1 PETER 2
2
1Huchi in gitlouhna tengteng, khemna tengteng, lepchiahna tengteng, hazatna tengteng, gensiatna tengteng tawpsan unla, 2naungek suak thakte bang in khalam nawitui, bangmah hel louh lunggulh un; huai a na khantheihna ding un: 3Toupa mihehpih theitak ahi chih na chep tak ngal uleh.
Suang Hing Leh Nam Siangthou
4Amah suang hing, mihingte deih louh, Pathian theih a bel tel leh manpha ahi. 5Amah kiang a hong pai in, noute ngei leng suang hingte bang in Jesu Khrist ziak a Pathian kipah lam kithoihna lan ding a siampu siangthou hi ding in khalam inn ah leptouh in na om uhi. 6Huaiziak in Laisiangthou ah:
“Ngai un, Zion ah aning a suang kiphamohpen tel a om leh manphatak ka lem hi;
amah gingtate azahlak kei ding uh,” chih atuang hi.
7Nou agingtate a ding in huai manphapi ahi,
agingtaloute a ding in bel;
“Inn lamte suang deih louhpen,
huai mah aning a suang phatuampen ahong hita hi.”
8Huan “Pukna suang leh
dalna suangpi ahi.
Thu kigente azuih louh ziak un akisuipuk ua;
huchibang ding a sehsa ahi him uhi.”
9Himahleh mial a kipan pawt a, vak lamdangtak a lut ding a nou hon sampa hoihna na muhsak theihna ding un, nou zaw chitel, kumpi siampu, nam siangthou, Pathian mite na hi uhi;
10Nidanglai in nam himhim na hi kei ua; tu in zaw
Pathian namte na hita uh;
nidanglai in zahngaihna na mu kei ua, tu in zaw zahngaihna na muta uhi.
Pathian Sikhate Thunuailutna
11Deihtakte aw, mikhual leh khualzin na hih ziak un kha dou nakpa taksa utnate tawpsan ding in nou ka hon ngen hi. 12Zentelte lak a na tatdan uh kilawmtak hi hen, huchi in thil hihkhial a, ahon gensiat chiang un leng na thil hoih hih amuhte uh ziak in veh a a-om chiang un Pathian apahtawi thei ding uhi.
13Toupa ziak in mihing dan bawl peuhmah ah lut un; thuneihna tawi kumpipa kiang ah hiam, 14thil hihkhialte tung a thuk ding leh thil hoih hihte phat ding a kumpipa'n aseh gam ukpate thunuai ah lut un. 15Hiai Pathian deihlam ahi, mihaite haina thil hoih hih in na hihdai thei ding uhi. 16Noplen na hi ua, himahleh na noplenna uh khelhna khuhna ding a zang lou in Pathian sikha a omna ding in zang zaw un. 17Mi tengteng zahtak un. Ki-unauna it un. Pathian laudan siam un. Kumpipa pahtawi un.
Sikhate'n Khrist Etton Ding
18Sikhate aw, mihoih leh minunnemte lak kia hilou in migiloute lak ah leng laudan siam in nou hon heute thuthu in om un. 19Mi'n Pathian theihna ziak in thuak louh ding thuak a lungkhamna athuak teiteileh huai pen Pathian pahtak lam ahi. 20Nou na thilhihkhelh ziak ua vuak na thuak un, kuhkaltak in thuak mah le uchin phatna bang na loh ua? Himahleh na thil hoih hih ziak ua na thuak ua, kuhkaltak a na thuak teitei ualeh, hiai pen Pathian kipah lam ahi. 21Khrist in leng nou ahon thuaksak ziak in, huai bang hih ding a sap na hi uhi; akhap a na zuihna ding un zuih ding ahon nutsiat ahi. 22“Ama'n thil ahihkhial kei a, akam ah khemna leng a-om sam kei.” 23Enghou a a-om lai in, a-enghou thuk kei a, athuak lai in avau kei hi; diktattak a ngaihtuahpa kiang ah akipe zaw hi. 24Khelhna lam a si khin, adiktatna lam a i hintheihna ding in amah mah in tua sing ah asa in i khelhnate apua hi; avuakna golhte ah hihdam in na omta uhi. 25Belam mang bang in na mang ua, tu'n zaw nou hon chingpa leh heutupa kiang ah na kik nawnta uhi.
Currently Selected:
1 PETER 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
