CHWEKETIN 11
11
Mosa le nyuri Gü le Sila Nrün Zokeshü
1Npugü le Mosa ka, “Ale shaja nme nti nisin pe Ijipt raja gü lo a-temi dan ge shüti. Tsüsiki nyu a-le hagun hoshü ti. A-le hinyu hagun aphu hüshwi lati. 2Ntsoka Israel nyu temi dan ka zoshülo, anyugun aphu no anyugun kajonnyu rakagi lo suna ronyedan hi kü lolo.” 3Npugü le Israel nyu no Ijipt nyu keso pfülo. Ketsin thyü raja hensin kedanyu lo temi aphu Mosa rüchün ngon sala.
4Mosa le raja gü ka, “Npugü le zo, ‘Khejenyu tsangluka ale Ijipt nyu dan nyu güti, 5lo Ijipt nyu peche nyuri aphu si lati, raja nyugü rajakhün gwen nrün gü ka tsügü do penthu kehügi nyugü keti. Lo senru aphu nyuri gü le si lati. 6Ijipt kazü aphu nyu temi le chü nra sen pe himhundyü thame ka-e tsonhü kemvu lo hisi kie tsonsin kemvu thyüti. 7Ai tehi-e khun-o Israel nyu temi lo a-senrue ren loho. Tson-o hagun le Ale Npugü, Israel nyu lo Ijipt pe kechacha kethyü gü tse sha loti.’ ” 8Mosa le zosin-o, “Nhensin kedanyu le aphu ryü amhundyü nyu nkhün ti, lo anyugun le ano atemi dan aphu zen lo-o chwila lotse aka hiti. Tsüsikinyu ale tinti.” Tson-o Mosa le anyunta sa-o raja gü kanyu tinla.
9Npugü le Mosa ka, “Raja gü le nkhwenyümvu binti, ano Ijipt nyu nduntho dan thyü nchon shü nrün genyu.” 10Mosa lo Aaron au le nduntho hidan hi aphu raja gü mhundyü nyu thyüshü, ai Npugü le anyun thyüpe rüla-o a-le a-kazü nyu Israel nyu dan no chwimvula.
Currently Selected:
CHWEKETIN 11: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
