KILAKNA 13
13
Gam Sahangte Muhna
1Tuipi piau a ka dinleh tuipi a kipan gamsa khat, kii sawm leh lu sagih nei, akiite tung a lallukhu sawm om chiat, alutungte a Pathian gensiatna om, hong paikhetou ka mu hi. 2Ka gamsa muh gialbem abang a, akhe vompi khe abang a, akam humpinelkai kam abang hi; dragon in athuneihna thupi leh alaltutphah leh athilhihtheihnate amah apia hi. 3Alute lak a khat sihpih khop hial dia liam hileh kilawm in ka mu hi; sihpih khop hial dia liam pen hihdam in a-om a; huchi in leitung pumpi in huai gamsa lamdang sa in azuita uhi. 4Dragon, gamsa kiang a athuneihna petu abia ua; huchi in hiai gamsa abiak kawm in, “Hiai gamsa bang kua a-om a, amah kidoupih thei kua om ahia?” achi uhi.
5Huan gamsa kiang ah thil thupite leh Pathian gensiatnate genna ding kam piak in a-om a, huan akiang ah thuneihna piak in a-om hi; kha sawmli-le-nih thilhihtheihna piak ahi. 6Pathian gensiatna ding, amin gense ding leh a-omna, van a tengte ngei gensia in akamkata hi. 7Huan dragon in gamsa kiang ah misiangthoute kidoupih ding leh amaute zou ding in phalna apia a; chi chih, pau chih leh nam chih tung a thuneihna leng apia hi. 8Huan khovel om tung a pan thahsa Belamnou' hinna laibu a amin tuangloute tengteng leh leitung a teng tengteng in amah abe ding uhi. 9“Kuapeuh zakna ding bil nei in, za hen!”
10Kuapeuh sal a pi dingte sal a pi in a-om ding; kuapeuh namsau a thah dingte namsau a thah in a-om ding. Hiai ah misiangthoute kuhkalna leh ginna nei ding a chial ahi uh.
11Huan gamsa dang khat leitung a kipat a hong pawtkhetou ka mu a; belamnou bang in kii nih anei a, dragon bang in thu agen hi. 12Gamsa masapen thuneihna tengteng amitmuh in azang hi. Leitung leh asung a teng tengteng gamsa masapen, si khop hial a liam hihdam a om, be ding in asawl hi. 13Huan mite mitmuh in van a kipan in leitung a mei kesuk thei khop in thillamdang pipi ahih hi. 14Huan gamsa sik leh amitmuh a thillamdang hihtheihna piak a a-omna in ama'n leitung a tengte akhem a; huai gamsa namsau a satliam leh dam nawn lim bawl ding in lei a tengte thu apia hi. 15Gamsa masa lim a nakna pe ding leh tua gamsa apau theihna ding in dragon in amah kiang ah thilhihtheihna apia a, huchi a gamsa lim be nuam lou tengteng leng athahsak theihna ding in. 16Mi tengteng, aneu leh alian, azawng ahau, sikha leh sikha lou, akhut taklam uh hiam, atal uh hiam ah chiamtehna piak in a-om chiat uhi; 17huchi a kuamah in huai chiamtehna hiam, gamsa min hiam, ahihkeileh amin nambat neiloute'n lei thei lou hiam, zuak thei lou a a-omna ding in.
18Hiai ah pilna a-om hi. Kuapeuh theihsiamna nei in, gamsa nambat sutkhia hen; huai lah mihing nambat ahi ngal a; huan ama nambat tuh zaguk sawmguk-le-guk ahi.
Currently Selected:
KILAKNA 13: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
