JAMES 1
1
1Sunggigü lo Npugü Jisu Khrista gogü James le thu pe nrenru tinkela tsipwen tseryü kenyhun che dan kelu keshü.
Ketenyen Lo Thakesha
2Apvünyu ju, kesemen shaseni le hagun ka keryü ka hagun kenyü salo nye. 3Kechamvule hagun ketenyen kegwa keshvu shwi kethyü genyu nyhenhi kethyü le chwiryülo hü tsekethyü hagun le sha bi nyo. 4Lo hagun gwa ti gwapen lo tha nme nyue pen kemvu thyü mvulo nrün genyu nyhenhi kethyü no a-tho tsü thyüsa shülo. 5Hagun ligühigüe thakesha rhodyü yatselo, a-no nho lo me nmu mvu tse khipe temi aphu tsü kehü gü Sunggigü ka hilo nye, tson yatselo khipe a-tsüti. 6Ai a-no kenyunhvu mvutse ketenyen nyu hilo, kechamvule kenyunhvu kehünyu le tsangkenbu no whü pe lizin hizin shü kehü zü keda kentyü hontse kethyü genyu. 7Lo temi tsühontse kethyü nyu no Npugü ka nyu tha lihi-e hyulo titse kethyü rüchün nyalo. 8A-le kenyun hvu kehünyu lo thame ka-e a-nyun tsü binlo hü kemvu genyu.
Tha Kendi Lo Kenya
9Ngun sikezen nyu mijamira nyue no Sunggigü le a-penso keshü tsü rüchün pe ketekho lo. 10Lo kenya güe no a-thyü tsenyo keshü genyu a-sherhünlo nye; kechamvule tehen kepun hontse a-le ndila nrün genyu. 11Yhüko le nnyü pe nyün soryüo tehen pho rügüla hünyo; tson-o a-kepun le rinla hünyo, lo a-zekegwa nmhenla hü. Tsügenyu kenya nyue a-yhen thyüo fü nsen kebin nyu ndila nrün genyu.
Kegwa Keshvu Keshwi Lo Kesemen
12Kesemen nyu nyhenhilo kehünyu le a-hen kegwa nyu; kechamvule a-le kesemen nken chwilo yatselo Sunggigü le khipe a-so kehünyu tsü titse zo kenjü kerhün perün gü a-le hyulo nrün genyu. 13Temi ligü higüe no kesemen le a-ge keryü ka, “Sunggigü le asemen bin nyo,” tsekethyü zo nya; kechamvule Sunggigü semen pe a-no tha gwakemvu thyüla lo nrün ndi; lo a-le temi nme-e semen shwi hü mvu. 14Ai temi ligühigüe a-le nnyü kehü gü no a-sü lo a-nsü sen gü a-semen la kehü gwünzin. 15Lo a-le nnyü kehü dan phou pvülo-o kemu nnyu shü hünyo, lo kemu gü tsüle peshülo yatselo kesi sen chwiryü hünyo.
16Keso apvü nyu ju, meno hagun sala nya. 17Jochü kegwa lihi-e lo jochü gwapen kethyü aphu teso ge kebin dan Pvügü kanyu ryü hünyo; lo a-le kelukenyon hümvu, nmvue n khepe kezün shye nyu shüla hü mvu. 18A-le nno a-le nyhun keshü dan rasha keri dan thyülo nrün genyu ketsin jo gü ge a-npvü a-kendo thyüo nzen chwiryülo le.
Jo Kenyü Lo Thyüzen Kethyü
19A keso apvünyu ju, jo hi shalo nye. Temi ligühigüe nyü whütselo, ai nya jü tse jo zolo, lo nkenyü mvu whüwhü tsela nya. 20Kechamvule temi nyunkenta nyu Sunggigü kentsen kenyü thyülo hü kemvu genyu. 21Tsügenyu hagun nshün kemvu aphu lo seri kemvu dan khe küla-o hagun nyun bwen-o hagun kapu kenilo kegwa jo lope hagun nyun nyu sen shü kela gü lolo nye.
22Ai hagun npvü hagun sa pe nyü kehü nyu nti thyüla mvule jo gü thyüzen kehünyu thyülo. 23Kechamvule temi ligühigüe jo gü thyüzen mvuo nyü kehü gwünzin we temi tsü gü le sheshwi nme ka a-npvü a-mhun hyu kehü hontse gwünzin. 24A-le a-npvü a-hyu shüo ketu tinla yatselo a-le dihontse yo tsekethyü rüchün mvu whüla kehü genyu. 25Ai temi ligühigüe a-hoshü kela tejvü gwapen kethyü gü nrio nyülo-o nmhinla mvu tse thyüzen kelonyu le tsünyu le a-le thyü kebin gü genyu jochü hyulo ti.
26Temi ligühigüe a-le nyünyü kipon nyu letse rüchün hüo a-yi kekhenilo mvu yatselo a-npvü a-sa hünyo, lo a-nyünyü tsüe a-kenrun le. 27Npvü Sunggigü mhundyü nyu nshün lo rhu kemvu nyünyü tsü le higü hile; tegonyu ju lo maginyu ju kenjün kethyü shweshwi kehü, lo kazü gü nyu a-npvü a-nrhula mvu bin kehü nyu le.
Currently Selected:
JAMES 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
