MARKA 1
1
Baptispa Johan Leh Athupuak
(Mat 3.1-12; Luk 3.1-18; Joh 1.19-28)
1Pathian Tapa, Jesu Khrist tanchinhoih kipat tungna, 2zawlneite Isai laibu in,
“Ngai dih, na ma ah ka sawltak ka sawl a,
ama'n na lampi abawlkhol ding;
3gamdai a kikoupa aw in,
Toupa lamlian sial unla,
alampite hihtang un,” chi a gelh ahih bang in.
4Johan in gamdai ah abaptis a, khelhnate ngaihdamna ding a kisikna baptisma thu gen in, ahong pawt hi. 5Judia gam a mi tengteng leh Jerusalem a mi tengteng apawt ua, akiang ah apai ua, akhelhnate uh thupha tawi in Jordan lui ah, amaute abaptis zel hi.
6Johan sangawngsau mul puan in akivan a, akawng savun kawnggak in agak a, a-an khaukhup leh khuaizu ahi. 7“Ka nung ah kei sang a thupizaw ahong pailel ahi; kun a akhedap khau phel tak leng ka hi kei,” achi hi. 8“Ke'n tui in noute ka hon baptis a; ama'n ahihleh Kha Siangthou in ahi ahon baptis ding,” chi in agen hi.
Jesu Baptisna Leh Khemna
(Mat 3.13—4.11; Luk 3.21-22; 4.1-13)
9Huai nite in hichi ahong hi a, Galili gam a Nazaret a kipan Jesu ahong pai a, Jordan lui ah Johan in ana baptis hi. 10Tui a pan ahong pawttak in, van kihong a vakhu bang a atung a Kha hong kum amu hi. 11Huan van a kipan aw hong pawt in, “Nang ka Tapa deihtak na hi a, na tung ah ka kipak mahmah,” achi hi.
12Kha in amah gamdai ah asawl pah hi. 13Huchi in Setan khem in gamdai ah ni sawmli a-om a, gamsate lak ah a-om a; angelte'n a-nna asepsak uhi.
Jesu Nasep Patna Ngamanmi Li Sapna
(Mat 4.12-22; Luk 4.14-15; 5.1-11)
14Johan mat a a-om nung in, Pathian lalgam tanchinhoih gen in, Galili gam ah Jesu ahong pai hi. 15“Ahun ahong tungta a, Pathian lalgam ahong naita; kisik unla tanchinhoih gingta un,” chi in.
16Galili tuipi gei anawk lai in tuipi a Simon leh Simon unaupa Andru len pai a om amu a; amaute ngamanmi ahi him uhi. 17Jesu'n akiang uah, “Hon zui un, huchi in mihing man ding in ka hon bawl ding,” achi hi. 18Alen uh paisan in amah azui pah uhi.
19Sau lou apaileh Zebedai tapa Jakob leh a-unaupa Johan amu a, huaite len bawlpha in long ah a-om uhi. 20Huan ama'n amau asam pah a; apa uh Zebedai leh kilohmi agoihte uh toh long nusia in azuita uhi.
Dawi Nin Pai Jesu Hihdamna
(Luk 4.31-37)
21Huan Kapernaum ah ava lut ua; Sabbath ni in sinagog ah alut a, thu ahilh hi. 22Laigelhmite bang lou a, thuneitak a amau thu ahilh ziak in athuhilh lamdang asa mahmah uhi.
23Asinagog uah dawi nin paimi khat ana om a; ama'n; 24“Nazaret Jesu, kou leh nang bang ahia i kizolhna om? Kou hon hihmang dia hong pai na hi maw? Nang ka hon thei a, Pathian Mi Siangthou na hi,” chi in akikoukhia hi.
25Jesu'n atai a, “Dai inla, asung a kipan hong pawt in,” achi hi.
26Dawi nin in amah a-engbawl a ngaihtak a kikou in asung a kipan ahong pawtta hi. 27Huan avek un lamdang asa mahmah ua, huchi in “Hiai bang ahia le! Sinsakna thak ahi ve! Dawi ninte nangawn thuneitak in thu apia a, athu amang zel uh,” chi in akihou uhi.
28Huan Galili leh akim gam tengteng ah atanchin athangta hi.
Peter Zi Nu Leh Mi Tampi Hihdamna
(Mat 8.14-17; Luk 4.38-41)
29Huan sinagog a kipan apawt un, Jakob leh Johan toh Simon leh Andru inn ah alut uhi. 30Huan Simon sungnu khosik in achi ana a, ana lum a; huchi in a-omdan Jesu ahilh pah uhi. 31Huan Jesu'n akhut a len in, aphong a; huchi in khosik in anuseta a, a-nna uh asepsak hi.
32Huan nitaklam a nitum nung in, akiang ah damlou tengteng leh dawimatte ahon pi uhi. 33Akhomi tengteng kongkhak bul ah ahong omkhawm khiukheu uhi. 34Huan mi tampi natna chiteng a nate ahihdam a, dawi tampi adelhkhia a; dawite'n amah atheih ziak un apau uh aphal kei hi.
Galili Gam Nasepna
(Luk 4.42-44)
35Huan zingsang khovak ma tham a thou in apawt a, gamdai mun ah ahoh a, huai ah athum hi. 36Simon leh alawmte'n anung ah azui uhi. 37Amah ava muh un akiang ah, “Mi tengteng in ahon zong uh,” achi uhi.
38Ama'n akiang uah, “Maban khuate ah pai ni, huai a leng thu ka gentheihna ding in; huai mah ka hong pawtsan ahi,” achi hi.
39Huchi in thu hilh a dawite delhkhe kawm in Galili gam tengteng a asinagogte uah alut hi.
Phak Hihdamna
(Mat 8.1-4; Luk 5.12-16)
40Huan akiang ah phak ahong pai a, “Na utleh na hon hihsiangthou thei,” chi in ama ah khukdin in angen ngutngut hi.
41Ama'n ahehpih mahmah a, sawk in akhoih a, “Ka ut hi, na siangthouta in,” achi hi. 42Huchi in phakna in amah anuse pah a, ahong siangthouta hi. 43Jesu'n amah akham bikbek kawm in asawlkhe pah hi. 44“Kuamah kiang a bangmah gen lou ding in pilvang in; himahleh siampu kiang ah va kilak inla, na kisiansakna ding in Mosi thilsehte lan in, mite'n ahon theihchetna ding un,” achi hi.
45Himahleh amah apawt a, huai thu nakpitak a kikoupih in athangzakta hi; huchi in Jesu alangtang in khua ah alut thei nawnta kei a, gamdai mun ah a-om zawta a; huan mun teng a kipan mite akiang ah ahong pai uhi.
Currently Selected:
MARKA 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
