CHWEKETIN 10
10
Tsekhvu
1Tson-o Npugü le Mosa ka, “Gü raja gü teno shülo. Ale anyugun dan nyu nduntho hidan thyüshü nrün genyu raja gü lo a-hensin kedanyu dan nyu thyüpe rüla so, 2lo hagun no ale ndun tho hidan thyüo Ijipt nyu dan thyü kelu keshü rüla pe hagun nyenyu lo hagun nyenyu ju nyenyu ka zoshülo nrün genyu. Hagun aphu ale Npugü letse shaloti.”
3Tsügenyu Mosa lo Aaron au le gü raja gü ka, “Npugü Ibrinyu Sunggigü le kezole, ‘Dithen laki nle tsenyuo ahensin ryümvu bin tila? Atemi dan no arüshvu nrün genyu, anyugun no chwila lo. 4Nle nmvu yatselo, ale sendu ki tsekhvu senryü nkazünyu shüti. 5Tsüle chonritsin-o nkazü hen shü lati. Anyugun le tegwün le nke kensen lihi-e tyü lati, senbin kebin dan-e tyü kü lati. 6Anyugun le nraja ka, nhensin kedanyu dan ka, lo ntemi dan ka aphu kesü thyü lati. N pvübon nyu le ryüo kazü higü nyu yhun kelo ka ryü nthu keti hyu shwi kemvu gwakemvu ketsin thyüti.’ ” Tsonshüo Mosa le rani tinla.
7Raja hensin kedanyu dan le a-ka, “Dithen ki temi higü no kenjün kethyü pe ngun tsübin tila? Israel nyu temi dan no anyu Npugü rüshvu nrün genyu chwilalo. Ijipt nke kela shalo mvuzun ole?”
8Tson-o Mosa lo Aaron au zen raja gü ki rani ryü laryü a-le au ka, “Hagun le gü Npugü, hagun Sunggigü rüshvu lo gwa le. Ai senyu le gü tila?”
9Tsontsin Mosa le, “Agun aphu güti, ntsenyu lo püshünyu dan aphu kesin ti. Agun le agun nyenyu peche lo tenu-e, agun tanyü, tenyü lo methu-e zen güti, Npugü kerühvu nga nme thyü nrün genyu.”
10Raja güle, “Ale Npugü zan nyu swe-o zo bin nyo ale thame ka-e hagun no tenunyu lo ntsenyu ju zen gü loha! Hagun le gwakemvu rhibin tsentsü laso. 11Kemvui! Hagun le günyü ya tselo pechenyu dan nti chwigü Npugü rüshvulo.” Tsonshüo raja gü mhundyü nyu au hüshwila.
12Tsontsin Npugü le Mosa ka, “Nbenshwe pe Ijipt kazü so shüo tsekhvu senryülo. Anyugun le ryüo lihi-e senchwiryü kebin tegwün le jon kensen dan tyü lati.” 13Tson-o Mosa le a-thün penso shü, lo Npugü le npho kipon tsangkenbu nme no tsünyü jongwen lo tsüje khensin kazü gü nyu nbu shü. Lonyü gü tsekhvu when senryü shü. 14Anyugun le a-dan thyü ryüo Ijipt kazü apentha nyu bin lola. Tsüle chon pe himhundyü hyuhü kemvu lo hisiki-e hyuni kemvui thyüla. 15Tsüle kazü hen pe metsen tsela; anyugun le tegwün le jon kensen lihi-e lo senbin ge terasha dan-e aphu tyüla. Ijipt kazü nyu senbin ge lo kazü nyu-e tehen kenjvü nme ndila.
16Tsontsin raja gü le nyhun-o Mosa lo Aaron hvu ko shüo au ka, “Ale Npugü hagun Sunggigü mhundyü nyu lo hai mhundyü nyu-e mu laso. 17Tsügenyu nthu gwen hi akemu jüshülo, lo Npugü hagun Sunggigü no age kesi shaja higü hi sentin lalo tse kehi thyü shüta.” 18Mosa le raja gü nken chwigü Npugü ka kehi thyüshü. 19Tsontsin Npugü le npho tsangkenbu kelu pe nkhün tsangkenbu kekvu nme thyüshüla, tsüle tsekhvu dan whün sengü kenhon züdanyu shüla. Ijipt aphu nyu tsekhvu nme bin mvula. 20Ai Npugü le raja gü nyun thyüpe rüla, tson-o a-le Israel nyu dan no chwimvula.
Kezün
21Npugü le Mosa ka, “Nbenshwe pe tsang denzin shülo, kezün nme no Ijipt kazü henlo la nrün genyu.” 22Mosa le a-ben shwen pe tsang denzin shü laryü Ijipt kazü aphu nyu jonshen züntin tsela. 23Ijipt nyu le khinyunyu kehyu mvula, tsügwen kho ka temi nme a-ka nken mvula. Ai Israel nyu le kehübin ki we keben le bin.
24Raja gü le Mosa ko shüo a-ka, “Hagun le gü Npugü rüshvu lo gwa le; tenunyu lo ntsenyu ju-e hagun zen gü logwa. Ai hagun tanyü, tenyü lo methu dan we no hiki binlo.”
25Tsontsin Mosa le, “Tsonyatselo nle agun no kerüshvu lo rope kerüshvu thyüpe agun Npugü Sunggigü tsü nrün genyu nyukhu dan khipe agun tsülo. 26Tsügenyu kemvui, agun le agun senru zen agun thenti; nme nti-e khepe agun siki shü kemvui le. Agun npfü nyukhu digü pe Npugü agun Sunggigü rüshvu tiyo kejüti. Lo tsüki gülo kemvu kawe, nyu nyukhu pe a-rüshvu tiyo agun le sha kemvui le.”
27Npugü le raja nyun thyüpe rüla, tson-o a-le anyugun no chwimvula. 28Raja gü le Mosa ka, “Amhundyü ka hü nyao tin la! Ano nhyusin nya! Ale nhyu ni kethyü nyü nle tsünyü siti!”
29Mosa le a-jokenio, “Nle njü le.” “Nle thame ka-e ahyu sin loha.”
Currently Selected:
CHWEKETIN 10: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
