THUVARHAI 18
18
1Mi mâni insuktum chun, mâni nuom zâwng ngei chu a zawng a,
Varna indik po po a sêlkal hlak.
2Invêt chun hrietthiemnaa chun lâwmna a nei nawh a,
A lungrila ama le ama ân hmu suok theina chaua naw khan chu.
3Mi khawhlo chu a hung pha chun hmusitna khawm a hung veh a,
Tlâng ihrilsiet nina le chun kâwkna a hung bawk.
4Mihriem baua thuhai chu tui inthûkhai ang a na,
Varna tuihnâr chu vadungtê luonglai ang a nih.
5Mi khawhlo ditsak chu thil ṭha a ni nawh a,
Rorêlnaa mi fel hnâwlhmang chu a ṭha chuong bawk nawh.
6Mi invêt hmûrhai chun inhalna ân tlun a,
A bau chun vuoknahai a ko bawk.
7Mi invêt bau chu ama sietna a na,
A hmûrhai chu a lungril ta dinga châng a nih.
8Mi lâwtthiem thuhai chu bubâr tuihnâitak ang an na,
Phîng sûng hmun inthûktakhaiah an fe thla hlak.
9Ama sinthawa inthlada mi chu
Suksetu unaupa chu a nih.
10LALPA hming chu kulbîng dettak a na,
Mi fel chu chutaka chun a tlân lût a, a him hlak.
11Mi hausa hausakna chu a khawpui dettak a na,
Ama ngairuotnahaia ngei chun bang insâng ang a nih.
12Sietna hmaah mihriem lungril chu a uong hlak a,
Inzâkaina hmaa chun inngaitlâwmna a fe zie.
13A hriet hmaa dawnna petu chu,
A ta dingin inzakum le invêtna a nih.
14Mihriem lungril chun a hrât nawna chu chelngîr a ta,
Lungril kawise ruok chu tuin am tuor thei a ta?
15Mi var lungril chun hrietna a nei a,
Mi var na chun thiemna a zawng bawk.
16Mihriem thilthlâwnpêk chun ama ta dingin hmun a siempêk a,
Ama chu mi ropuihai hmaah a hung ṭhuoi hlak.
17Ama chungthu hril hmasatu chu indik âwmin ân lang a,
Nisienlakhawm, a tuolbâwm chu a hung a, a hung phawr lang hlak.
18Aisânna chun insêlnahai a sukbo a,
Mi hrâthai chu a sukṭhe bawk.
19Unaupa suklungawiloa um chu khawpui#Hebraiah a chieng nawh dettak nêkin hne ân tak lem,
Chuong inhalnahai chu kula thîrtluonhai ang a nih.
20Mihriem phîng chu a baua rasuok chun suksip nîng a ta,
A hmûrhaia hlawkna chun ama chu suklungawi ning a tih.
21Thina le hringna hi lei thilthawtheinaa um an na,
Achu hmangaitu chun chutaka inthawka ra chu fâng a tih.
22Tukhawm nuhmei hmutu chun thil ṭha a hmu a nih,
LALPA ditsakna khawm a chang a nih.
23Mi pasie chun ngênna thuhai a hmang hlak a,
Mi hausa ruok chun tlahawltakin a dawn hlak.
24Ruolhai tamtak siemtu chun ama sietna ding el a thaw a nih,
Amiruokchu, ruol unau nêka hnai lema kawp tlat chu a um a nih.
Currently Selected:
THUVARHAI 18: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
