KOLOSATE 2
2
1Noumau leh Laodisia a omte leh sa a ka mel mu lou peuhmahte a ding in bangchibang a thupi in ahia noute a dia ka kisuk na theih uh ka ut hi. 2Pathian thuguk atheihtheih ua, theihsiamna theihchetna kim hauhna tengteng lam a, phankhawm a a-om ua, alungtangte uh lungmuang a a-omtheihna ding un; 3pilna leh theihna gou chiteng amah Khrist ah selguk in a-om hi.
4Kuamah in paukam siam a ahon khemzohlouhna ding un, huaite ka gen ahi. 5Sa in na kiang uah om kei mah leng, kipaktak a om in na kizendan uleh Khrist ginna a na kipdan uh thei in, kha in na kiang uah ka om hi.
Khrist A Hinna
6Huaiziak in Khrist Jesu, Toupa na kipahpih bang un, amah ah om un. 7Amah a zungkai leh lamtouh a om in, ahon zilsak bang un na ginna ua kiptak a om in, kipahthu genna hau in amah ah om un.
8Pilvang un, huchi lou in zaw kuapeuh in Khrist thu hilou, mihing thugousiah leh khovel thubulte bang in athupil uh leh khemna peuh in gallak in ahon la kha ding uhi. 9Amah ah Pathian taangchinna chiteng tuh pumpi nei in a-om gige hi. 10Amah ah hinna taangchinna na neita ngal ua; amah vaihawmna leh thuneihna tengteng lutang ahi.
11Amah ah zeksum, mihing khut a sum hilou, Khrist in abawl zeksumna ah na pianken khelhna uh suahkhia in zeksum na hita uhi. 12Baptisma a amah toh vui na hita ua, huai mah ah misi lak a kipan a Pathian nasep gintak ziak in amah toh kaihthoh na hi uhi. 13Huan noute na tatleknate uleh na sa uh zeksumlouhna a si na hi ua, noumau ngei amah toh ahon hingsak in na tatlekna tengteng uh angaidamta hi. 14I tatlekna tengteng hon ngaidam a, batna lai thupiak a gelh i tung ua om eimah hon dou gige anulmangta hi. Huai ngei kros a kilhlum in alamangta hi. 15Vaihawmna leh thuneihnate suankhia in, huaite kros a zou in alangtang in theihsakna in azangta hi.
16Huchi in nek-le-dawn thu ah hiam, ankuanglui leh kha thak thu ah leh Sabbath ni tan thu ah kuamah in hon dem kei hen. 17Huaite thil hong tung ding lim ahi a, atak zaw Khrist ahi. 18Kuamah in amau deih thu lel a thunuailutna leh angel biakna zang in, athil muhte uh pansan in, asalam lungsim ziak ua kisathei mawkmawk in, na kipahman uh hon suhsak kei hen. 19Lutang len tinten lou in a-om uhi. Amah a kipan in pumpi apum in aguhtuah leh thaguite a vak leh zopkhawm a om in, Pathian khansak bang zel in akhang hi.
Khovel Thubulte Sihsanna
20Khovel thubulte Khrist kiang a na sihsan uleh, bang achia khovel a khosa bang a thupiakte lak a na kipelut na hi ua? 21Lawng ke'n, chiam ke'n, khoih ke'n, chihte, 22mihingte thuchiam leh zilsakna huchibang thil tengteng zat kawm a mangthang ding hilou uhiam? 23Hiai thilte bawltawm biakna leh thunuailutna tak lou leh pumpi kisukgentheihna ah zaw hihtuak hileh akilawm na a, himahleh sa deihlam zuih khamna ah bangmah aphatuam kei hi.
Currently Selected:
KOLOSATE 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
