BIAPHUAN 8
8
1Chinchiahmi pasarihnâk a hun phoih tikah, suimilam a cheu hrawng vancung cu a dai. 2Cun Pathian hmai i vanmi pasarih kha ka hmuh, an sinah muko pasarih an pêk hna. 3Cuticun vanmi dang, rimhmui khanghnâk suikhengkur put in a ra i biakṭheng pawngah a dir. Rimhmui khangh ding tampi kha an pêk, cucu bawithutdan hmai i sui biakṭheng cungah mithiang vialte thlacamnâk he a pêkchanh nâkhnga caah a si, 4Cun rimhmui khanghmi khu le mithiang hna thlacamnâk cu vanmi hna kut in Pathian hmaiah a kai. 5Cuticun vanmi nih rimhmui khanghnâk khengkur kha a lak i biakṭheng i meiin a khahter i vulei ah a thlâk. Cun khuari le nimtlau le lihnin thawng kha a hung um. 6Cutincun vanmi pasarih, muko pasarih â kenmi hna nih tum awkah timhcia in an um. 7Vanmi pakhatnâk nih a hun tum: Cun mei le rial nih a zulh i thisen he â cawhmi kha vulei ah a sur. Vulei cheuthum cheukhat kha a kâng dih, thingkung hna zong cheuthum cheukhat a kâng dih i ram hring vialte zong a kâng dih. 8Vanmi pahnihnâk nih a hun tum i a nganmi tlang bantukin a kâng hluahmahmi mei kha rili chungah an hlawnh i rili cheuthum cheukhat kha thisen ah â cang dih. 9Cun rili chung i nunnâk ngeimi cheuthum cheukhat kha an thi dih, tilawng hna zong cheuthum cheukhat hrawh an si. 10Vanmi pathumnâk nih a hun tum i a ngan ngaimi arfi, meifar bangin a alhmi hi van in a rung tla i tiva cheuthum cheukhat le tikhor ah an tla. 11Cu arfi min cu “Khâ” ti a si. Cuticun ti cheuthum cheukhat kha a khâ dih i ti cu a khât tuk caah mi tampi an thi, 12Vanmi palinâk nih a hun tum i ni le thlapa le arfi kha cheuthum cheukhat cio an mui. Chun ah cheuthum cheukhat cu a ceu ti lo. Cubantuk ṭhiamṭhiam in zan zongah a si. 13Cun ka hun zoh i mupi van i a zuangmi nih awthang ngaiin lei i a ummi hna caah ngaihchia a si, ngaihchia a si, ngaihchia a si, zeicatiah a tângmi vanmi pathum hna nih muko an tum`hân rih lai caah tiah, a ti kha ka theih.
Currently Selected:
BIAPHUAN 8: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
