BIAPHUAN 7
7
1Cu thil hna hnu ah vanmi pali lei killi i a dirmi ka hmuh i leicung le rili le thingkung ah thli a hran nâkhnga lo, lei i thli pali kha an tlaih. 2Cuticun vanmi dang Pathian nung chinchiahnâk â putmi chaklei in a rak chuakmi ka hmuh. Anih nih lei le rili hrawhnâk nawl an pêkmi vanmi pali hna sinah awthang ngai in, 3kan Pathian salle hna cu an cal i kan chihchiah hna hlanah cun lei le rili le thinghna cu hrawk rih hlah u, tiah a ti. 4Cun an chinchiahmi zat cu ka theih i Israel miphun kip chungin thong 144000 an chinhchiah hna. 5Judah miphun in 12000, Reuben miphun in 12000, Gad miphun in 12000, 6Aser miphun in12000, Naphtali miphun in 12000, Manaseh miphun in 12000, 7Simeon miphun in 12000, levi miphun in 12000, Isakar miphun in 12000, 8Zebulun miphun in thong 12000, Josef miphun in 12000, Benjamin miphun in 12000 an chinchiah hna. 9Cu thil hna hnu ah ka hun zoh i ngaihmanh mibupi ahohmanh i rel cawk lo, phunkip chung le hrinkip chung le, mikip chung le, holhphun kip chungin a rângmi angkifual in an i thuam, an kut in tûmhnah kha an i ken i bawiṭhutdanh hmai le Tuufano hmaiah an dir kha ka hmuh. 10Aw thang ngaiin, “Khamhnâk cu bawiṭhutdanh i a ṭhumi kan Pathian le Tuufano ta a si,” tiah an au. 11Vanmi vialte cu bawiṭhutdanh le upa hna le thilnung pali hna umnâk velchum ah an ṭhu i bawiṭhutdanh hmai ah bawhbu in Pathian kha an biak. 12“Amen! Thluachuahnâk, sunparnâk, fimnâk, lawmhnâk bia, upatnâk, thiltikhawhnâk le ṭhawnnâk kha zungzal in zungzal tiang kan Pathian sinah um ko seh. Amen.” tiah an ti. 13Cuticun upa hna lakah pakhat nih ka sinah, “Angki râng in â thuammi hna hi mizeidah an si? Khuazeiindah an rat? tiah a ka hal. 14Keinih a sinah, “Ka pu nangmah nih na hngalh” tiah ka ti. “Hi hna hi harnâk nganpi chungin a rakchuakmi an si, an angki kha an suk i Tuufano thisen in ran termi an si tiah a ka leh. 15Cucaah Pathian bawiṭhutdan hmaiah an um cang i chun zan hlan in a ṭempal ah a rian kha an ṭuan. Cun bawiṭhutdanh i a ṭhumi hrimhrim cu an sinah a um peng cang lai; 16Anrawl a ṭam ti lai lo i anti zong a hal ti lai lo, ni nih a linh ti hna lai lo i a sat ti hna lai lo; 17zeitintiah Tuufano bawiṭhutdan laifang i a ummi cu anmah kilvengtu a si lai i nunnâk tikhor ah a hruai hna lai. Anmit i mitthli vialte kha Pathian nih a hnawhpiak hna lai,” tiah a ti.
Currently Selected:
BIAPHUAN 7: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
