KILAKNA 3
3
Sardis Saptuamte Kiang A Laikhak
1“Huan Sardis a saptuamte angel kiang ah hichibang in gelh in: Pathian Kha sagih leh aksi sagih neipa'n hiai thilte agen hi.
“Na thilhihte ka thei, si napi in hingmin na pu hi. 2Kiveng in, thil omsunte, si dia kisate, tungding nawn in; ka Pathian ma ah na thilhih zohsa set theih ka mu kei hi. 3Huaiziak in na muhdan leh na zakdan theigige in; kem inla, kisik in. Huchi a na kiven keileh guta bang in ka hong pai dia, bangchik hun in ahia nang ka hong phawn ding chih na thei kei hi. 4Himahleh Sardis ah min tawmchik apuante uh hihnit louh na nei hi; amaute puanngou silh a kei toh tonkhawm ding a kilawm him ahi uhi. 5Avualzoupa huchibang in puanngou in akizem dia, bangchi mah in hinna laibu a kipat amin ka hihmang kei ding, ka Pa ma leh a-angelte ma ah amin ka gum ding hi.
6“Saptuamte kiang a Kha thugen bil nei peuh in za hen achi, chi in.
Philadelphia Saptuamte Kiang A Laikhak
7“Philadelphia a saptuamte angel kiang ah hichibang in gelh in: Huai siangthoupa, dikpa leh David chabi neipa, amah hon kuamah in akhak theih louh leh amah khak kuamah in ahon theih louhpa'n hiai thilte agen hi.
8“Na thilhihte ka thei, ngai in, na ma ah kuamah khak theih louh kong honsa ka koih hi; thilhihtheihna neuchik na nei a, ka thu na kem a, ka min na pai kei hi. 9Ngai in, zuau lel gen a Judate hilou napi, ahi a kigen Setan sinagogte ka hon pia hi; ngai in, amau ka hon paisak dia, na khebul ah ka kunsak ding; nang ka hon itdan atheihna ding un. 10Ka dohzohna thu na kep ziak in, ze-et a na om chiang in ke'n leng ka hon kem ding, huai hun khovel pumpi tung a hong tung ding ahi; leitung a om tengteng leng ze-et ding in. 11Ka hong pai pah ding. Kuamah in na lallukhu alaklouhna ding in, na neih pen kem kinken in. 12Avualzoupa ka tempul ah khuam in ka pangsak dia, huai a kipan in apaikhe nawn kei ding, amah tung ah ka Pathian min leh ka Pathian khopi Jerusalem thak, ka Pathian a kipan van a hong paikhesuk min leh keimah min thak ka gelh ding hi.
13“Saptuamte kiang a Kha thugen bil nei peuh in za hen achi,” chi in.
Laodisia Saptuamte Kiang A Laikhak
14“Huan Laodisia a saptuamte angel kiang ah hichibang in gelh in: Theihpihpa ginom leh dik, Pathian thilsiam bul Amen in hiai thilte agen hi.
15“Na thilhihte ka thei, lum lah lum lou, vot lah vot lou in na om a; na lumleh lum inla na votleh vot vanglak in! 16Lum lah lum lou, vot lah vot lou a na om pelhpulh ziak in, ka kam a kipan in ka hon sekhe ding hi. 17Migenthei nuamsa lou, zawng, mitdel leh vuaktang na hih lam kithei lou a, ‘ka hausa, hauhsaknate ka neita, bangmah ka kitasam kei,’ na chih ziak in. 18Kei a kipan in dangka-eng mei a hihsiangthousa lei ding in ka hon thuhilh ahi, na hong hauhsak theihna ding in; puanngoute na hon silh a, na vuaktang zumhuaina adawklouhna ding in; huan na muhtheihna ding in na mit a nuh ding mitlou lei in. 19Ka itte ka thuhilh in ka sawi a; huaiziak in phatuamngai inla, kisik in. 20Ngai in kongkhak a dingh in ka kiu hi; mi kuapeuh in ka aw azak a kong ahonleh akiang ah ka lut dia amah toh nitak an ka ne dia, ama'n leng kei toh ane ding hi. 21Avualzoupa ka laltutphah tung ah ka kiang ah ka tusak ding, kei leng ka vualzou a, laltutphah tung a ka Pa toh ka tut bang in.
22“Saptuamte kiang a Kha thugen bil nei peuh in za hen achi,” chi in achi hi.
Currently Selected:
KILAKNA 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
