MATTHAI 27
27
Pilat Ma A Jesu Din Masakna
(Mar 15.1; Luk 23.1,2; Joh 18.28-32)
1Huan zingsang ahong hih in siampu liante leh vantang upate tengteng Jesu that ding in atungthu ah akihou uhi. 2Amah hen in api ua, gam-ukpa Pilat kiang ah api uhi.
Judas Iskariot Sihna
(Nas 1.18-19)
3Huan amansakpa Judas in Jesu siam louh tangsak uh ahi chih atheihtak in akisik a, siampu liante leh upate kiang ah dangka sawmthum ahon tawikik hi. 4“Midik sisan ka khot thil ka hihkhial,” achi hi. Amau, “Huai kou a ding in bang akhawk dia? Nang na lohloh kiloh in,” achihsan uhi. 5Ama'n huai dangka tempul ah apailut a, paimang in a-awklumta hi.
6Huan siampu liante'n huai dangka ala ua, “Hiai sumbawm a koih asiang kei, sisan man ahi,” achi uhi. 7Huchi in akihou ua, mikhualte vuina ding in belvelmi mun aleita uhi. 8Huaiziak in tutan in huai mun, “Sisan mun” achi uhi.
9Huan zawlnei Jeremiah in ana gen, “Amah man ding a Israel suante lak a kuate hiam in asak uh dangka sawmthum alata uh; 10Toupa'n hon hilh bang in belvelmi mun man ding in apia uh,” chih ahong tangtungta hi.
Pilat Mai Ah Jesu Adingh
(Mar 15.2-5; Luk 22.3-5; Joh 18.33-38)
11Huan gam-ukpa ma ah Jesu adingh hi. Gam-ukpa'n, “Judate' Kumpipa na hi hia?” chi in adong hi. Jesu'n akiang ah, “Hi e,” achi hi. 12Siampu liante leh upate'n ahek lai un bangmah in adawng kei hi.
13Huchi in Pilat in akiang ah, “Ahon hekna zouzai uh na za kei a hia?” achi hi. 14Ama'n kam khat lel in leng adawng kei hi; huchi in gam-ukpa'n lamdang asa mahmah hi.
Jesu Si Dia Thutanna
(Mar 15.6-15; Luk 23.13-25; Joh 18.39—19.16)
15Huan gam-ukpa'n ankuanglui ni in henta khat, adeihdeih uh, mipite a ding in apawtsak zel hi. 16Huai lai in henta minthang, Barabbas achih uh a-om hi. 17Huchi in ahong kikhop un, Pilat in akiang uah, “Kua zaw hon pawtsak leng na ut ua? Barabbas hia, Jesu Khrist kichi?” achi hi. 18Hazat ziak in amah amansak uh chih athei hi.
19Vaihawmna tutphah a atut lai in, azi in, “Hiai midik tung ah bangmah hih ke'n, tuni'n amah ziak in ka mang in thil tampi ka thuak hi,” chi in athukhak hi.
20Huan siampu liante leh upate'n, Barabbas nget a Jesu hihmanthat ding in mipite athuzoh uhi. 21Gam-ukpa'n amau ahoupih a, “Amau nihte akua zaw hon pawtsak leng chi na hi ua?” achi nawn hi.
22Amaute'n, “Barabbas,” achi uhi. Pilat in akiang uah, “Jesu Khrist kichi, bang ka chihta dia le?” achi hi. Avek un, “Amah kilhden in om hen,” achi uhi.
23Ama'n, “Bang ding in maw? Bang ahihkhial a ahia?” achi hi. Himahleh amau, “Kilhden in,” chi in akikou vengvung uhi.
24Huchi in Pilat in bangmah ahihtheita kei a, hong buai deuhdeuh zaw ding chih akitheih in, tui ala a, mipite ma ah akhut asil a, “Hiai midik sisan ah ka siang e; noumau na lohloh uh kiloh un,” achi hi.
25Huan mipi tengteng in, “Asisan zaw koumau tung ah leh ka tate uh tung ah om hen,” chi in adawng uhi.
26Huai khit in Barabbas apawtsak a; Jesu azep a, kilhden ding in apeta hi.
Sepaihte'n Jesu Soisa Uh
(Mar 15.16-20; Joh 19.2-3)
27Huai khit in, sepaihte'n gam-ukpa inpi ah Jesu apilut ua, apawl ua mi tengteng akiang ah hong kikhawm uhi. 28Apuante suahsak in, puan sandup asilhsak uhi. 29Linglukhu aphan ua, khusak in, akhut taklam in sialluang atawisak ua; ama ah akhukdin ua, “Chibai, Judate' Kumpipa,” chi in nuihza bawlna in anei uhi. 30Huan amah achilsiat ua, sialluang laksak in alu akhen uhi. 31Nuihza bawlna dia aneih khit un, puan asuahsak ua, ama puante asilhsak nawn ua, kilhden ding in apikheta uhi.
Jesu Kilhdenna
(Mar 15.21-32; Luk 23.26-43; Joh 19.17-27)
32Huan apaikhiak lai un, Kurini a mi, amin Simon amu ua; huai mi ama kros po ding in aman uhi. 33Golgotha mun ahong tun un, huai tuh Luguh mun chihna ahi, 34uain thuk, thil kha toh hel, dawn ding in apia ua, himahleh acheptak in adawn nuam kei hi. 35Akilhden khit un, ai san in apuansilh akihawm uhi. 36Huan huai ah tu in avengta uhi. 37Ahekna uh, “HIAI JUDATE' KUMPIPA JESU AHI,” chi a gelh, alutung ah asuang uhi. 38Amah toh, suamhat nih, ataklam ah khat leh aveilam ah khat akilhden uhi.
39Huan mi vialvak peuh in alu uh sinkhum in, 40“Nang tempul hihsia a ni thum a lam nawnpa, kihihdam in; Pathian Tapa na hihleh kros a kipan hong kumsuk tanla,” chi in a-enghou uhi.
41Huchi mah bang in siampu liante'n, laigelhmite toh, enghou in, 42“Midangte hondampa, amah-le-amah kihondam theiloupi in, Israelte kumpipa ahih ngalleh tu in kros a kipan hong kumleh a kei dia, huchi in amah i gingta mai ding. 43Pathian amuang na aka, amah zaw a-utleh tu in kihondamleh ake; Pathian Tapa ka hi, achi ngal a,” achi uhi.
44Suamhat akilhden un leng, huchi mah bang in a-enghou hi.
Jesu Sihna
(Mar 15.33-41; Luk 23.44-49; Joh 19.28-30)
45Huan dak gukna a kipan dak kuana tan in khua ahong mialvekta hi. 46Dak kuana ding in, aw ngaihtak in, “Eloi, Eloi, lama sabakthani?” chi in Jesu akikoukhia a, huai tuh, “Ka Pathian, ka Pathian bang achia hon paisan?” chihna ahi.
47Akiang a dingh khenkhatte'n huai azak un, “Hiai mi'n Elijah sam ahi,” achi uhi. 48Alak ua mi khat kintak in atai pah a, spanji ala a, uain thuk diahdim in chiang ah asuang a, adawnsak hi.
49Midangte'n, “Ngaihsak kei un, amah lakhe ding in Elijah ahong pai hiam i en ding uh,” achi uhi.
50Jesu ngaihtak in akikou nawn a, akha akhahta hi.
51Huan ngai dih, tempul puanzak atunglam a kipan anuailam tan in hong keksuakta a; ziin ahong ling a, suangpite khangkham in; hante ahong kihong hi. 52Mi Siangthou ihmusate pumpi tampi leng kaihthoh in a-omta uhi. 53Huaite athohnawn nung in, han a kipan hong pawt in kho siangthou ah alut ua, mi tampi lak ah akilakta uhi.
54Huan sepaih zaheutu leh akiang a Jesu veng a omte'n, zinling leh thil omdante amuh un alau mahmah ua, “Hiai mi zaw Pathian Tapa ahi ngeingei,” achi uhi.
55Huai ah, numei tampi, a-nna sepsak kawm zel a Galili gam a kipan a hon zuite a-om ua, gamlapi ah a-en uhi. 56Huaite lak ah Mari Magdalin, Jakob leh Joseph nu Mari leh Zebedai tapate' nute a-om uhi.
Jesu Vuina
(Mar 15.42-47; Luk 23.50-56; Joh 19.38-42)
57Huan nitaklam ahong hih in, Arimathai khua a mihausa, amin Joseph ahong pai a, amah leng Jesu nungzui ahi sam hi. 58Huai mi Pilat kiang ah ava hoh a, Jesu luang angen hi. Pilat in piak ding in thu apia hi. 59Huchi in Joseph in aluang ala a, puanmalngat siangtak in atuam hi. 60Ama hankhuk thak, suang khuakkuak ah asial a; suang lianpi in hankhuk kongkhak adelh a, apaita hi. 61Huan huai ah Mari Magdalin leh Mari dang a-om ua, hankhuk mazawn ah atu uhi.
Hankhuk Veng Ding A Thu Piakna
62Huan azing in, huai tuh, kisakkholhna zoh ni zing ahi a, Pilat kiang ah siampu liante leh Pharisaite a-omkhawm kheukhou uhi. 63“Pu, huai mikhemhat in adam lai in, ni thum nung in ka thounawn ding, achih ka theigige uhi. 64Huchi in ani thum ni tanpha hankhuk venghoih ding in thu pia in; huchi lou in zaw anungzuite'n amah ava gukhe ding ua, vantang kiang ah, misi lak a kipan athounawnta achi kha ding uh; huchi in khemna nanung zaw amasa sang in ahoih kei zaw sem ding,” achi uhi.
65Pilat in akiang uah, “Vengmi sepaihte na nei ve ua oi; pai unla, na hihtheih bang un venghoihsakta unla,” achi hi.
66Huchi in vengmi sepaihte toh ava hoh ua, hankhuk avenghoihsak ua, hansuang achiamteh uhi.
Currently Selected:
MATTHAI 27: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
