KOLOSATE 4
4
Heutute Leh Pathian
1Heutute aw, nou leng van ah heutupa na neih uh thei in, na sikhate uh tung ah adik atang leh akilawm hih un.
Kithuhilhnate
2Thum gige unla, kipahthu gen kawm in kiveng gige un. 3Khrist thuguk gen ding a Pathian in thu a dia kong a hon honsak theihna ding in kou leng hon thumsak un, huai thu ziak a hen a om ka hi. 4Ka gen ding bangtak a ka genkhiak theihna ding in.
5Hun na neih sung un atam theipen sem zel unla, polam mite lak ah piltak in om un. 6Michih bangchibang a dawn ding hiam chih na theihna ding un na paukam suak uh chisoh, hehpihna hi gige hen.
Chibai Bukna Nanungte
7Toupa a unau ngaihtak, nasempa muanhuai, sikha hihpih Taikikas in ka tanchin tengteng nou ahon theisak ding hi. 8Hiai ziak in, ka tanchin uh na theihna ding uleh, na lungtang uh ahon khamuan theihna ding in amah na kiang uah ka hon sawl hi; 9Onesimas, unau muanhuai leh ngaihtak noumau lak a mi mah toh ahong ding uhi. Amau hiai lam a thil omdan tengteng ahon theisak ding uhi.
10Aristarkhas, ka hentakpihpa'n nou chibai ahon buk hi. Barnabas tupa Marka in leng chibai ahon buk hi, amah tungtang thu ah thupiakte na mu uh; na kiang ua ahong paileh na kipahpih un; 11Jesu, Justas achih un chibai nou ahon buk hi. Huaite zeksummi ahi ua, huaite kia Pathian lalgam thu lam ah ka seppih leh ahon khamuante ahi uhi.
12Epaphras noumau lak a mi mah, Khrist Jesu sikha in noute chibai ahon buk hi, ama'n Pathian deihlam photphot a piching leh gingta tinten a na dintheihna ding un, athumna ah noute a ding in akisuk gige hi. 13Noumau a ding, Laodisia a omte a ding leh Hierapolis a omte a ding in phatuam angai mahmah chih ka theihpih hi. 14Luka, daktor ngaihtak leh Dema in chibai ahon buk uhi.
15Laodisia khua a unau omte leh Nimphas leh a-inn a saptuamte chibai hon buksak un. 16Huan hiai laikhak na lak ua na sim nung un, Laodisia saptuamte lak ah leng simsak un; nou leng Laodisia a pen na na sim sam ding uhi. 17Huan Arkippas kiang ah, “Nasepna Toupa a i muh pen tangtun ding in pilvang in,” na chi un.
18Kei Paul in keimah khut ngei a hiai chibai bukna ka hon gelh ahi. Ka kolbulhte theigige un.
Hehpihna na kiang uah om hen, Amen.
Currently Selected:
KOLOSATE 4: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
