KOLOSATE 3
3
Gingtute Dinmun Leh Omdan
1Huchi in Khrist toh kaihthohkhawm a na om tak man un, tunglam a Pathian taklam a tu Khrist omna a thil omte zong un. 2Tunglam a thil omte ah na lungsim uh nga un; lei a thil omte a nga lou in. 3Na sita ua, tu in na hinna uh Pathian ah Khrist toh sel in a-om hi. 4Khrist i hinna uh ahong kilak chiang in nou leng amah kiang ah thupi in na kilak sam ding uhi.
That Un
5Huchi in noumau a lei lam thil deihna omte that un, kingaihna, nitna, hukna, utna gilou, huaihamna; huai milim biakna ahi. 6Huai thilte ziak in Pathian thangpaihna thumang lou tate tung ah atung nak ahi. 7Nou leng tuma lam a huai thilte a na khosak lai un, huaite ah na kalsuan uhi.
Koihmang Un
8Himahleh tu in nou leng hiai tengteng, hehna, thangpaihna, huatna, gensiatna, na kam ua pau zahmohte koihmang un. 9Mihing lui athilhih toh na suahkheta uh chih mu in, kuamah kizuausantuah kei un, 10mihing thak in na kivanta ngal ua; huai mihing thak asiampa batpih bang a theihna a siam thak in a-om lellel hi. 11Huai ah Grik mi leh Juda mi, zeksum leh sum louh, melmak mite, Skithia mite, sikhate, noplente leng a-om kei; Khrist bangkim hi zaw in, bangkim ah a-om behlap lai hi.
Kivan Un
12Huaiziak in Pathian mitel, misiangthou leh deihtakte bang in lainatna lungtang, migitna, kingaihniamna, thunuailutna, thuakzohna in kivan un. 13Kuapeuh in kua tung ah leng thubuai nei hi le uchin, kithuakzou chiat in, kingaidamtuah unla, Toupa'n ahon ngaihdam tak bang in kingaidamtuah chiat un. 14Huan huai tengteng tung ah itna silhthuah un; huai in thil bangkim kituaktak in agakkhawm hi. 15Huan Khrist khamuanna in na lungtang uah vai hawm hen, huai ding in pumpi khat a sap na hi ua, kipahna dan leng thei un. 16Khrist thu a hauhna teng toh noumau ah dimsak kiihkeih un, pilna chiteng a kisinsak leh kihilhtuah a om in, kipahna lungtang toh Pathian kiang a phatna late, Pathian late, khalam late sa in om un. 17Huan na hih peuhmah uh thugen ah leh thilhih ah amah ziak a Pa Pathian kiang a kipahthu gen kawm in Toupa Jesu min in hih vek un.
Khristian Inkuan Omdan Zite Leh Pasalte
18Zite aw, Toupa ah akilawm hun bang zel in na pasalte uh kiang ah kiniamkhiak un.
19Pasalte aw, na zite uh it unla, alak uah hanhat kei un.
Nu Leh Pate Leh Tate
20Naupangte aw, bangkim ah na nu uleh na pate uh thu mang un, huai tuh Toupa pahtak lam ahi.
21Pate aw, na tate uh hihnuak kei un, huchi lou in zaw alunglel kha ding uhi.
Sikhate Leh Pute
22Sikhate aw, sa a na heutute uh thu bangkim ah mang un, mihing hihkipak lelte bang a mitmei nasem hilou in, lungtang sa khat a Toupa kihta kawm in, 23na hih peuhmah uh, mihing a ding bang a hih lou in, Toupa a ding zaw in kilawptak in hih un; 24Toupa a kipan in a-itna gouluah ding na mu ding uh chih thei in, Toupa Khrist nasem na hi uhi. 25Thil diklou hihpa'n athil diklou hihman amu nawn ding hi; mi khentuamna a-om ngal kei hi.
Currently Selected:
KOLOSATE 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
