CHWEKETIN 9
9
Senru Kesi
1Npugü le Mosa ka, “Gü raja güka, Npugü, Ibrinyu Sunggigü le, ‘Atemi dan no chwila lo, anyugun no arüshvu nrün genyu tson zoshülo. 2Nle nmvuo anyugun no chwimvulo, 3Ale shaja ketetsin nipe nsenru dan-- nkeru, gada, ut, methu, tanyü lo tenyü aphu ge shüti. 4Ale Israel nyu lo Ijipt nyu senru dan thyü pe no kechashü thyüshüti, lo Israel nyu hon senru nme-e no siloho. 5Ale, Npugü, senduki gwenkho günyu tsü ale hi thyüshüti.’ ”
6Tsüsinyü Npugü le a-le zokeshü hontse thyüshü, tson-o Ijipt nyu senru aphu sila, ai Israel nyu senru we nme nti-e simvu. 7Raja güle dihontse layo ketso keshü ka Israelnyu senru nme simvu letse a-ka zoshü. Ai a-le anyu rüla-o temi dan no chwimvula.
Kinthyü
8Tsontsin Npugü le Mosa lo Aaron au ka, “Maphun nyu jonbü gwe lo-o; Mosa le raja gü mhundyü nyu tsü shwekedun shüti. 9Tsüle kenphü hontse kezen-o Ijipt kazü aphu nyu gun lati lo lika hika-e kinthyü no temi lo senru ge chwiryüti.” 10Tson-o au le jonbü gwe lo-o gü raja gü mhundyü ka solo; Mosa le tsü shwepe tsangneki shü laryü, temi lo senru ge-e kinthyü thyü kü lola. 11Temvunyu dan le Mosa mhundyü nyu ryülo mvula, anyugun ko Ijipt nyu temi kecha dan hontse kinthyü le a-min kesü thyülo kela genyu. 12Ai Npugü le Raja gü nyu thyüpe rüla, lo Npugü le zokeshü hontse, raja gü le Mosa lo Aaron au khwenyü mvula.
Tegwün
13Npugü le Mosa ka, “Lonyü nshwe gü raja gü teno-o a-ka, Npugü, Ibrinyu Sunggigü le, ‘Atemi no chwila lo, anyugun no arüshvu nrün genyu tsonzo hü nle, tse zoshülo. 14Higü gwenkho ka we ale nhensin kedanyu lo ntemi dan ge ntimvule shaja pe nge-e shüti, tson-o nno kazü aphu nyu ahontse kethyü nme-e ndi tse kethyü sha loti. 15Ale aben penso pe nvü lo kehokenyü pe ntemi ge shü lo nnkie shü lati. 16Ai akekvu pe nhishü titse ale nno rhün bin nyo tson-o kazü aphu no arüla shalo nrün genyu. 17Tson-e nle ketekho-o atemi dan no chwimvu bin nyo. 18Sendu ki hi gwenkho ka ale tegwün no chesa shüti, nduka-e Ijipt kazünyu tsühontse kethyü shahü kemvu. 19Tsügenyu ntsoka hagun hon nyurhün lihi-e kendo nyu kebin dan zenryü a-kesun kebin hensin shü lalo. Kechamvule temi lo nyukhue tegwen ki kebin dan tsüle tegwün chepe jonshvu bu kelai genyu.’ ” 20Raja hensin kedanyu peha le Npugü le zokeshü tsü nshvuo a-gonyu lo a-senru zenryü ka hensin shülo la. 21Ai kechanyu le Npugü jo pe lihikemvu thyüo a-gonyu lo a-senru khepe no kendo nyu bin.
22Tsüselo Npugü le Mosa ka, “Tegwün no cheo Ijipt kazü apentha ge- temi, nyukhu lo lonyu tehen aphu so ge tsüryü nrün genyu nben shwe shülo tsonshü.” 23Tson-o Mosa le tsang ntsun-o a-thün shweshü laryü Npugü le tsangkesen, tegwün lo tsangpera nipe kazü so ge shü. Npugü le 24tegwün chesa lo tsangkekechwe lo tsangpera nishü. Tsüle Ijipt kazünyu tsühontse kethyüsha hükemvu kenshvu ketsin nme. 25Ijipt kazü aphu so tegwün güle kendo ki kebin temi, nyukhu, lo tha kecha aphu jonshye küla. Tsüle lonyü tehen lo senbin aphu jonsejonre la. 26Tegwün che kemvu le Goshen lojvu Israel nyu le yhun kehü bin tsü ntila.
27Raja gü le Mosa lo Aaron au koshüo au ka, “Nthugwen ale mu laso; Npugü le njü lo atemi dan lo ale njümvu la sele. 28A-le Mosa ka zoshü, Npugü ka hishülo! Tsangkesen lo tegwün hino ryü sin nya gwenlo! Ale hagun no chwila titse a johoshü bin nyo, hagun no hinyu bin kethün sin kemvuiso.”
29Mosa le a-ka, “Ale nyida higü nken chwilo nyemhun aben penso-o Npugü ka hishüti. Lo kazü le Npugü hon tsekethyü nno shalo nrün genyu tsangsen lo tegwün che sinmvu lati. 30Ai nle lo nhensin ka kedanyu dan Npugü Sunggigü nshvu lomvuzun tse kethyü ale sha bin nyo.”
31Flax lo barley nke la, barley le a-pwechwio münla lo flax le nngün bin kela genyu. 32Ai Ata low we nke lamvu, tsüle mün ntsü kehü genyu.
33Mosa le Raja gü kheo nyida gü nken lao a-ben shwepe Npugü ki shüo kehi thyüshü. Tsontsin tsangkesen, tegwün lo tsangkenri tsüle pon la. 34Ai raja güle tsangkesen, tegwün lo tsangkenri le ponkela hyulo laryü, a-le kemu thyü nila. A lo a-hensin kedanyu dan le himhundyü hontse anyu nyun rüla, 35Npugü le Mosa ge bin-o zokeshü hontse, tson-o raja güle Israel nyu dan no chwimvula.
Currently Selected:
CHWEKETIN 9: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
