PHUNGTHLÛKBIA 15
15
1Lehnâk nêm nih thinhunnâk a daihter, asinain biahrang nih thinhunnâk a thawhter. 2Mifim lei nih hngalhnâk kha dikngai in a hman tawn, asinain mihrut nih a hmurkâ in hruhnâk kha a chuahter tawn. 3BAWIPA mit cu hmunkip ah â chawk i thil ṭha le thilṭha lo kha a zoh tawn. 4A ngan a dammi lei cu nunnâk thingkung a si i ilhkhiahnâk nih thlarau a khuai tawn. 5Mihrut nih apa cawnpiaknâk zei ah a rel lo, asinain palhmi-remhnâk cohlangtu cu khuaruatmi an si. 6Miding innah chawva tampi a um i misuaksual hmuhmi cu buaibainâk a si. 7Mifim hmur nih hngalhnâk a karhter tawn, asinain mihrut lungthin nih cubantuk cu a tuah bal lo. 8Misuaksual raithawinâk cu BAWIPA caah fihnung a si i midik thlacamnâk cu â lawmhnâk a si. 9Misuaksual nunning hi BAWIPA caah fihnung a si i dinnâk a zultu hna cu a dawt hna. 10Lamdik a pialtâktu cu fak piin chimhhrin a si i remhnâk a huatu cu an thi ko lai. 11Hell le Rawhralnâk cu BAWIPA hmaiah a si i minung fale hna lungthin cu zeitlukindah a si chin chin lai! 12Zomhtaih hmangmi nih remhnâk a duh tawn lo, mifim zong a panh duh lo. 13Lungthin nomhnâk nih mithmai ṭha a chuahter, asinain lungretheihnâk cu thlarau kehkuainâk a si. 14Theithiamnâk lungthin a ngeimi nih hngalhnâk a kawl tawn, asinain mihrut nih hruhbia in â cawm tawn. 15Harnâk tuartu caah ni vialte hi a chia dih, asinain lungthin â nuam mi nih rawldanghnâk a tuah zungzal a si ko. 16BAWIPA ṭihzahnâk he tlawmte ngeih cu, tampi ngeih bu i buaibai nâkin a ṭha deuh. 17Dawtnâk he anhring so ei cu, huatnâk hmun i cenhmi cawpa sa ei nâkin a ṭha deuh. 18Mithinchia nih sikṭhiatnâk a chuahter, asinain mi lung sau nih boruak a sang ding zong a daihter tawn. 19Thathu mi hna lam cu hlingbur bantuk a si i midik hna lam cu lamthlurpi a si. 20Fapa fimnih apa a lomhter i a hrutmi nih a nu a zomhtaih tawn. 21Fimnâk a ngei lomi nih hruhnâk hi an lawmhnâk a si i theihthiamnâk a ngeimi hna ding tein an kal tawn. 22Remruatnâk a um lo ahcun, timhlamhnâk a hlawh tling kho lo. Asinain remruattu tamnâk ah hlawhtlinnâk a um. 23Hmurkâ in bialehnâk nih lawmhnâk a chuahter i a cân te ah chimmi bia hi zeitlukindah a ṭhat! 24Mifim caah nunnâk lam cu cunglei ah a kai, cucu tanglei i hell lam in â mer khawhnâk a si. 25BAWIPA nih porhlawmi hna inn cu a ṭheh lai i nuhmei hna ramri cu a humhâk piak hna lai. 26Misuaksual hna ruahnâk cu BAWIPA caah fihnung a si i lungthiangmi hna bia cu theih a nuam. 27Hakkaumi nih amah chungkhar tiangin a buaiter tawn, asinain ziknawh a huatu cu a nung lai. 28Miding lungthin nih lehnâk ding a cawnhmasa tawn, asinain misuaksual hmurkâ nih thilṭhalo a chuahter tawn. 29BAWIPA cu misuaksual sinin a hla, asinain miding thlacamnak cu a theih tawn. 30Lawmhnâk mithmai nih lungthin a nomhter i thawngpang ṭha cu ruh caah ngandamnâk a si. 31Nun chimhnâk cohlangtu cu mifim hna sinah a um peng lai. 32Cawnpiaknâk zeirel lotu cu amah nunnâk zeirel lotu a si, asinain siknâk biapi ah a ruatmi nih theihthiamnâk a hmuh. 33BAWIPA ṭihzahnâk cu fimnâk cawnpiaktu a si i upatnâk a um hlanah toidornâk a um tawn.
Currently Selected:
PHUNGTHLÛKBIA 15: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
