KILAKNA 12
12
Numei Leh Dragon Muhna
1Van ah chiamtehna thupi leh lamdangtak; numei khat ni a kizem, akhenuai a khapi sikden leh alutung a lallukhu aksi sawm-le-nih khu hong kimu hi. 2Ama'n nau apai a, nauvei leh suakkhe ding natna in akapkhia hi.
3Huan van ah chiamtehna dang khat ahong kilang a; ngai in, dragon san lianpi, lu sagih leh kii sawm nei, alutung a lallukhu sagih khu hong kilang hi. 4Amei in van a aksite mun thum a khen mun khat akaikhia a, leitung ah apaikhia a; dragon in huai numei nau nei ding a kisa, aneih chiang a anau nek zoh tum in ama ah adingh hi. 5Ta pasal naupang, sikchiang a nam tengteng tung a vaihawm ding anei a; atapa pen Pathian leh alaltutphah ah laktouh in a-om a, 6numei pen gamdai ah, Pathian in amah a dia amun bawlsak ah, huai ah ni sangkhat zanih-le-sawmguk khoi a om ding in atai hi.
Van Kidouna
7Huan van ah kidouna a-om a; Mikael leh a-angelte dragon toh kidou ding in akuankhia ua; dragon leh a-angelte'n leng adouthuk uhi. 8Huan azou kei ua, van ah amun himhim uh muh in a-omta kei hi. 9Dragon lian, gulpi tek, diabol leh Setan chih a ompa, khovel pumpi khempa leh amah nasem angelte toh van a kipan paihkhiaksuk in a-om uhi.
10Huan van ah aw ngaihtak mai ka za hi, “Tu'n ah i Pathian hotdamna ahong tungta, thilhihtheihna leh Khrist thuneihna; i unaute hekpa, i Pathian ma a sun leh zan a amau hekpa, paihkhiaksuk a a-om ziak in. 11Belamnou sisan ziak leh atheihpih uh thu ziak in amah tung ah avualzouta ua; sih tanpha in leng ahinna uh a-it kei uhi. 12Huaiziak in kipak un, aw van leh nou asung a tengte, leitung leh tuipi a ding in atung uh agik; diabol in hun tomchik phet anei chih akitheih ziak in, aheh mahmah a na kiang uah ahong paisuk hi,” chi in.
13Leitung a dragon paihkhiak ahita chih akitheihtak in, huai numei nau pasal neinu agawt hi. 14Himahleh huai numei kiang ah muvanlai thupitak kha nih piak in a-om a, gulpi mai a kipan gamdai mun a alenlut theihna ding in, huai ah hun khat sung leh hunte leh hun kimkhat sung vak in a-om hi. 15Gulpi in akam a kipan in tuipi bang tui luang a numei ataihmangsak theihna ding in numei nung ah asekhia hi. 16Lei in numei apanpih a, lei in akam aka a, dragon in akam a kipan a atui siatkhiak ana valhzohsak vekta hi. 17Numei tung ah dragon aheh mahmah a, asuan omsun, Pathian thupiak zuite leh Jesu thu theihpihte kidoupih ding in akuankhia hi. 18Huan tuipiau ah dragon adingh hi.
Currently Selected:
KILAKNA 12: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
