ROMETE 11
11
Israelte Paihkhiakdet Hilou
1Ahihleh Pathian in amite apaikhia a hia? Paikhe lou hial! Kei leng Israel mi, Abraham suan Benjamin nam ka hi ngal a. 2Pathian in ami a theihkholhte apaikhe kei hi. Laisiangthou in Elijah thu agen na thei kei ua hia? Ama'n Israel mite tungthu Pathian kiang ah atun a, 3“Toupa na zawlneite athat ua, na maitamte ahihchim ua; keimah kia nutsiat in ka om, kei leng hihlup ahon tum uhi,” achih. 4Himahleh Pathian in bangchi in adawng a? “Baal ma a khukdin ngeiloumi sangsagih keimah a ding in ka hawi hi,” chi in adawng hi. 5Huchibang in tulai in leng akhosuaksun, hehpihna a tel a-om uhi. 6Hehpihna ziak ahihleh, nasep ziak ahita kei, huchi hi keileh, hehpihna tuh hehpihna ahita kei ding.
7Bangchi ahita dia le? Israel mite'n azon uh amu kei uh. Telte'n bel amu ua, adangte tengteng ananggawpta uhi.
8“Pathian in tuni tan in akiang
uah lusukna kha apia a,
muh theihlouhna mitte, zak theihlouhna bilte toh,”
chih gelh bang in.
9David in,
“Adohkan uh amau a ding in thang leh pial,
pukna leh phulakna hong hi hen;
10Amuh theihlouhna ding un amitte uh hong mial hen,
nang anungzang uh kunsak gige in,” achi hi.
11Ahihleh akisuih uh akipukdetna ding uhia? Hilou hial! Apuk ziak un Zentelte kiang ah hotdamna ahong tung zawta hi; Israel mite hazatsakna ding in. 12Huchi in apukna uh bawn khovel hih hauhsakna ahih a, akiamna uh leng Zentelte hauhsakna ahihleh, abuchin nawnna uh bangchi phet a hamphatna lianzaw in azui diam aw!
Israelte Pukna Ziak A Zentelte Hamphatna
13Huchi in nou Zentelte kiang ah ka gen ahi. Kei Zentelte kiang a sawltak ka hih ziak in, ka nasepna pen ka pahtawi ahi. 14Huchi a ka chipihte ka hazatsak theih teiteina ding leh alak ua khenkhatte ka hotdam theihna ding in. 15Amau paihkhiakna bawn khovel toh kituah nawnna ahihleh, amau deih nawnna ding sihna a kipan hin nawnna lou ngal bang ahi dia?
16Huan gah masa thillat, tangbuang mekthem asianthouleh huchi mah bang in abeupi asiangthou hi; azungpi asianthouleh ahiangte leng huchi mah bang ahi uhi. 17Hiang khenkhatte hihtan a a-om in, nang, olive tak lou, amaute lak a phuhlut a na om a, olive sing a hauhna zung kikoppih sam na hihman in, 18hiang dangte lak ah kisathei ke'n. Kisathei mah lechin nang azung vakpa na hi kei a, huai azung pen nang hon vakpa ahi zaw hi.
19Huan nang, “Phuhlut a ka omtheihna ding in hiangte hihtan in a-om khinta vo oi,” na chi dia. 20Ahi agintaklouhna ziak un hihtan in a-om ua, nang na ginna ziak in na dingh ahi, uang ke'nla, lau zaw in. 21Pathian in hiangtakte pen bawn ahawi kei ngalleh nang leng ahon hawi tuan kei ding hi. 22Huchi in Pathian hoihna leh athukhauhna ngaihtuah in; apukte a ding a athukhauhna; nang a ding in bel ahoihna, hoihna a na om gigeleh; huchi ahihkeileh nang leng satkhiak in na om sam ding. 23Huan amau leng gingta lou a a-om nilouh kei uleh, phuhlut in a-om nawn ding uh; Pathian in amaute aphutlut nawn thei hi. 24Nang piandan a olive tak lou a kipan a satsup bawn, piandan lou bang a olive sing hoih a phuhlut a na omleh, tua ahiangtakte, amau olive sing ngei ah phuhlut hi na tel un chia!
Israelte Hotdam A Om Ding
25Unaute aw, hiai thuguk na theih louh uh ka ut kei a, huchi lou in zaw na kipilsak ding uh; Zentelte buchinna ahong tun masiah Israel mi khenkhatte tung ah siatna ahong tung tadih hi. 26Huchi in Israel mi tengteng hotdam in a-om ding uh:
“Zion a kipan in Hondampa ahong suak ding a,
Jakob kiang a kipan Pathian limsaklouhna ahihmang ding,”
27“Akiang ua ka thukhun ding hiai ahi,
akhelhnate uh ka lakmang chiang in,” chih gelh bang in.
28Tanchinhoih lam ngaihtuah in, nou ziak in melma ahi ua; tel thu lam ngaihtuah in bel apipute uh ziak in deihtakte ahi uhi. 29Pathian in athilthawnpiak ah leh asapna ah alungsim akhel ngei kei hi. 30Nidanglai in Pathian thu na gingta kei ua, himahleh tu in amau agin louh ziak un zahngaihna na mu ngal ua. 31Huchi mah bang in tu in, Pathian in nou ahon hehpihna ziak a, zahngaihna amuhtheihna ding un amau leng ging lou ahita ve ua. 32Pathian in azahngaih vek theihna ding in ginlouhna ah mi tengteng akhumvekta hi.
Pathian Pahtawina
33Pathian pilna leh theihna hauhdan thuk hi na tel e! Avaihawmnate theihtheih vual leh alampite sui zoh vual hi kei na tel e!
34“Toupa lungsim kua'n ahia thei?
ahihkeileh kua ahia ama thuhilhmi?
35Ahihkeileh adit nawn ding a leng akiang ah kua'n ahia thil pe masa?”
36Amah a kipan leh amah ziak leh amah a ding a thil tengteng ahong om ahi ngal a; amah kiang ah tangtawn in thupina om hen. Amen.
Currently Selected:
ROMETE 11: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
