MATTHAI 3

Baptispa Johan Thugen

(Mar 1.1-8; Luk 3.1-18; Joh 1.19-28)

1Huchih lai in Baptispa Johan in, 2“Kisik un! Van-gam anaita,” chi in Judia gamdai ah thu gen in ahong pai hi. 3Amah ahi, zawlnei Isai in:

“Gamdai a mi kikou aw in,

Toupa lamlian sial unla,

alampite tangsak un,

achi,” chi a ana gen pen.

4Johan in sangawngsau mul puan asilh a, savun kawnggak agak a, a-an khaukhup leh khuaizu ahi. 5Huchih lai in Jerusalem khua, Judia gam tengteng, Jordan luidung kim tengteng akiang ah ahong paikhawm ua, 6akhelhna uh thupha tawi in, Jordan lui ah baptisma atang uhi.

7Himahleh Pharisaite leh Saddukaite tampi ama a baptisma tang ding a hong paite amuh in, akiang uah, “Nou gul suante! Thangpaihna hong tung ding taisan ding a kua'n hon thuhilh ahia? 8Huchi in kisikna toh kilawm gah hon suangkhia un. 9Abraham ka pu uh ahi, chi in kingaihtuah kei un, Pathian in hiai suangte Abraham suante in adingsak thei ka hon chi ahi. 10Tu a kipan in singbul teng ah heipi akoihta uh; huchi in sing chih gah hoih a gah lou peuhpeuh aphuk ua, mei ah apailut zel uhi. 11Ke'n zaw kisikna ding in tui in ka hon baptis a, himahleh, amah ka nung a hong pai kei sang in athupizaw a, akhedap tawitak leng ka hi kei, ama'n zaw Kha Siangthou leh mei in noute ahon baptis ding hi. 12Akhut in phazah atawi a, aphual azapsiang sipsip ding a, buhpang ah abuh asung ding, asi bel mei mit thei lou in ahalmang ding,” achi hi.

Jesu Baptisna

(Mar 1.9-11; Luk 3.21-22)

13Huchih lai in akiang a baptisma tang ding in Galili gam a kipan Jordan lui ah Johan kiang ah Jesu ahong pai hi. 14Johan in, “Nang kei na hon baptis kiphamohzaw hinapi, ka kiang ah na hong zosop ahi maw?” chi in akham hi. 15Himahleh Jesu'n akiang ah, “Tu in lemsa teitei in, hichibang a diktatna tengteng hihtangtun ei a ding in akilawm ngal a,” chi in adawng a, huchi in lem asata hi. 16Huan Jesu baptisma atantak in tui a kipan apawt pah a, ngai in, amah a ding in van ahong kihong a, Pathian Kha, vakhu bang a hong suk in, atung a hong tu amu hi. 17Huan ngai in, van a kipan aw in, “Hiai ka Tapa deihtak, ka kipahna mahmah ahi,” achi hi.

Currently Selected:

MATTHAI 3: PAITBSI

Highlight

Copy