KILAKNA 14
14
Belamnou Leh Mipi Nuaikhat Singli-le-sangli muhna
1Huai nung in ka etleh ngai in, Zion tang tung a Belamnou dingh ka mu a, akiang ah mipi nuaikhat singli-le-sangli, atal ua a Pa min kigelh chiatte toh adingkhawm uhi. 2Tui tampi leh vanpiging bang a ging van a kipan in aw ka za a; ka aw zak gosem tumte'n agosem uh atumging uh abang a; 3laltutphah leh thil hing lite ma leh upate ma ah la thak hileh kilawm khat asa ua; leitung a kipat a huai leikhiaksate, nuaikhat singli-le-sanglite lou ngal kuamah in huai la atheithei kei uhi. 4Hiaite numei lak a kihihninloute ahi ua; nungak siangthou bang ahi uhi. Hiaite apaina lamlam ua Belamnou zuite ahi uhi. Pathian a ding leh Belamnou a ding a gah masapen hi ding a mite lak a kipan a leisate ahi uhi. 5Huan akam uah zuau a-om kei a; amaute lah Pathian laltutphah ma ah gensiatbei ahi ngal ua.
Angel Thum Muhna
6Huan angel dang van laizawl a leng ka mu a, ama'n tangtawn tanchinhoih, leitung a tengte kiang leh nam chih leh chi chih leh pau chih leh michihte kiang a genkhiak ding anei hi. 7Aw ngaihtak in, “Pathian kihta unla, amah thupina pia un; avaihawmna hun ahong tungta ngal a; van leh lei leh tuipi leh tuikhukte siampa amah bia un,” achi hi.
8Huan angel nihna in ahon zui a, “Pukta, pukta Babulon kho thupi, nam tengteng a mingaihhatna, hehna uain dawnsaknu,” achi hi.
9Angel thumna in amau ahon zui a, aw ngaihtak in, “Kuapeuh gamsa leh alim bia, atal hiam akhut hiam a chiamtehna neite'n 10Pathian thangpaihna uain adawn ding ua, huai uain thangpaihna nou, bangmah toh hel louh hial a bawl ahi; angel siangthoute leh Belamnou muh in amah mei leh kaat in hihnat in om in teh. 11Huan ahihnatna meikhu uh tangtawn tangtawn in azamtou dia; huai gamsa leh alim bete leh kuapeuh amin chiamtehna nei taphot in sun leh zan in tawlngakna anei kei ding uh,” achi hi.
12Hiai ah misiangthou, Pathian thupiakte leh Jesu ginna zuite kuhkalna nei ding a chialna a-om hi.
13Huan van a kipan aw in hichibang in, “Gelh in, tua kipan in misite, Toupa a site ahampha uh,” Kha in, “Ahi, asepgimna uh akhawlsanta ding ua, athilhihte un hon zui ding ahih ziak in,” achih uh ka za hi.
Leitung Buh Lak Hun
14Huan ka etleh ngai in, meipi ngou ka mu a; huai mei tung ah mi khat Mihing Tapa toh kibang, alu a dangka-eng lallukhu khu, akhut a kawite hiamtak tawi ka mu hi. 15Angel dang tempul a kipan ahong paikhia a, meipi tung a tupa kiang ah ngaihtak in, “Na kawite lik inla, at in; at hun atungta; leitung buh amingawpta,” chi in akikou hi. 16Huai mei tung a tupa'n leitung ah akawite alik a; leitung at in a-omta hi.
17Huan van a om tempul a kipan in angel dang ahong paikhia a, ama'n leng kawite hiamtak atawi hi. 18Huan meikuang tung a thilhihtheihna nei, angel dang maitam ma a kipan in ahong paikhia a; ama'n aw ngaihtak in, huai kawite tawipa sam in, “Na kawite hiamtak lik inla, leitung a grep gahbomte lakhawm in; grepte amin mahmahta hi,” achi hi. 19Huai angel in leitung ah akawite alik a, leitung a grep gahte alakhawm a, Pathian thangpaihna, uain sukna thupi, uain sukna ah apailut hi. 20Kho polam ah uain sukna chil in a-om a, uain sukna a kipan sakol kamkaihna tanpha louching sangkhat-le-zaguk pha in sisan aluangkhia hi.
Currently Selected:
KILAKNA 14: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
