KILAKNA 2
2
Ephesa Saptuamte Kiang A Laikhak
1“Ephesa saptuamte angel kiang ah hichibang in gelh in: Akhut taklam a aksi sagih tawi dangka-eng khawnvak koihna sagih lai a vialvakpa'n hiai thilte agen hi.
2“Na thilhihte, na sepgimdan leh na kuhkaldan, migiloute na ngaihmohdan leh hiloupi a amau sawltak kichite na ze-et a, amaute zuauthei ahi uh chih na muhkhiakdan ka thei hi. 3Huan thuakzohna na nei a, ka min ziak in na thuak teitei a, huchi in leng na bah kei hi. 4Himahleh na hon itna masapen na tawpsan thu ah ka hon dem hi. 5Huaiziak in na pukna laitak theigige inla, kisik in, na thilhih masapente hih nawn in; huchi lou in zaw na kiang ah ka hong pai dia, na kisik keileh a-omna a kipan in na khawnvak koihna ka suan ding hi. 6Himahleh hiai thu ah na hoih, Nikol pawlte thilhihte na hua a, ke'n leng huaite ka hua hi.
7“Saptuamte kiang a Kha thugen bil nei peuh in za hen. Avualzoupa kiang ah Pathian Paradis a om, anek ding in hinna sing ka pe ding achi,” chi in.
Smarna Saptuamte Kiang A Laikhak
8“Huan Smarna a saptuamte angel kiang ah hichibang in gelh in: Amasapen leh ananungpen, huai si a hing nawnta in hiai thilte agen hi.
9“Na thilhihte, na gimthuakdan leh na zawndan, himahleh na hau hi, Judate hilou napi, ahi a kigen Setan sinagogte Pathian gensiatna ka thei hi. 10Na thuak pah ding thilte kihta ke'n; ngai in, ze-et a na omtheihna ding un diabol in na lak ua akhente suangkul ah ahon khum pah ding; ni sawm sung gimthuakna na nei ding uhi. Sihpha in ginom in om in, huchi in hinna lallukhu ka hon pe ding hi.
11“Saptuamte kiang a Kha thugen bil nei peuh in za hen. Avualzoupa sih nihna hihnat in a-om kei ding achi,” chi in.
Pergamos Saptuamte Kiang A Laikhak
12“Huan Pergamom a saptuamte angel kiang ah hichibang in gelh in: Namsau hiamtak hiamtuah nei in hiai thilte agen hi.
13“Na tenna leh Setan laltutphah omna leng ka thei; ka min kiptak in na lenden a, Setan tenna mun a ka palai ginom, Antipas thah a a-om lai in leng na ginna na tawpsan tuan kei hi. 14Himahleh demna zek ka hon nei, huai lai a mi khenkhat Balaam sinsakna zuite na ompih ziak in, Israel suante ma a kipukna koih ding leh milimte kiang a kithoihna thilte ne ding leh kingaihna khelhna hih ding in ama'n tuh Balak athuhilh hi. 15Huchibang mah in Nikol pawlte sinsakna zui, mi khenkhat mah na ompih hi. 16Huaiziak in kisik in; huchi lou in zaw na kiang ah ka hong pai pah dia, amau ka kam a namsau in ka dou ding hi.
17“Saptuamte kiang a Kha thugen bil nei peuh in za hen. Avualzoupa kiang ah manna selguk ka pe ding, huan suangpek ka pe dia, huai suang tung ah min thak, aneipa lou ngal kuamah in atheih louh a kigelh achi,” chi in.
Thiatira Saptuamte Kiang A Laikhak
18“Huan Thiatira a saptuamte angel kiang ah hichibang in gelh in: Pathian Tapa, meikuang bang mit nei a, sumsan nawttet bang khe neipa'n, hiai thilte agen hi. 19Na thilhihte leh na itna leh na ginna leh na nasepna leh na thuakzohna ka thei hi, amasapen sang in na thilhih nanungte atamzaw hi. 20Himahleh hiai thu ah demna ka hon nei hi, huai numei Jezebel, zawlnei kichinu khawk na sak louh ziak in; ama'n ka sikhate kingaihna khelhna hih ding leh milimte kiang a kithoihna thilte ne ding a khem in ahilh hi. 21Huchi in amah akisikna ding in hun ka pia hi; huan amingaihna khelhna ah akisik tuan kei hi. 22Ngai in, amah damlou lupna ah ka pai ding a, athilhihte akisik tuan keileh amah angkawm teng leng gimthuakna thupi ah ka pai ding hi. 23Huan hipi in atate ka that dia; saptuamte tengteng in lungsim kiheinate leh lungtang theipa kei ka hi chih athei ding uh; na thilhihte bangbang un na lak ua mi tengteng ka pe ding hi.
24“Himahleh, nou, Thiatira a om midangte hiai thuhilh nei lou a, ‘Setan thil thukte’ thei lou tengteng kiang ah tunggikna dang na tung uah ka hon behlap kei ding, ka chi hi. 25Himahleh ka hong mateng na neih pen uh lenkip un. 26Huan avualzoupa leh atawp pha a ka nnate kempa kiang ah, namte tung a thuneihna ka pe ding hi; 27ama'n sikchiang in amau tung ah vai ahawm ding a, leibel bang in amaute akhentam ding hi, hiai thuneihna ka Pa a pan ka muh ahi. 28Huan amah zingsol aksi ka pe ding hi. 29Saptuamte kiang a Kha thugen bil nei peuh in za hen achi,” chi in.
Currently Selected:
KILAKNA 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
