THUVARHAI 16
16
Hringna le nungchang thua thuvarhai
1 #
Mt 10.19 Lungril siemrêlnahai chu mihriem ta a na,
Leia dawnna ruok chu LALPA kuoma inthawk a nih.#Pathienin ei thuhai a thuokkhum
2Mihriem lampuihai po po chu ama mithmuahai chun ân thieng a,
LALPA ruok chun lungrilhai chu ân khi hlak.
3I sinthawhai chu LALPA kuomah inkawltir la,
I ngaituohai chu sukdet nîng a tih.
4LALPA chun thil tinrêng hi san nei sengin a siem a,
Anih, mi khawhlo ngei khawm chu ni ṭha nawa dingin.
5Lungrila chapo taphawt chu LALPA ta dingin tirdakum a nih,
Ama chu hrem naw ni naw nih.
6Zângaina le thutak chun khawhlona chu sâwpfai a na,
LALPA ṭina leiin mihaiin suolna an zâmsan.
7Mi a um dânin LALPA a suklawm chun,
A hmêlmahai ngei khawm ama le inrem dingin a siem.
8Indiklona leia hlâwkna nasatakhai nêkin,
Felna leia tlâwmte chu a ṭha lem.
9Mihriem lungril chun a lampui chu a riruong hlak a,
A kalchawihai ruok chu LALPA chun a kâwkhmu hlak.
10Lal hmûrhaia chun vân tieng thusukthlûk chu a um a,
Rorêlnaah a bau chun bawse ngai naw nih.
11Inkhina le bûkna indikhai chu LALPA ta a na,
Ip riknahai po po khawm chu ama sinthaw a nih.
12Khawhlona thaw chu lalhai ta dingin tirdakum a nih,
Lalṭhungpha chu felnaa tungding a ni sih a.
13Hmûr felhai chu lalhai lâwm zâwng a na,
Thudik hriltu chun an ngaina hlak.
14Lal lunginsenna chu thina thangkohai an nih;
Mi var ruok chun sukdei a tih.
15 #
Job 29.23 Lal hmêl vara chun hringna a um a,
A ditsakna chu ruo nuhnung sûm ang a nih.
16Varna nei hi rângkachak nêka ieng ang khieua ṭha lem am a na!
Anih, hrietthiemna nei hi tangka nêka thlang lem ding a nih.
17Mi tluong lamtluongpui chu rîtlonaa inthawka fe hmang hi a na;
Mi a lampui vêng ṭhatu chun a lungril chu a vawng ṭha.
18Chapona hi sietna hmaah a fe hlak a;
Chun, lungril uong chu tlûkna hmaah.
19Mi chapohai le râllâk sum insem nêk chun,
Mi inngaitlâwmhai le lungril inhnuoitaka um a ṭha lem.
20Thu pawisatu chun thil ṭha hmûng a ta,
LALPA ringtu chu, ama chu a hlim a nih.
21Lungrila var chu mi var ti nîng a ta,
Hmûrhai thlumna chun thiemna chu a sukpung.
22Hrietthiemna hi a neitu ta ding chun hringna tuihnâr a na;
Invêthai inchûktirna ruok chu an invêtna a nih.
23Mi var lungril chun ama bau ân chûktir a;
A hmûrhaia chun thiemna a belsapêk hlak.
24Thu lâwmumhai chu khuoithlâr ang a na,
Lungril ta dingin a thlum a, ruhai ta dingin hrisêlna a nih.
25 #
Tv 14.12 Mihriem kuoma indik âwmtaka inlang lampui chu a um a,
Chu tâwpna ruok chu thina lampuihai a nih.
26Mi sininrim phîngṭâmna chun ama ta dingin sin a thawh a,
A bau chun ama chu a tirlui sih a.
27Mi hmangnabo chun pawitâwkna a rawtdawk a,
A hmûrhaia chun mei em kâng thei ang chu a um a nih.
28Mi dukindaklo chun inhalna a thedar a,
Mi lâwtthiem chun ṭhien bulhai a sukṭhe.
29Mi hrângsie chun a tuolbâwm chu a vethlêm a,
Lampui ṭhaloa chun ama a ṭhuoi hlak.
30Mithai insîmtu chun thil ṭha naw a remruot a,
Hmûr inchîp tlattu chun thil suol chu ân tlungtir hlak.
31Lu inṭuok chu ropuina lallukhum a na,
Mi fel lampuia chun hmu nîng a tih.
32Mi lunginsen intaktak chu mi thilthawtheitak nêkin a ṭha lem a,
A lungril thunun theitu chu khawpui latu nêkin a ṭha lem.
33Ai chu mal chunga sân a ni hlak a,
Thutlûkna ruok chu LALPA ta vawng a nih.
Currently Selected:
THUVARHAI 16: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
