki bin kela gü genyu krus ge kejokepvü pe lihi kemvu thyüo nyhenlo, lo tson-o ntsoka Sunggigü Raja bin njüzin bin tin laso.
3Hagun shese lo hagun nyun kunla mvu nrün genyu, kemu nyu no a-shwirüchün sa lo a-ntsun sa-e nyhen kelo gü rüla rüchün shü shwi ta. 4Kehun le kemu zen kenren kethyü ka hagun le tezi ketsun keti nren mvu zun. 5Lo hagun le a-nyu laso tsekethyü hagun thu keyhun jo tsü nmhinla sele?
“Anyu, Npugü le n nthyü nnyüo nsenkethyü
tsü rüchün kenshenla nyalo,
nmvue n kemu tsin pe nhi kethyü
ka n shese la nyalo.
6Kechamvule Npugü le a-le so kehünyu
senthyü hünyo,
lo a-nyenyu lihigüe a-le zenlo kelanyu
vüo zenlo hünyo.” 7Hagun no gwalo nrün genyu hagun nthyü nnyüo hagun senthyü kehü tsü nyhenlo, Sunggigü le hagun no a-nyu hontseo hagun ge tson hünyo. Kechamvule nyu segü le a-pvü le a-nthyü nnyüo a-senthyü kemvu le bin nla? 8Keshanyu laka me kechanyu aphu a-nthyü nnyü kethyü hyulo kü lo hagun we khela yatselo tsüle hagun le nyutsin nyu mvule teshvu nyu laso. 9Tsünyeki kazü nyu npvü nyu le n nthyü nnyüo nsenthyülo nle a-rühvu hünyo. Tsonlo nle rhünlo nrün genyu tsünyeki-e nle n Kapu pvügü jozen kvu mvuti ole? 10Kazü nyu npvünyu le a-mhundyü ka a-zü tseo a-gwünkho keshanyu ka n nthyü nnyüo nsenthyü hünyo. Ai a-we nno a-kenshün hyulo titse ngenyu kegwa kon ka n nthyü nnyüo nsenthyü hünyo. 11N nthyü nnyüo senkethyü le aphu tse nyeka we nkenyü mvule thyüri hünyo; ai tsü lope a-senthyü kelonyu le kekhin ki tsügenyu nyun kebwen rasha kentsen keseri nsha shü hünyo.
Senthyü Keshü Lo Petsü Bin Mvulo Keshvu
12Tsügenyu hagun buthun kenla tsü penso shü lo hagun kho kvukemvu thyü nko shülo! 13Lo tson dan thyü kenzhü shülo, tson-o phayhon gü no rhunkekhün la mvule ponlo la nrün genyu.
14Hagun temi aphu zen kengü gwalo titse lo nshün lo titse kethyü hagun yhen thyülo, tsühontselo kemvu we temi nme-e Npugü hyulo ho. 15Temi nme no Sunggigü shwikenjün gü gwünzü la mvu nrün, tsüle kekhü bin nme no tsü soryüo hagun kevüla lo tsügenyu temi kechon thyü nrhula mvu nrün genyu petsülo. 16Tsüle temi nme no yhun serimvu nmvue ketsin rüchün mvuo Esau hontse gintho gwa genyu a-peshü jün jwen tyüla mvu nrün genyu petsülo. 17A-le kekhin ki jochü a-le keni kelagü tsü gwenlo nyüo a-yhüphu che-o füe thame thyüo a-nyun keluni kelo gwünkho ndila tse kethyü hagun ko sha bin ti.
18Tson-o hagun le kesülo kegwa kazüthun ka mah kenyü metsen tse lo züntin tsekethyü lo tsangkenbu terhi kethyü, 19lo shu kekhun khwen, lo jokezo khwen gü nyü kelonyu ju le anyugun ka jo zosin nya gwünlo tseo hi sola kethyü gü ki gunryü mvu zun. 20Kechamvule, “Nyukhu-e kazüthun tsügü keju shü yatselo tso pe jon shvula ti,” tsekethyü jo gü tsü nyhen loho la. 21Lo shwikenrin thyüri tsin kela genyu Mosa-e, “Ale nshvu pe ake nsüla le,” tse zo.
22Ai hagun we Sion kazüthun ge rhün kehü Sunggigü rünyi nyida gü, tsangge Jerusalem gü lo jolonyu swülobu keho le shekerhün thyü kequen kebin nyu. 23Lo tsangge a-zan thulo kela nnyulo kerinyu kehun nyu, lo temi aphu ketso nrün Sunggigü ka, lo thyü pe gwapenlo kela kentsen nyu ju ka. 24Lo kejopen kejozen kelo keshün gü nyu a-jaka kebin gü Jisu ki, lo Abel zi nyeki zope gwakvu kehü kezün pe gwün kethyü zi gü ki ryü laso.
25Hagun nthon kebin gü jo kenila mvu nrün genyu petsülo nye. Kechamvule kazünyu anyugun nthon keshü jo gü zen mvu kela ka nrhilo nrün ndila yatselo, nle tsangge n nthon kebin jo gü kenila yatselo tin-o nrhi loho kvula ti. 26Tsükatsü a-jo le kazü sükenu shü, ai ntsoka we a-le zope bin kenjü le, “Ale gwüngwa nme ka kazü ntimvule, tsang ai sin-o sükenu shü ti.” 27“Gwüngwa nme,” tsekethyü jo hi ge tsin keshü le nnu kemvu dan no binlo nrün genyu nnu kela dan a-kon le nyhun keshü dan sentin la nrün shalo hünyo.
28Tsügenyu ngun nnu nrülo keho keda kethyü nme hyulo kela genyu a-cheno lonu, lo Sunggigü shye nshvu kelo hontse a-no lolo kekü kershvu thyü pe a-tsü tinu. 29Kechamvule ngun Sunggigü le tha rokemhenla kehü mah nme kethyü genyu.
Currently Selected:
IBRINYU 12: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
