KILAKNA 10
10
Angel Hat Leh Laibu
1Huan meipi puansilh a kizem van a kipan angel hat dang hong paikhesuk ka mu hi; alutung ah sakhituihup a-om a, amai nisa mah abang a, akhete mei khuamte bang mai ahi. 2Akhut a laibuzial neuchik honsa atawi a; akhe taklam a tuipi tung sik in akhe veilam leitung ah anga hi. 3Humpinelkai humham bang in aw ngaihtak in akikou a; akikou khit in vanpiging sagihte'n a-aw uh asuah uhi. 4Huan vanpiging sagihte'n a-aw uh asuahtak un gelh ding in ka kisa hi; van a kipan aw in, “Vanpiging sagihte' thugen iim bikbek inla gelhkhe ke'n,” achih ka za hi.
5Huan tuipi tung leh leitung a angel dingh ka muh in van lam ah akhut taklam aliktou a; 6huchi in huai tangtawn a hing van leh leitung leh asung a om tengteng leh tuipi leh asung a om tengteng siampa min lou in azekai nawnlouhna ding chi in akichiam hi.
7Himahleh angel sagihna in amut ding pengkulpi agin chiang in, huai hun chiang in, “Pathian thuguk, asikha zawlneite kiang a agenkhiak tak hihkim in a-omta ding,” chi in.
8Van a kipan a ka aw zak in kei hon houpih a, “Kuan inla, tuipi tung leh leitung a angel dingh khut a laibuzial neuchik honsa va la in,” achih ka za nawn hi.
9Kei, angel kiang ah ka va hoh a, laibuzial neu hon pe ding in akiang ah ka va gen hi. Ama'n ka kiang ah, “La inla, ne zou vek in; huai in na gil hihkha in chin himahleh na kam ah khuaizu bang in akhum ding,” achi hi.
10Huan angel khut a kipan in laibuzial neuchik ka la a, ka ne zou vek a; ka kam ah khuaizu bang in akhum a; huan ka nekzohtak in ka gil hihkhat in ahong om hi. 11Huan ka kiang ah, “Mi tampite leh namte leh paute leh kumpipate kiang ah Pathian thusuak na genkholh nawn ngeingei ding ahi,” ahon chi hi.
Currently Selected:
KILAKNA 10: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
