JAKOB 5
5
Mihausa Nuaisiah Hatte Tan
1Mihausate aw, ngai dih uh, na tung ua gimthuakna hong tung ding ziak a kap in, mau tuaituai un. 2Na goute uh aseta a, na puante uh leikha in ne khinta hi. 3Na dangka-eng uleh na dangkate uh atui-ek khinta hi; huan atui-ek uh nou hon theihpihtu ahi ding ua, meikang bang in na taksa uh akangse zou ding hi. 4Ngai un, na lou ua buh at a kilohte loh amau khem a na piak louh uh akikou ua, buh atte mangbang kikou aw Sepaihte' Toupa bil ah alutta hi. 5Khovel ah nuamsatak leh noptaltak in na hing ua, na thah ni bang un na lungtang uh na taisak uhi. 6Midiktat, nou hon douloute siam louh tangsak in na that uhi.
Kuhkal Ding A Thuhilhna
7Huchi in unaute aw, Toupa hong pai mateng kuhkaltak in om un. Ngai un, louneimi in vuahtui ke masa leh nanung amuh mateng leigah hoihtak angak zel hi. 8Nou leng kuhkaltak in om un; na lungtang uh hihkip un; Toupa hong paina ding anaita hi.
9Unaute aw, siam louh tang a na omlouhna ding un, kiphunkhum kei un; ngai un, kongkhak bul ah vaihawmpa adingh hi. 10Unaute aw, Toupa min a thugenmi zawlneite thuakdan leh akuhkaldan uh zuih ding in nei un. 11Ngai un, athuak mite tuh nuamsa i chi uhi; Job kuhkaldan na zata ua, Toupa'n atawp a ahihdan leh Toupa hehpihna a adimdan leh azahngaih theihdan leng na mu uhi.
12Himahleh ka unaute aw, bang teng tung ah, kichiam kei un; van lou in hiam, lei lou in hiam, thil dang himhim lou in hiam kichiam kei un, hiamhleh “hi” na chih uh “hi” henla, “hilou” na chih uh “hilou” hi hen; huchi lou in zaw siam louh tang in na om kha ding uhi.
Thumna Thilhihtheihna
13Na lak uah thil hoih lou thuak a-om uhia? Thum uhen. Kipak a om uhia? Phatna la sa uhen. 14Na lak uah damlou a-om uhia? Saptuam Upa samsak uhenla, ama'n Toupa min a sathau nilh in atung ah thum hen. 15Huan ginna a thumna in damlou adam ding a, Toupa'n amah akaithou ding; thil ahihkhelh takleh ngaihdam ahi ding hi. 16Huchi in hihdam a na omtheihna ding un, na khelhnate uh thupha kitawituah unla, kithumsaktuah un. Midiktat thumna in thil thupitak ahih zel hi. 17Elijah leng eimah piandan bang pu mihing ahi a, vuah zuklouhna ding in phatuamngaitak in athum a, kum thum leh kha guk sung teng leitung ah vuah azu kei hi. 18Athum nawn a, van in vuah azusak a, lei in agahte ahon suah hi.
19Ka unaute aw, na lak ua mi kuapeuh thutak a kipan in pialmang henla kuahiam in pikik nawnleh, 20mikhial alamhaihna a kipan a kiheisakpa'n sihna a kipan akha ahondam ding a, khelhna tampi akhuhsak lai ding chih kithei hen.
Currently Selected:
JAKOB 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
