1 PETER 1
1
Chibai Bukna
1Peter, Jesu Khrist sawltak in, Pontus gam, Galatia gam, Kappadosia gam, Asia gam Bithinia leh gam tuamtuam a mikhual dalhzakte kiang ah; 2Pa Pathian theihkholh bang a Jesu Khrist thumanna leh sisan theh tang ding a Kha hihtuamna tungtawn a tel a omte kiang ah hehpihna leh khamuanna hihkhan in om hen.
Lametna Hing
3I Toupa Jesu Khrist leh Pa Pathian phat in om hen! Ama'n azahngaihna thupitak bang zel in, misi lak a kipan Jesu Khrist thohnawnna ziak in lametna hing mu ding in ahon piang thaksak nawn hi; 4goutan setheilou, nin baang lou, tul thei lou, van a nou a ding a sit muhna ding in; 5hotdamna, hun nanung a lang ding a zohsa mu ding in, ginna ziak in Pathian thilhihtheihna a ven na hi uhi.
6Tu in ze-etna chiteng ziak in hun sawt lou lungkham tadih mah le uchin, huai ah nakpitak in na kipak uhi. 7Na ginna uh ze-etna, dangka-eng mei a ze-et nung nangawn a mangthang zel sang a manphazaw, Jesu Khrist kilak chiang a phatna leh pahtawina leh thupina ding ahong hihtheihna ding in. 8Mu ngei lou napi in amah na it ua, tu in mu tadih kei mah le uchin, amah na gingta ua, kipahna gen vual louh leh thupina a dim in na kipak mahmah uhi. 9Na ginna un atup pen na kha uh hotdamna na mu uhi.
10Huai hotdamna thu zawlneite hehpihna na kiang ua hong tung ding thugenkholte'n akankan ua, siamneltak in azongkhia uhi. 11Khrist kha amau a om in Khrist thuakna ding leh thupina hon zui dingte atheihkholhsak lai in, bang hun a bangchi a hong tung ding ahia chih zonkhiak atum uhi. 12Huai thu in amau nasep kisep lou in, noumau nasep asem zaw uh chih akiang uah theihsak ahita, huai thute van a kipan a sawlkhiak Kha Siangthou panpih in tanchinhoih nou hon hilhte'n tu in ahon hilh ua, huai thilte angelte'n leng vel a-ut uhi.
Khristian Omdan Siangthou
13Huaiziak in na lungsim puan uh teng in pilvang unla, Jesu Khrist kilak chiang a hehpihna nou ahon puak ding lungke lou in lamen un. 14Ta thumangte bang in, na theih louh lai ua na nidanglai duhgawlna uh bang a om lou in; 15nou hon sampa asiangthou bang in nou leng na tatdan tengteng uah hong siangthou un; 16“Noute na siangthou ding uh ahi, kei ka siangthou ngal a,” chih gelh ahi.
17Huan khentuam nei lou a michih nasep bang chiat a vaihawmpa Pa bang a na loh uleh, hiai lai a na taam lai teng un laudan siam in om un. 18Na pipute uh piaksawn, na omdan uh bangmah hilou a kipan, thil se thei, dangka leh dangka-eng a tat na hi kei ua, 19belamnou gensiatbei leh nin baang lou sisan bang a, Khrist sisan pha a tat na hi zaw uh chih na thei uhi. 20Amah leilung pian ma in sehkholh in a-om ngeitak a, himahleh hun nanung ah noumau ziak in kilak in a-om hi. 21Amah ziak in misi lak a kipan kaithoupa leh athupina pepa Pathian gingtate na hi uh, na ginna uh leh na lametna uh Pathian a a-omtheihna ding in.
22Unaute it taktak ding a thutak zui a na kha uh na hihsiangthou tak ziak un lungtang a phatuamngaitak in ki-ittuah chiat un. 23Chi se thei lak ah hilou in, Pathian Thu hing gige leh om gige chi setheilou lak a piangthak na hi zaw uhi.
24“Mi tengteng loupa bang
ahi ua, athupina uh leng
loupa pak bang ahi.
Loupa avuai a,
apak apulh hi.
25Toupa bel tangtawn in
a-om gige hi,” chih ahi ngal a.
Hiai ahi tanchinhoih nou ahon hilh pen uh.
Currently Selected:
1 PETER 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
