MATTHAI 28

Jesu Thohnawnna

(Mar 16.1-10; Luk 23.1-12; Joh 20.1-10)

1Huan Sabbath ni abei in, ani sagih ni masapen ding a phalvak in, han en ding in Mari Magdalin leh Mari dang akuan uhi. 2Ngai dih, nakpitak in ziin ahong ling a; van a kipan Toupa angel ahong suk a, suang ahong khukkhia a, atung ah atuta hi. 3Amel omdan khophia bang ahi a, apuansilhte tuh vuk bang in angou hi; 4Amah akihtak ziak un veng mite aling ua, misi bang in a-om hial uhi.

5Angel in numeite ahoupih a, akiang uah, “Nou zaw lau kei un; akilhden uh Jesu zong na hi uh chih ka thei; 6hiai ah a-omta kei; agen bang ngei in athounawnta, alupna mun en un, achi hi. 7Pai meng unla, nungzuite kiang ah, ‘Misi lak a kipan athounawnta hi. Ngai dih uh, Galili gam ah na ma uah apai; huai ah amah na mu ding uh’ chi in hilh un. Ngai dih uh, ka hon hilhta ahi,” achi hi.

8Huan lau leh kipak mahmah kawm in, han a kipan apai mengmeng ua, anungzuite hilh ding in ataita uhi.

9Huan ngai dih, Jesu'n amaute atuak a, “Chibai aw,” achi hi. Huchi in amaute'n akhepek alen ua, abia uhi. 10Jesu'n akiang uah, “Lau kei unla, paita un, Galili gam a pai ding in ka unaute va hilh un; huai ah na hon mu ding uh, achi,” chi in.

Hankhuk Vengte Thugen

11Huan apai lai un vengmi sepaih khenkhat khopi ah ava lut ua, thil omdan tengteng siampu liante kiang ah ava hilh uhi. 12Upate toh akikhawm ua, akihou zoh un, sepaihte kiang ah dangka tampi apia ua, 13“Zan a ka ihmut kal un, anungzuite hong pai in, amah aguta uh, chi unla, 14gam-ukpa'n huai ana zakleh amah leng i khem ding ua lunghimoh lou ding in i bawl na ke,” achi uhi. 15Huchi in dangka ala ua, ahilh bang un ahihta ua; huchi in tutan in huai thu Judate lak ah agenthang lai uhi.

Thounawn Jesu Leh Nagotna Thupi

(Mar 16.14-18; Luk 24.36-49; Joh 20.19-23; Nas 1.6-8)

16Himahleh Galili gam a Jesu'n tang a sehsak ah nungzui sawm-le-khatte ahoh uhi. 17Amah amuh un abia ua; khenkhat in aginglah uhi. 18Huchi in akiang uah Jesu ahong pai a, amau ahoupih a, “Lei leh van a thuneihna tengteng ka kiang a piak ahita. 19Huaiziak in kuan unla, nam chih a pan nungzuite bawl unla, Pa toh, Tapa toh, Kha Siangthou toh min in baptis unla, 20thu ka hon piak tengteng zui ding in thuhilh un. Ngai un, kei tangtawn in, khovel tawp pha in leng, na kiang uah ka om gige hi,” achi hi.

Currently Selected:

MATTHAI 28: PAITBSI

Highlight

Copy