PHUNGTHLÛKBIA 17
17
1I sikṭhiat bu i rawldanghnâk inn nâkin, daite umnâk i rawlthing ei a ṭha deuh. 2A fimmi sinum nih mualphonâk a phortu fapa cungah nawl a ngei lai, cun unau roco tu hna lakah co awk a ngei ve lai. 3Ngun cu an zet i, sui cu titter a si tawn, asinain lungthin cu BAWIPA nih a hneksak tawn. 4Ṭhatlonâk tuahtu hna nih lihchimmi bia lawng kha an ngaih tawn; lihchim a hmangmi nih ziarngeimi bia lawnglawng ngaih an duh. 5Misifâk nihsawhtu nih a sertu a zomhtaih a si; van chiatnâk an ton lio i â lawmmi zong. 6Tu le fa hna hi tar hna bawiluchin an si, ngakchia hna sunparnâk cu anpa le an si. 7Bia ṭha chim le mihrut an i tlâk lo i lihchimnâk hmur le bawi an i tlâk lo chinchin. 8A cotu caah thilpêk hi lung mantam bantuk a si, a hoihnâk lei pauh ah a hlawh tling tawn. 9Nawlbuarnâk a khuhpiaktu nih dawtnâk a kawl, asinain chimcia mi a nawlh lengmangtu nih hawikawm ṭha zong a ṭhen tawn hna. 10Mihrut voi zakhat vuaknâk in mifim voikhat chimhrin hmanh san a tlai deuh. 11Misual nih ralthawhnâk lawng a kawl, cucaah a nun a chia ngaimi zualko he an i tong te lai. 12Mihrut hruhlio ton nâk cha cun afa an lâk piakmi vompi he i ton hmanh thim deuh ding a si. 13Ṭhatnâk sualnâk i a lehrultu cu, thil ṭhalo nih a chungkhar a chuahtâk lai lo. 14Sikṭhiatnâk hi tizem chungin ti a zutmi bantuk a si, cucaah buaibuainâk a chuah hlan ah elhnialnâk kha donghter. 15Misual thiam coter i midik thiamlo coter hi BAWIPA caah fih a nunning â khat. 16Fimduhnâk lungput a ngei lomi mihrut kut ah, zeiruangahdah fimnâk cawknâk ding chawva cu a um lai? 17Hawikawm nih zeitik cân zongah a dawt, unau tu cu vansan ni caah a chuakmi a si. 18Theihthiamnâk ngei lomi nih kut tlaih in bia ai kam i a hawi le caah mawhphurtu ah â canter tawn. 19Nawlbuarnâk a dawtu nih sikṭhiatnâk zong a dawt, a inn kulhnâk kutkâ santertu nih rawhralnâk a kawl a si. 20Hlennâk lungthin a ngeitu nih thilṭha a hmu lai lo, lei ngerhngawi a ngeimi cu sualah a tlu tawn. 21Mihrut hringtu nih amah ngaihchiatnâk phorhtu a si, fapa hrut ngeitu nih lomhnâk a ngei lo. 22Lungthin i lomh hi a ṭha ngaimi sî bantuk a si, asinain lungthin kehkuainâk nih a ruh a ro ter. 23Misuaksual nih diknâk lam kha kawihmerh awkah hnulei in ziknawh a lak tawn. 24Fimnâk cu theithiamnâk ngeitu hmai ah a um, asinain mihrut mit nih vanhram deng a zoh tawn. 25Fapa hrut cu apa ngaihchiattertu a si i a hringtu nu ca zongah a khâ tak takmi a si. 26Miding dântat cu a ṭha lo i milian hna zong an ṭhatbu in tuk len awk a si lo. 27Hngalhnâk a ngeimi nih a bia chimah â sum tawn, theithiamnâk ngeitu cu daihnâk thlarau ngeitu a si. 28Mihrut zong hi daite i a um ahcun mifim ah ruah a si, an hmur an cip `hup ahcun, hngalhnâk ngeimi ah ruah an si.
Currently Selected:
PHUNGTHLÛKBIA 17: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
