KILAKNA 4
4
Van Muhna
1Hiai thilte nung a ka etleh, ngai in, van ah kongkhak akihong a; ka aw zak masakpen pengkul aw ging bang in kei ahon houpih hi, “Hiai ah hong paitou in, huan tunung chiang a thil hong om dingte ka hon musak ding,” achi hi. 2Thakhat in Kha in ka om pah ngal a; ngai in, van ah laltutphah ahong kitungta a, laltutphah tung ah mi khat atu hi. 3Huai mi jasper leh karnelia suang bang in akimu a; huai laltutphah kimvel ah sakhituihup, emerald suang bang mai a kimu in azam hi. 4Huan huai laltutphah kimvel ah laltutphah dang sawmnih-le-li a-om a; huai laltutphahte tung ah upa sawmnih-le-li, puanngou a kizem a tu ka mu a, amaute'n dangka-eng lallukhu akhu chiat uhi. 5Huai laltutphah a kipan in khophiate, awte leh vanpigingte ahong suakkhia hi. Huan mei khawnvak sagih, laltutphah ma ah akuang a, huaite Pathian Kha sagihte ahi uhi. 6Huai laltutphah ma ah kristal bang a siang limlang tuipi a-om hi. Huai laltutphah kimvel ah thil hing nunglam leh malam mit a dim a-om uhi. 7Thil hing khatna humpinelkai bang ahi a, thil hing nihna bawngnou bang ahi a, thil hing thumna in mihing mai bang anei hi, thil hing lina muvanlai leng lai bang ahi. 8Huai thil hing lite'n kha guk anei chiat ua, akimvel leh asunglam mit ngen a dim ahi a; amaute'n sun leh zan khawl lou in:
“Siangthou, Siangthou, Siangthou,
Toupa Pathian,
Bangkim hihthei,
omsa leh omlel leh hong om ding,” achi uhi.
9Huan huai amah laltutphah tung a tupa leh huai amah tangtawn tangtawn a hingpa kiang a thil hingte'n, thupina leh zahhuaina leh kipahna thu apiak chiang un, 10amah laltutphah tung a tupa ma ah upa sawmnih-le-lite abokkhup uhi, huai laltutphah ma a alallukhute uh koih in, amah tangtawn tangtawn a hingpa abia uhi.
11“Nang ka Toupa leh ka
Pathian uh,
thupina, zahhuaina,
thilhihtheihna mu tak na hi;
thil tengteng nang na siam a,
nang thu ziak a om leh siam ahi uhi,” achi uhi.
Currently Selected:
KILAKNA 4: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
