ROMETE 12
12
Pathian Pomtak Kithoihna
1Huchi in unaute aw, Pathian zahngaihna ziak in, kithoihna hing, siangthou leh Pathian lung tuak ding in na pumpi uh lan ding in ka hon ngen ahi; huai na biakna dan ding him uh ahi. 2Hiai khovel dan bang in om kei unla; Pathian deihlam a hoih leh lungtuahhuaitak leh hoih bukim na theihtel theihna ding un, na lungsim uh athak a om in hong kikheng lamdang zawta un.
Kha Thilpiak Tan Bang Zel A Nasep
3Na lak uah kuamah na kiletsak ding hun val ua kiliansak lou in, Pathian in michih kiang a ginna hun apiak bang zel a diktak a ngaihtuah zaw ding in Pathian in ahon piak hehpihna ziak in ka hon chi chiat ahi. 4Pumpi khat ah hiang tampi i nei ua, hiang tengteng nasep bel akibang kei hi, 5huchi mah bang in, eite tampi himah lehang Khrist ah pumpi khat i hi ua; atuamtuam in i kihiangtuah chiat uhi. 6Hehpihna ahon piakdan bang zel in thilthawnpiak tuamtuam i nei chiat uhi; thugen ding ahihleh i ginna toh kihun in i gen ding uhi; 7Nasepna ahihleh tua anasepna mah ah sem hen; sinsakmi'n asinsakna ah sinsak hen; 8Hanthawn mi in ahanthawnna mah sem hen; thilpemi'n phaltak in pia hen; makaimi'n phatuamngaihna toh ma kai hen; zahngaihna nasemmi in kipaktak in sem hen.
Khristiante Hindan Ding
9Itna ahihleh lepchiahna tel lou in hi hen. Gilou hua unla, ahoih lam len tinten un. 10Unaute itna lam ah ittak in kilainattuah chiat un; pahtawi lam ah, kideihsaktuah chiat un. 11Thanop lam ah, thadah kei un; Kha a vakna toh phatuamngai in Toupa nna sem un. 12Lametna ah kipak unla; gimthuakna ah kuhkal un; thumna ah thum teitei un; 13Misiangthoute taksapna ah taksap awng hu unla; mikhualte kipahpih in om nilouh un.
14Hon sawite vualzawl un, vualzawl unla, hamsiat kei un. 15Kipakte kipahpih unla, kapte kahpih un. 16Ngaihtuah kibang in om chiat un, kingaihtuah sang lo kei unla, mi neuneu kithuahpih zaw un. Kipilsak kei un.
17Kua gitlouh leng gilou in thuk kei un. Mi tengteng muh in thil kilawm ngaihtuah un. 18Ahihtheih liaileh noumau lam bek, mi tengteng toh kituak in om un. 19Deihtakte aw, phu kila kei un, Pathian hehna awn zaw un, “Phulak himhim keimah lak ding ahi, ke'n ka thuk na ding, Toupa'n achi,” chih gelh ahi. 20Huaiziak in “Na melma agil akialleh nek ding pia inla; adang atakleh dawn ding pia in; huchibang a na hihleh alutung ah mei-am sekkhawm na hi ding hi.” 21Gitlouh zoh in om ke'nla, hoihna in gilou zou zaw in.
Currently Selected:
ROMETE 12: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
