PHUNGTHLÛKBIA 16
16
1Thinlungin timhlamhnâk hi minung ṭuanvo a si i lei in lehnâk tu cu BAWIPA sinin a si. 2Minung nunning vialte hi amah hmuhnâk ahcun a thiang ko, asinain BAWIPA nih thlarau kha cuai ah a thlai tawn. 3Narian cu BAWIPA cungah chia law na ruahmi hna kha fehter an si lai. 4BAWIPA nih zeizong vialte hi amah caah a ser hna, asi, misuaksual hna hmanh hi chiat ton ni caah sermi an si. 5Lungthin in a ruam a kaimi cu BAWIPA caah fihnung an si, lungkhat in um hmanh hna sehlaw, dântat lo in an um lai lo. 6Vêl le Biatak in palhsualnâk caah tlanhnâk ser a si i BAWIPA a ṭihzahnâk in minih sualnâk a kaltak tawn. 7BAWIPA lomhnâk i mi a nun tikah, a ral he hmanh a remter hna. 8Diklo ngai i tampi ngeihnâk cha cun, dinnâk in tlawmte hmuh a ṭha deuh. 9Minung lungthin nih a lam a ruat tawn, asinain BAWIPA nih a kephau cu a hruai tawn. 10Siangpahrang hmurkâ ah Pathian bia phuan awk a um tawn, a hmurkâ in biaceihnâk cu a palhter awk a si lo. 11A dikmi cuaithlainâk le a dikmi tahnâk hi BAWIPA ta a si, zalrihnâk vialte zong a kut rianṭuanmi an si. 12Suahsualnâk in tuahmi hi siangpahrang caah fihnung a si, zeitintiah bawiṭhutdan cu dinnâk in fehter a si. 13Dinnâk hmurkâ cu siangpahrang caah lomhnâk a si i biadik a chimtu cu a dawt tawn hna. 14Siangpahrang thinhunnâk cu thihnâk zualko bantuk a si, asinain mifim nih a daihter lai. 15Siangpahrang mithmai ceu ah nunnâk a um, a duhpiaknâk cu ruah hmadung phortu khuadawm bantuk a si. 16Sui nâkin fimnâk ngeih cu zeitluk in dah a ṭhat deuh! asi, ngun nâkin theihthiamnâk cu i thim deuh awk a si. 17Midik hna lamthluan cu sualnâk kaltâk hi a si, ṭha tein alam a kilvengmi cu a nunnâk a kilven a si. 18Ruamkainâk hi rawhnâk lamhruaitu a si i lungpuamnâk thlarau cu tluknâk hmai ah. 19Ruamkaimi hna sin i hranchaw i phawt nâkcha cun, tangdormi hna sin i niamter i um a ṭha deuh. 20Ralring tein bia a ngaitu hna nih thilṭha an hmuh lai, cun BAWIPA â bochanmi cu mithluachuak an si. 21Lungthin in a fimmi cu khuaruatmi tiah ti an si lai i hmurka thlum nih thiamnâk a karhter. 22Theithiamnâk hi a ngeitu caah nunnâk tikhor a si i mihrut caah nunzia remhnâk hi hruhnâk a si. 23Mifim lungthin nih a hmurkâ a cawnpiak tawn i a hmurkâ in thiamnâk a chapchih tawn. 24Biadawh cu khuaithlar bantuk a si, nunnâk caah a thlum i ruh caah ngandamnâk a si. 25Miruahnâk ah lamdik sidawh ngai a si nain a donghnâk tu thihnâk a simi lam a um. 26Rianṭuantu cu amah caah rianṭuantu a si, zeitintiah a rawlṭamnâk hmurkâ nih a fialmi a si. 27Pathian a ṭizah lomi nih Ṭhatlonâk khor a cawh tawn i a hmurkâ cu meialh bantuk a si. 28Mi ngerhngawi nih sikṭhiatnâk a chuahter tawn i biathi chim a hmangmi nih hawikawmṭha zong a ṭhen tawn hna. 29Zângen-hmangmi nih innpa a soilem hna i lam ṭha lo ah a hruai tawn hna. 30A mit â chinh i â ngerhngawi mi lawng a ruat, a kam â sehmi nih Ṭhatlonâk kong kha a chuah pi. 31Dinnâk lamah hmuh a si ahcun, sampar cu sunparnâk bawiluchin a si. 32Miṭhawng nâkin mi lungsau an ṭha deuh, a nunnâk a uk khotu cu khualipi latu nâk in a ṭha deuh. 33Pheicungah camcawhfung an zuh tawn, asinain biakhiahnâk vialte cu BAWIPA ta a si.
Currently Selected:
PHUNGTHLÛKBIA 16: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
