MATTHAI 5

Jesu Tang Tung Thugente

(Luk 5.1—7.29)

1Huchi in mipite amuh in tang a paitou in atu a, akiang ah anungzuite hong pai uhi. 2Huan thu agen a, amaute thu ahilh hi.

Kipahna Dik

(Luk 6.20-23)

3“Lungsim a gentheite ahampha uh,

van-gam amaute a ahi ngal a.

4Lungkhamte ahampha uh,

khamuan a om ding ahi ngal ua.

5Thunuailutte ahampha uh,

leigou luah ding ahi ngal ua.

6Diktatna lunggulh a gilkial leh dangtakte ahampha uh,

tai ding ahi ngal ua.

7Zahngaitheite ahampha uh,

zahngaihna mu ding ahi ngal ua.

8Lungsim a siangthoute ahampha uh,

Pathian mu ding ahi ngal ua.

9Lemna bawlte ahampha uh,

Pathian tate chih ding ahi ngal ua.

10Diktatna ziak a sawina

thuakte ahampha uh,

van-gam amau a ahi ngal a.

11“Mi'n keimah ziak a ahon tai ua, ahon sawi ua, zuau a gilou chiteng a hon hek hun chiang un, na hampha uhi. 12Kipak unla, nakpitak in nuam un, van ah na kipahman uh athupi ngal a; huchi mah bang in na ma ua zawlnei omte leng ana sawi zel uhi.

Chi Leh Vak Etsakna

(Mar 9.50; Luk 14.34-35)

13“Lei chi na hi uh, himahleh chi peng taleh, bang in ahia ahih al nawn ding? Paihkhiak a mihingte chilgawp ding louh ngal, bangmah ding in aphatuam kei hi.

14“Khovel vak na hi uh. Mual tung a khopi om selguk theih ahi kei. 15Mi'n khawnvak de in loh nuai ah akoih ngei kei ua, akoihna ah akoih zaw uhi. Huchi in insung a om tengteng atanvak hi. 16Huchi mah bang in, na vak uh mite mitmuh ding in vak hen, huchi in na thil hoih hihte uh amu ding ua, na Pa uh van a om apahtawi thei ding uhi.

Dan Leh Zawlneite Thu

17“Dan hiam zawlneite thu hihmang ding a hong pai in hon ngaihtuah kei un; hihmang ding a hong pai ka hi kei a, hihtangtung ding a hong pai ka hi zaw hi. 18Chihtaktak in ka hon hilh ahi, lei leh van aman ma, avek a atunkim masiah uh dan thu a sutvom neuchik hiam, thaivom neuchik hiam, khat leng amang kei hial ding. 19Huchi in kuapeuh hiai thupiak neupente lak a khat bohsia a, huai zui dia mite thuhilh peuhmah, van-gam ah mineupen akichi ding; himahleh kuapeuh zui a thuhilh behlapte, van-gam ah milian akichi ding hi. 20Na diktatna un laigelhmite leh Pharisaite diktatna akhup kei in zaw van-gam ah na lut kei hial ding uh chih ka hon hilh ahi.

Hehna Leh Thangpaihna

(Luk 12.57-59)

21“Nidanglai a mite kiang ah, ‘Tual na that ding ahi kei,’ kichi leh, ‘Kuapeuh tualthat vaihawmna a ding in lauhuai in a-om ding,’ kichi na zata uh. 22Ke'n zaw, kuapeuh a-unau tung a heh vaihawmna a ding in lauhthawnhuaitak in a-om ding. Kuapeuh a-unau selphou vaihawmte hawmsak a om lauhthawnhuaitak in a-om ding; ‘Nang mihai’ chi kuapeuh Gehenna mei a paih lauhthawnhuaitak in a-om ding uh, chih ka hon hilh ahi. 23Huaiziak in maitam a na thilpiak na lat lai a na unau in na tung ah lung hihlouhna anei chih na theihkhiakleh, 24huai maitam ma a na thilpiak nusia in pai inla, na unau kilempih in, huai zoh in na thilpiak lan in. 25Na langpa toh vaihawmna inn zuan a lampi a na paikhawm lai un kilempih in, huchi lou in zaw na langpa'n thukhenmi khut ah hon pe dia, thukhenmi'n mimanpa kiang ah hon pe dia; suangkul ah hon khum kha ding hi. 26Chihtaktak in ka hon hilh ahi, paihsa san khat nangawn na piak kim masiah huai a kipan in na pawtkhe kei hial ding hi.

Angkawm Thu A Sinsakna

27“Nidanglai mite'n ‘Ang na kawm ding ahi kei’ achih uh na zata uhi. 28Himahleh ke'n zaw kuapeuh etlahna lungsim toh numei en in, alungsim in angkawm ahi chih ka hon hilh ahi. 29Na mit taklam in hon hihpukleh, khelkhia inla paihmang in; na pumpi Gehenna a pai sang in na pumpi a hiang khat manthat nang a ding in ahoihzaw hi. 30Na khut taklam in hon hihpukleh, tankhia inla paihmang in; na pumpi a Gehenna a pai sang in, na pumpi a hiang khat manthat nang a ding in ahoihzaw hi.

Kimak Thu A Thuhilhna

(Mat 19.9; Mar 10.11-12; Luk 16.18)

31“Kuapeuh zi ma in kimakna lai akiang ah pia heh, leng akichi. 32Ke'n zaw kuapeuh kingaihna ziak hilou a zi ma in amah angkawmsak ahi, kuapeuh maksa nei nawn angkawm ahi chih ka hon hilh ahi.

Kichiam Thu A Thuhilhna

33“Nidanglai in mite kiang ah, ‘Zuau in kichiam ke'nla, Toupa kiang ah na kichiamnate tangtun zaw in,’ akichi chih leng na zata uhi. 34Ke'n zaw ka hon hilh ahi, chiam himhim kichiam kei un; van lou in kichiam kei un, huai Pathian laltutphah ahi ngal a; lei lou in kichiam sam kei un, huai akhe ngakna ahi. 35Jerusalem lou in kichiam sam kei un, huai Kumpipa thupitak khopi ahi. 36Na lutang lou in na kichiam ding ahi sam kei, samzang khat lel leng na hihngou in, na hihvom thei ngal kei uhi. 37Na thugen uh, ‘Ahi, hi henla,’ ‘Hilou, hilou,’ hi vanglak hen, akan-aval zaw gitlouhna asuak ahi.

Phulakna Thu A Thuhilhna

(Luk 6.29-30)

38“Mit sik in mit, ha sik in ha, akichi chih na zata uhi. 39Ke'n zaw ka hon hilh ahi. Migilou nang kei un; na taklam biang bengte, alehlam leng doh zaw un. 40Kuapeuh in na lak ah thusia bawl ut in, na puanak lak atupleh, na puanza leng lasak ngal in. 41Huan mel khat pai dia hon phut kiang ah mel nih pai in. 42Ahon ngen kiang ah pia inla, nang lak a leitawi nuam kiheisan ke'n.

Melmate Itna

(Luk 6.27-28; Luk 6.32-36)

43“Na vengte it inla, na melmate hua in, akichi chih na zata uhi. 44Ke'n zaw ka hon hilh ahi, na melmate uh it unla, hon sawite thumsak un. 45Na Pa uh van a om tate na hihtheihna ding un. Ama'n migiloute leh mihoihte tung ah anisa asuaksak a, midiktatte leh diktatloute tung ah leng vuah azusak hi. 46Nou hon itte kia na it un, kipahman bang ahia na muh ding uh? Siahkhon mite'n leng huchibang in ahih sam kei ua hia? 47Huan na unaute kia uh chibai na buk un bang na hihtam tuan ua ahia? Zentelte'n leng hichibang in ahih sam kei ua hia? 48Huchi in na Pa uh van a om ahoihkim sipsip bang in na hoihkim sipsip ding uh ahi.”

Currently Selected:

MATTHAI 5: PAITBSI

Highlight

Copy