1 PETER 3
3
Pasalte Leh Zite Zuih Ding
1Huchibang in, nou zite aw, noumau pasalte thuthu in om un, huchi in alak ua khenkhat in Pathian thu zui kei mah le uh na tatdan uh zoh in a-om ding uhi. 2Laudan siam kawm a na tatdan siangthou uh en in. 3Na kivatna uh polam kivatna samphek leh dangka-eng khi-oh hiam, puansilh a kivatte hilou in, 4lungtang a mihing thuguk lungsim thunuailut leh nunnem puansilh setheilou a kivat Pathian mitmuh in amanpha mahmah hi. 5Huchibang in tuma lam a numei siangthou Pathian gingtate'n leng amau pasalte thuthu a om in akivan uhi. 6Sarah in Abraham, toupa chi a athuthu a a-om bang in; thil hoih hih a, khemlauna himhim lau lou a na om uleh Sarah tate na hi ding uhi.
7Huchi mah bang in, nou pasalte aw, numei zaw bel kitambaihzaw ahih bang un leh hehpihna hinna tanpihte ahih bang un, theihsiamna toh pahtawidan siam kawm in theihna bang zel in na zite uh kem un, na thumna uh dal a a-omlouhna ding in.
Khristian Lungsim Putdan
8Atawp pen in, na vek un lungsim mun khat in om unla, kilainattuah unla, thunuailut in om un. 9Khelhna, khelhna in thuk kei unla, salhna, salhna a thuk sam lou in, vualzawl zaw un. Hiai vualzawlna tang ding a sap na hi uhi.
10“Hinna it a nihoihte muh ut in khelhna lak ah alei venghoih henla,
amuk leng khemna thu gen lou ding in venghoih hen.
11Gilou nungngatsan in thil hoih hih henla;
kituahna zong in delh zel hen.
12Midiktatte tung ah Toupa mit atu a,
abil in leng athumna lam uah adoh zel hi,
himahleh Toupa mel in thil hihkhialte adou nak,” chih gelh ahi.
Engbawlna A Khrist Etton Ding
13Thil hoih lam a phatuam na ngaih uleh na poikhoih ding uh kua a-om dia? 14Himahleh diktatna ziak a na thuakta bang na hih uleh, na hampha ding uhi. Akihtakhuaina uh kihta kei un. 15Himahleh na lungtang uah Toupa in Khrist bawl un; noumau a om, na lametpen uh hon dong peuhmah dawng ding in mansa gige in thunuailuttak leh laudan siam kawm in om un; 16sia-le-pha theihna siangtak nei un, huchi in nou ahon gensiatna lam uah, Khrist a na omdan hoih uh gen thanghuaite hih zahlak in a-om ding uhi. 17Thil gilou hih ziak a thuak sang in Pathian hoihsak lam ahihleh thil hoih hih ziak a thuak ahoihzaw hi. 18Pathian kiang a hon pitheihna ding in Khrist in leng khelhnate a ding in khatvei athuakta hi, midiktat in midiktatloute sik in athuak a; sa ah sihsak in a-om a, Kha ah hinsak in a-omta hi. 19Huai kha in suangkul a kha omte kiang ah thu ava tangkoupih hi. 20Huai mite'n nidanglai a Noah dam lai a long bawl sung teng a, Pathian thuakzohna in angak lai in thu amang kei ua; huai long ah mi tawmchik, mi giat lel tui a pan humbit in a-om uhi. 21Huan huai tui in Jesu Khrist thohnawnna ziak a hotdamna baptisma lim hon ensak a, huai tuh pumpi nitna siansakna dan hilou in, sia-le-pha theihna siansakna ziak a Pathian kiang naihna ahi zaw hi. 22Amah van a pai in Pathian taklam ah a-om a; angelte, thuneihnate, thilhihtheihnate amah thuthu a omsak in a-omta hi.
Currently Selected:
1 PETER 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
