KILAKNA 11
11
Theihpihtu Nihte
1Huan sialluang chiang bang tehna chiang khat piak in ka om a; angel in, “Thou inla, Pathian tempul leh maitam leh huai a bete teh in; 2tempul huangsung polam ahihleh nusia inla, teh ke'n; Zentelte kiang a piaksa ahih tak ziak in; huan kho siangthou akhenuai un kha sawmli-le-nih sung asikden ding uhi. 3Huan ka theihpihtu nihte kiang ah thilhihtheihna ka pe dia, amau sai-ip puan silh in ni sangkhat zanih-le-sawmguk thu agenkhol ding uh achi hi.”
4Hiaite olive sing nihte leh khawnvak koihna nihte, leitung a Toupa ma a dinghte ahi uhi. 5Mi kuapeuh in amau suknat atup ualeh, akam ua kipan a mei hong suakkhia in amelmate akangtum vek dia; kuapeuh in amau hihnat atup ualeh huchibang a thah in a-om ding uhi. 6Hiai mite'n athugenkholh sung ua vuah azuklouhna ding in, van khaktheihna anei ua; huan a-ut hunhun ua sisan suaksak ding in tuite tung ah thu anei ua, leitung leng gawtna chiteng a gawt ding in thu anei uhi.
7Huan atheihpihna nasep uh azoh chiang un, kokhuk taw nei lou a kipan a hong pawtkhia huai gamsa in amau akidoupih ding a, amau azou dia, athat ding hi. 8Asiluang uh khopi thupi kongzing ah akisial a, huai khalam thu ah Sodom leh Aigupta kichi, kros a Toupa kilhlup a a-omna mah ahi. 9Mite leh chite leh paute leh namte lak a kipan mite aluang uh ni thum-le-akim a-en ua, aluang uh han a vui aphal kei uhi. 10Huchi in leitung a tengte amaute tung a kisial in akipak ua, kipahna abawl ua; thilpiakte akikhaktuah ua; hiai zawlnei nihte'n amau leitung a tengte athuakgimsak khit tak ziak un. 11Huan ni thum-le-akim nung in, Pathian a kipan in hinna hatna amau ah ahong lut a, akhe un adingh uhi; amau mu tengteng tung ah nakpi a launa ahong omta hi. 12Van a kipan in aw thupitak aza ua, “Hiai ah hong paitou un,” chi in. Huan amau meipi lak ah van ah apaitou uhi; amelmate un amau amu chiat uhi. 13Huai dak in zinling thupitak ahong om a, khopi mun sawm a khen mun khat achim hi. Huai zinling ah mi sangsagih thah in a-om ua; adangte'n alau ua, van a Pathian kiang ah thupina apia uhi.
14Tunggikna nihna abeita a; ngai in, tunggikna thumna ahong tung pah ding hi.
Pengkul Sagihte
15Huan angel sagihna in apengkul amut a; van ah aw thupitak in, “Khovel lalgam tuh i Toupa leh a Khrist a ahong hita hi; ama'n tangtawn in vai ahawm ding,” achi uhi. 16Upa sawmnih-le-li, laltutphah tung a Pathian ma a tute'n amai ua lei si in Pathian abia uhi.
17“Na tung ah ka kipak uhi,
Toupa Pathian
Bangkim hihthei, omlel leh omsa leh hong om ding;
na thilhihtheihna thupi na lak tak ziak in leh
vai na hawm tak ziak in,
18Namte aheh ua,
tu in nang thangpaihna ni ahong tung hi,
misite vai na hawmsak hun leh na sikha zawlneite leh misiangthoute kiang leh
na min kihtate milian leh mineute kiang a kipahman
na piakna hun leh leitung hihsete hihsiat a a-om sam
hun uh ahong tungta hi,” achi uhi.
19Huan van a om Pathian tempul hon in a-om a; atempul sung ah thukhun bawm ahong kimu hi; huchi in khophiate, awte, van-gingte, zinlingte leh gial thupitak in azui ngal hi.
Currently Selected:
KILAKNA 11: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
