MATTHAI 6
6
Aguk A Thilpiak
1“Na diktatna nasepte uh mite ma a, mihing mitmuh ding a hih lou ding in pilvang un; huchi lou in zaw na Pa uh van a om kiang ah kipahman na nei kei ding uh.
2“Huchi in mi kiang a thilpiak na piak in, milepchiahte'n mite phat alohtheihna ding ua sinagogte leh kongzing a ahih nak bang un na ma uah pengkul mut kei un. Chihtaktak in ka hon hilh ahi, amaute'n apahtakman uh angahta uh. 3Nang zaw mi kiang a thilpiak na piak in, na khut taklam in ahih na khut veilam in thei kei hen; 4na thilpiak aguk ahihtheihna ding in. Huchi in na Pa aguk a mupa'n pahtakman ahon pe ding hi.
Aguk A Thumna
5“Huan na thum chiang un milepchiahte bang in na hih ding uh ahi kei; mi'n amuhtheihna ding un, sinagogte leh kongzing kathuam laitak khawng ah dingh kawm a thum a-ut se uhi. Chihtaktak in ka hon hilh ahi, amaute'n apahtakman uh angahta uh. 6Nang zaw na thum chiang in, na dantan sunggil a lut in, na kongkhak khak inla, na Pa aguk a om kiang ah thum in. Huchi in na Pa aguk a mupa'n pahtakman ahon pe ding hi.
7“Huan na thum un, Zentelte bang in gentuan mawkmawk kei un; apau tam ziak ua zak a om ding akisa uhi. 8Huaiziak in amaute bang in om kei un, amah na nget ma ua na Pa un bangbang ahia na poimoh uh theigige ahi.”
Toupa Thumna
(Luk 11.2-4)
9Huchi in nou zaw hichibang in thum un:
“Ka Pa uh van a om,
na min kizahtak hen.
10Na gam hong tung hen.
Na deihlam van a akihih bang in,
lei ah leng kihih hen.
11Niteng ka nek khop uh
an hon pia in.
12Ka tung ua khialte ka ngaihdam bang un,
nang leng ka khelhna uh hon ngaidam in.
13Khemna ah hon pilut ke'nla,
gilou lak ah hon hu zaw in,
lalgam leh thilbawltheihna leh thupina
Tangtawn a nang a ahih ziak in, Amen,” chi in.
14“Mi atatleknate uh na ngaihdam uleh, na Pa uh van a om in leng hon ngaidam sam ding hi. 15Himahleh mite tatleknate na ngaihdam kei ngal un, na Pa un na tatleknate uh angaidam sam kei ding hi.
An Ngawl Thu A Thuhilhna
16“An na ngolh un leng, milepchiahte bang in nguimel pu kei un; amau zaw mite mitmuh a an ngawl a akilat theihna ding un, amel uh anguisak nak uhi. Chihtaktak in ka hon hilh ahi, apahtakman uh angahta uhi. 17Nou zaw, an na ngolh chiang un na lu uh sathau nilh unla, na mai uh phiat un. 18Huchi in na Pa uh aguk a om mitmuh lou ngal ah mihing mitmuh in an ngawl na bang kei ding ua; huchi in na Pa uh aguk a mupa'n pahtakman ahon pe ding hi.
Hauhna Dik
(Luk 12.33-34)
19“Lei a, leikha leh tui-ek in aneksiatna ah, gutate'n phenvang a agukna uah gou kikhol kei un. 20Van ah, leikha leh tui-ek in aneksiatlouhna ah, gutate'n aphen ua aguklouhna uah, gou kikhol zaw un. 21Na gou omna peuh uah na lungtang uh leng a-om ding hi.
Pumpi Khawnvak
(Luk 11.34-36)
22“Pumpi khawnvak mit ahi; huchi a na mit achimleh avek in na pumpi atansuak ding hi. 23Na mit asiatleh na pumpi avek in amial khin vek ding. Huchi in na sung a vak om pen mial hileh nak mial na tel in chia!
Lunghihmohna A Pathian Muanna
24“Kuamah in heutu nih nna asemkop thei kei; khat hua in khat a-it ding; ahihkeileh, khat gum in khat asimmoh ding. Pathian leh sum nna na semkop thei kei ding uh.
25“Huaiziak in ka hon hilh ahi. Bang ahia ka nek ding, bang ahia ka dawn ding, chi in na hinna thu uh leh; bang ahia ka silh ding, bang ahia ka ten ding, chi in na pumpi thu uh lunghimoh kei un. Nek ding sang in hinna athupizaw kei a hia? Silh-leten sang in pumpi leng athupizaw kei a hia? 26Tungleng vasate en un; buh atuh kei ua, a-at kei uh, buh inn ah leng aseklut sam kei uh. Himahleh na Pa uh van a om in amaute avak hi. Noute amau sang a nakpitak a manphazaw hilou na hi uh maw? 27Huan noute lak ah lunghihmoh ziak a kua'n ahia ama dunglam tong khat a hihsang thei tuan?
28“Huan silh-le-ten thu bang ding a lunghimoh na hi ua? Gamlak lili pak khandan hoihtak in ngaihtuah un; nna asem kei ua, khau leng akhek kei uh. 29Himahleh, ka hon hilh ahi, Solomon hial leng athupina tengteng a akizep in hiai lili pak khat bang in zep in a-om kei hi. 30Huchi in gamlak loupa, tuni a hing a, azing a thuk a khul mai ding bawn Pathian in huchi lawmlawm a azepleh, aw nou gintawmte, silh-le-ten ding hon pe tawk na lou ding hiam?
31“Huchi in bang ahia i nek ding, ahihkeileh bang ahia i dawn ding? Ahihkeileh bang silh in ahia i om ding chi in lunghimoh kei un. 32Zentelte'n huai tengteng azong uhi. Hiaite tengteng na poimoh uh chih na Pa uh van a om in theigige ahi. 33Agam leh ama diktatna zong masa un, huchi in hiaite tengteng ahon piak behlap ding hi.
34“Huchi in azing a ding lunghimoh kei un; azing in amah a ding akilunghimoh tawm ding ziak in. Ni khat a ding in ni khat buaina ahun lel hi.”
Currently Selected:
MATTHAI 6: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
