MATTHAI 4

Jesu Khemna

(Mar 1.12-13; Luk 4.1-13)

1Huai khit in diabol khem a om ding in gamdai ah Kha pilut in Jesu a-omta hi. 2Huan ni sawmli leh zan sawmli an angolh nung in agil hong kialta hi. 3Khempa ahong pai a, akiang ah, “Pathian Tapa na hihleh hiai suangte tanghou suak ding in thu pia in,” achi hi.

4Himahleh ama'n, “Tanghou kia in mihing ahing kei ding, Pathian kam a thupawtte in ahing zaw ding, chih gelh ahi ngal a,” chi in adawng hi.

5Huai zoh in, diabol in kho siangthou ah apilut a, Pathian tempul tungzum ah akoih a, 6akiang ah,

“Pathian Tapa na hihleh kikesak in;

‘Na tungthu ah a-angelte thu ape ding a,

akhut un ahon dom ding uh,

huchi lou in zaw na khe in suang na sui kha ding,’

chih gelh ahi ngal a,” achi hi.

7Jesu'n akiang ah, “Toupa na Pathian ze-et ke'n chih gelh ahi zaw,” achi hi. 8Huan diabol in tang sangtak ah api nawn a, khovel gam tengteng leh athupina a-ensak hi. 9Huan akiang ah, “Bokkhup in hon bia in, hiai tengteng ka hon pe ding,” achi hi.

10Huaitak in Jesu'n akiang ah, “Setan, hiai a kipan paimang in, Toupa na Pathian na biak ding, ama nna kia na sep ding ahi chih gelh ahi ngal a,” achi hi. 11Huai zoh in diabol in apaisanta a, ngai in, angelte'n amah nna ahong sepsak uhi.

Galili Gam A Jesu Nasep Patna

(Mar 1.14-15; Luk 4.14-15)

12Huan Johan aman uh chih Jesu'n azak phet in, Galili ah akihemkhia hi. 13Nazaret khua apaisan a, Kapernaum ah a-om nilouh a, huai tuh Zebulun leh Naphtali uk, tuipi gei a om ahi a, 14zawlnei Isai kam a thugenkholh tangtunna ding ahi:

15“Dil lam a, Jordan gal a,

Zebulun gam leh Naphtali gam,

Zentelte Galili gam a,

16mial nuai a tute'n vak thupi amu ua,

sihna lim nuai a tute tung ah vak ahong suakta,”

chi a agen hong tuntheihna ding in.

17Huai hun a kipan in Jesu'n, “Kisik un! Van lalgam anaita,” chi in thu agenta hi.

Ngamanmi Lite Sapna

(Mar 1.16-20; Luk 5.1-11)

18Huan Galili Tuipi gei a avak kawm in, unau nih Simon Peter kichi a-unau Andru toh, tuipi ah len pai lai amu a; amaute ngamanmi ahi him uhi. 19Ama'n akiang uah, “Hon zui un, mihing man ding in ka hon bawl ding,” achi hi. 20Huchi in alente uh nuse pah in amah azuita uhi.

21Huan huai a kipan apai zel a unau dang nih, Zebedai tapa Jakob leh a-unau Johan, apa uh Zebedai kiang a long a alente uh bawlpha in amu a; amaute asam hi. 22Huchi in long leh apa uh nuse pah in amah azuita uhi.

Jesu Thuhilh Leh Nasepna

(Luk 6.7-19)

23Jesu'n asinagogte ua thu hilh in, lalgam tanchinhoih gen in, mite natna chiteng leh hatlouhna chiteng hihdam in Galili gam tengteng ah apai vialvial hi. 24Siria gam tengteng ah atanchin athangta a, akiang ah mi damlou tengteng damlouhna leh natna chih thuakte, dawimatte, kaih veite leh zawte ahon pi ua, ana hihdam hi. 25Galili gam a kipan, Dekapolis a kipan, Jerusalem leh Judia a kipan leh Jordan gal a kipan in mipi tampitak in amah azui uhi.

Currently Selected:

MATTHAI 4: PAITBSI

Highlight

Copy