KILAKNA 9
9
Pengkul Ngana Leh Gukna Mutna
1Angel ngana in amut a, van a kipan leitung a aksi kia ka mu a; amah kiang ah kokhuk taw nei lou honna chabi piak in a-om hi. 2Ama'n kokhuk taw nei lou ahong a; huai kokhuk a kipan in meikhu, meipi khu bang mai ahong pawttou a, huai kokhuk a meikhu ziak in ni leh huihkhua hihmial in a-omta hi. 3Huan meikhu a kipan in leitung ah khaupete ahong suak ua; aikamte'n thilhihtheihna aneih bang un amau thilhihtheihna piak in a-om uhi. 4Amau leitung a loupate, thil hing himhimte leh sing peuhmahte, hihse lou a, mi kuapeuh atal ua Pathian chiamtehna neiloute kia hihse dia hilh in a-om uhi. 5Amau that lou ding a, kha nga sung amau hihgenthei zaw ding a hilh in a-om ua; huai a hihgentheihna tuh aikam in mi kuahiam ateh a ahihgentheih bang ahi. 6Huai ni chiang in mi'n sihna azong ding ua, bangchi mah in amu kei ding uh; sih a-ut ding ua, himahleh sihna in amau ataimangsan ding hi.
7Huan khaupete kilatdan sakol kidouna a pang dia bawl bang ahi ua; alutung uah dangka-eng lallukhu hileh kilawm a-om a, amai uh mihingte mai bang ahi. 8Numei sam bang sam anei ua, aha uh humpinelkai ha bang ahi. 9A-awm uah sik awmphawte bang anei ua; akhazap ging uh kidouna lam a sakol tampi tai dupdup, kidouna kangtalai tampi ging bang ahi. 10Huan aikam bang in meigu nei anei ua, mihingte kha nga sung hihnatna ding in amei uah thilhihtheihna anei uhi. 11Amaute'n kokhuk taw nei lou neitu angel atung ua kumpipa in anei uhi; ama min Hebru pau in Abaddon ahi a, Grik pau in Appolion ahi.
12Tunggikna masapen abeita a, ngai in, tunggikna nih tunung chiang in ahong tung lai ding hi.
13Huan angel gukna in amut a, Pathian ma a om dangka-eng maitam kii a kipan in aw ka za a; 14huai aw in angel gukna pengkul nei kiang ah, “Euphrates luipi lianpi a angel li hen a omte phel in,” achi hi. 15Huan mi mun thum a khen mun khat athahtheihna ding ua dak khat, ni khat, kha khat leh kum khat sung kisa a na om, angel lite phel in a-om uhi. 16Huan sakol tungtuang sepaih atamdan uh sing ngen mun singnih ahi chi a atamdan uh kigen ka za hi. 17Huchibang in kilakna in sakolte leh atung ua tuangte, mei bang a san, engdup leh kaat bang a eng, awmphaw neite ka mu hi; sakolte lu humpinelkai lu bang ahi ua; akam ua kipan in mei leh meikhu leh kaat asuakkhia hi. 18Huan akamsung ua kipan a hong pawtkhia huai hipi thum, mei, meikhu leh kaat in mihing mun thum a khen mun khat thah in a-om uhi. 19Huai sakolte thilhihtheihna akam uh leh amei ua om ahi a; amei uh gulpi mei toh akibang ua, lu leng anei ua, huaite in mi ahih na uhi.
20Huan midang huai gawtna a siloute akhut ua sepkhiakte ah akisik tuan kei ua; dawite, dangka-engte, milimte, dangka milimte, suang milimte leh sing milimte; mu theiloute, za thei lou leh tang theiloute be nawn lou ding in akisik tuan kei uhi. 21Huan atualthahna uh, ami bumna uh leh akingaihna khelhna uh leh aguktakna uh akisik tuan kei uhi.
Currently Selected:
KILAKNA 9: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
