THUVARHAI 13
13
1Naupa var chun a pa inchûktirna chu a ngai a,
Hmusittu ruok chun kâwkna chu a ngai nawh.
2Miin a bau rasuoka inthawkin thil ṭha chu fâng a ta,
Mi ringum naw lungril ruok chun hrângsietna fâng a tih.
3A bau vêng ṭhatu chun a hringna a kawl ṭha a,
A hmûrhai ka lientu ruok chun suksietna tuok a tih.
4Mi thabo lungril chun a châk hlaka chu, iengkhawm a nei nawh,
Mi taima lungril ruok chu sukthâu nîng a tih.
5Mi fel chun khêl hril a theida a,
Mi khawhlo ruok chun inzakna a siemin kâwkna a lâk lût hlak.
6Kawnglama mi tluong chu felnain ama a vêng a,
Khawhlona ruok chun mi suol chu a buon thlûk.
7Ama le ama insukhausa a, iengkhawm nei silo a um a,
Ama le ama insukpase a, hau- sakna nasatak nei a um bawk.
8Mihriem hringna intlanna chu a hausaknahai a nih,
Mi pasie ruok chun inṭhina chu a ngai nawh.
9Mi fel varna chu a hlim a,
Mi khawhlo khâwnvar ruok chu herhlum nîng a tih.
10Chaponaa chun inkhingna a suok a,
Thurâwn ṭhataka ruok chun varna a um.
11Teplo mei meia hausakna hmu chu kiem a ta,
Sininrima la khâwmtu chun a pung hmûng a tih.
12Beisei hlawsamna chun lungril a sukdam nawh a,
Châk zâwng hung tlung ruok chu hringna thing a nih.
13Tukhawm thu hmusittu chun ama chungah sietna ân tlun hlak a,
Thupêk ṭitu ruok chu lâwmman pêkin um a tih.
14Mi var inchûktirna chu hringna tuikhur a na,
Thina chânghaia inthawka fe kiengna leh.
15Hrietthiemna ṭha chun ditsakna a chang a,
Mi ringum naw lampui ruok chu a kherinkhâwng.
16Mi var tinhai chun hrietna leh sin an thawh a,
Mi invêt ruok chun invêtna chu a thedar.
17Thangko khawhlo chu thil suolah a tlu hlak a,
Aiawtu ringum ruok chu a hrisêl a nih.
18Tlâksamna le inzakna chu inchûktirna sêlkaltu kuoma chun um an ta,
Kâwkna pawisatu ruok chu chawimawi nîng a tih.
19Nuom zâwng sukfamkim hi lungrila chun a thlum a,
Amiruokchu, suolnaa inthawka fe kieng hi invêthai ta ding chun tirdakum a nih.
20Mi varhai intlawnpui la, nang khawm var i tih,
Mi invêthai inruolpui ruok chu suksiet nîng a tih.
21Thil ṭha naw chun mi suolhai chu a hnawt pei a,
Mi fel ruok chu thil ṭhaa thung nîng a tih.
22Mi ṭha chun a tuhai ta ding chenin rohluo ding a mâkpêk hlak a,
Mi suol hausakna chu mi fel ta dinga siekhâwl chau a nih.
23Mi pasie hnuoi inletnaa chun bu tamtak a um a,
Amiruokchu, remruot fel naw leia suksiet chutaka chun a um.
24A hmawl hlatu chun a naupa a theida a,
Ama hmangaitu ruok chun taimatakin a thunun hlak.
25Mi fel chun a lungrila a dittâwkin a fâk hlak a,
Mi khawhlo phîng ruok chu tlasam a tih.
Currently Selected:
THUVARHAI 13: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
