BIAPHUAN 9
9
1Cuticun vanmi panganâk nih a hun tum i van in arfi pakhat leiah a tlâk kha ka hmuh, A sinah taw a ngei lomi khor tawh kha an pêk. 2Cun taw a ngei lomi khor kha a on i khor chungin meikhu tampi sosernâk meikhu bantuk a hung chuak. Cuticun khor chungin mei khu ruangah ni le vanrâng khi muihter an si. 3Cuticun cu meikhu lakah lei cungah khaubawk an hung chuak. Tlâng ngaikuang nih mi fahternâk a ngeihmi bang khin ṭhawnnâk an pêk hna, 4Lei cung i ramhring hna le a hringmi vialte, thingkung vialte hna zong hrawk lo ding i nawlpêk an si, asinain an cal ah Pathian hmelchunhnâk a ngei lomi lawng kha harnâk pe dingin nawlpêk an si. 5Cun mi thahnâk nawl kha pêk an si lo, asinain thla nga chung harnâk pe dingin nawlngeihnâk pêk an si. Harnâk an pêkning cu tlâng ngaikuang nih mi a seh i fahnâk a pêkmi bantuk khi a si; 6Cu cân ah cun mi nih thihnâk an kawl lai i an hmu lai lo. Thih an duh ngai nain thihnâk nih a zâmtâk hna lai. 7Cu khaubawk hna muisam cu raltuknâk dingah rang an thomhmi bantuk khi an si. An lu ah sui bantuk luchin an chinh hna i an hmai cu minung hmai bantuk an si. 8An sam cu nu sam bantuk an si i an ha cu chiandeih ha bantuk an si. 9Cun an ṭangah thir ṭangphaw bantuk an ngei i an thlazah thawng cu rang le ranglêng tampi ral dohnâk i a tlimi thawng bantuk an si. 10Tlâng ngaikuang bantuk mei an ngei i an mei ah sivai a um. Thla nga chung minung fahnâk pe khotu hmual a si. 11Cun siangpahrang bantuk an ngei i cucu taw a ngei lomi khor vanmi a si, a min cu Hebru in Abaddon ti a si i Grik holh cun, Apollyon ti a si. 12Ngaihchiatnâk pakhatnâk cu a dih cang. Ngaihmanh hi thil hna hnuah ngaihchiatnâk phunhnih a phân rih. 13Cuticun vanmi paruknâk nih a hun tum i Pathian hmai i sui biakṭheng ki pali chungin aw ka theih. 14Vanmi paruknâk muko putu sinah “Zufareites rili i ṭemmi vanmi pali kha chuah hna” tiah a ti. 15Cuticun suimilam cân le ni le thla le kum ca i an rak timhlamhmi vanmi pali hna kha minung cheuthum cheukhat that dingin an chuahter hna. 16Cubangin rangcung i â citmi ralkap an tamning cu ting thonghnih an si tiah ka theih. 17Cun langhnâk ah rang kha hitihin ka hmuh hna; a cung i â citmi hna nih mei bang a senmi ṭangphaw le a nakmi a duk deuhmi le aihre bang i a engmi an i benh. Rang lu hna cu chiandeih lu bantuk an si i ankâ chungin mei le meikhu le kât an chuak. 18Cun zawtnâk phunthum ankâ in a chuakmi mei le meikhu le kât hna nih minung cheuthum cheukhat a thah hna. 19Zeitintiah thiltikhawhnâk an ngeihmi cu an kâ le an mei ah a um, anmei hna cu rul bantukin lu a ngei i cu nih cun mi kha fahnâk a pêk hna. 20Asinain cu zawtnâk nih a thah lomi minung hna nih an kut chuak milem sui milem ngun le dar le thing le lung in an sermi milem zeihmanh a hmu kho lomi, thawng a thei kho lomi, a kal kho lomi milem kha bia ti lo dingin an i ngaihchih hlei lo. 21Cun lainawn le doih, nupa sualnâk tuah le thil an fir tawnmi zong an i ngaihchih hlei lo.
Currently Selected:
BIAPHUAN 9: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
