ROMETE 13
13
Kumpi Vaihawmte Thumanna
1Michih atung ua vaihawm thuneite thuthu in om hen. Pathian thu lou in kuamah thunei a-om ngal kei ua; vaihawm thunei mite zaw Pathian seh ahi uh. 2Huaiziak in kuapeuh vaihawmmi sel Pathian sehkalh ahi a, aselte'n amau tung ah vaihawmna akimuh ding uhi. 3Vaihawmte thil hoih hihte ding in kihtakhuai ahi kei ua; thil hoih lou hihte a ding in bel kihtakhuai ahi uhi. Ahihleh vaihawmmi kihta lou a om na ut uhia? Thil hoih hih le uchin phat na loh ding uh. 4Amah tuh na hoihna ding ua Pathian nasemmi ahi ngal a. Himahleh kihta un, namsau lah amawk tawi ngal kei a; amah Pathian nasemmi, thil hihkhialmi tung a heh a phulami ahi. 5Huaiziak in Pathian hehna kihtakna ziak kia hilou in, na sia-le-pha theihna ziak lel ua leng na kituklut ding uh ahi.
6Hiai ziak in siah leng na liau zel ve ua le; huchibang thil ngei hih teitei ding in Pathian nasem mite ahi uhi. 7Mi tengteng kiang ah piak ding peuhmah pia un; leiman piakna ding kiang ah leiman pia unla, siah liauna dingpa kiang ah siah liau unla; kihtak dingpa leng kihta unla; zahtak dingpa leng zahtak un.
Unau Ki-itna
8Ki-ittuahna lou ngal kuamah bangmah ba kei un; amau mihinpih itpa'n dan azuikimta hi. 9Hiaite, “Ang kawm ke'n, Tualthat ke'n, Gu ke'n, Eng ke'n,” chih leh thupiak dang om lai himhimte, “Nangmah na ki-it bang in na invengte na it ding ahi,” chih in akhaikhawm vek hi. 10Itna in a-invengte ahihse ngei kei a; huaiziak in itna zaw dan zuihkimna ahi.
Khrist Ni Hong Naina
11Huai lou in, tu bang hun ahia chih na thei ua, ihmu khanloh a hun mahmahta chih na thei uhi. Tu'n zaw i gintak tung lai sang in i hotdamna anai zawta ngal a. 12Zan abei dekdekta a, khua avak dekta hi; huaiziak in mial a thilhihte paikhia in vak thuam in i kithuam ding uh. 13Sun a om bang in kilawmtak in i om ding uh, zu dawn buai leh zu kham a om lou in, huk leh kingaihhat a om lou in, kilai leh kihaza a om lou in. 14Toupa Jesu Khrist in kithuam zaw unla, na sa duhgawlna uh pichin ding in bangmah kibawl kei un.
Currently Selected:
ROMETE 13: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
