KILAKNA 8
8
Chiamtehna Sagihna
1Chiamtehna sagihna aphel lai in dakkal kimkhat sung van adai sipsip hi. 2Huchi in Pathian ma a angel sagih dinghte ka mu a, amaute kiang ah pengkul sagih piak in a-om hi.
3Huan angel dang khat ahong pai a, gimnamtui halna dangka-eng bel tawi in, maitam kiang ah adingh hi, akiang ah gimnamtui tampi laltutphah ma a om dangka-eng maitam teng a misiangthou tengteng thumna toh hel ding in, piak in a-om hi. 4Huai gimnamtui khu leh misiangthoute thumna angel khut a kipan Pathian ma ah azamtou hi. 5Angel in gimnamtui halna dangka-eng bel ala a; huai maitam amei in ahihdim a, leitung ah apaikhia a; huan awgingte, van-gingte leh khophiate leh zinlingte ahong om hi.
Pengkulte
6Huan angel sagih pengkul sagih tawite mut ding in ahong kisa uhi.
7Angel masapen in amut a, sisan toh kihel gial leh mei ahong om hi, huaite leitung a paihkhiak in a-om ua; leitung mun thum a khen mun khat akangbei hi, huan sing mun thum a khen mun khat akangbei a; loupa hing tengteng akangbei hi.
8Huan angel nihna in amut a, tang lianpi mei a kang bang a kang hileh kilawm tuipi ah paihkhiak in ahong om a; tuipi mun thum a khen mun khat sisan asuak hi. 9Huai tuipi a thil hingte hinna neite mun thum a khen mun khat asi ua; long mun thum a khen mun khat hihsiat in a-om hi.
10Huan angel thumna in amut a, van a kipan in aksi lianpi, meisel bang a kuang ahong kesuk a, lui mun thum a khen mun khat leh tui tuikhukte tung adeng hi. 11Huai aksi min Gamsai ahi; tui mun thum a khen mun khat gamsai asuak hi; tuite hihkhaat a a-om ziak un mi tampi asi uhi.
12Huan angel lina in amut a, huan ni mun thum a khen mun khat leh kha mun thum a khen mun khat leh aksi mun thum a khen mun khat hihsiat ahong hi a; huchi in avaknate uh mun thum a khen mun khat hihmial in a-om a; sun hun seh thum suah seh khat leh zan hun seh thum suah seh khat beisak in a-om hi.
13Huan ka etleh, angel khat van laizawl a leng in aw ngaihtak in, “Tunggik, tunggik, angel thum pengkul mut lai dingte leh huai ging hong om lai dingte ziak in leitung a omte tung agik,” achih ka za hi.
Currently Selected:
KILAKNA 8: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
