PHUNGTHLÛKBIA 14
14
1Nu fim nih a inn a sak i a hrutmi nih anmah kut in an ṭheh tawn. 2Ding tein a nungmi nih BAWIPA a ṭih, asinain mi ngerhngawi nih Amah cu an zomhtaih tawn. 3Mihrut hmurkâ ah ruamkainâk fung a um, asinain mifim hmurkâ chuak nih a himter hna. 4Cawpa umlonâk ah, a rawlpêknâk zong a thiang, asinain tampi karhluaimainâk cu cawpa thazâng ah a um. 5Zumhtlâk hngalhpitu cu lih a chim lai lo, asinain hngalhpitu deu nih lih a ṭawn tawn. 6Zomhtaih hmangmi nih fimnâk kawl hmanhseh a hmu lai lo, asinain a theithiamtu caah hngalhnâk cu fawite a si. 7Amah sin in hngalhnâk hmurkâ na hmuh lo tik ah, mihrut cu kaltâk ko. 8Mah sining hngalh hi ruahthiamnâk ngeimi fimnâk a si, asinain mihrut hna hruhnâk cu hlennâk a si. 9Mihrut nih sualnâk an nih sawh, asinain midik hna sinah duhpiaknâk a um. 10Lungthin fahnâk hi lungthin lila nih a hngalh, cun midang nih cun lomhnâk zong a hrawmpi taktak lo. 11Misuaksual innchungkhar cu a rawk te lai, asinain midik puaninn cu a ziam lai lo. 12Mi ruahnâk ah lam dik sidawh ngai a si nain, a donghnâk tu thihnâk lam a simi a um. 13Nih lio zongah lungthin ngaih a chia kho, cun nihnâk donghnâk hi ngaihchiatnâk a si kho ko. 14Lungthin in hnulei a kirmi cu amah duhning in a khat lai, asinain miṭha cu cubantuk cungah a um ruangah â lawm lai. 15Mi sawsawh nih chimmi pauh a zumh, asinain ralringmi nih a kephaunâk kha ṭha tein a ruah. 16Mifim nih a ṭih i sual a kaltak tawn, asinain mihrut cu amah le a mah i zum in a ral â ṭhatter tawn. 17Mi thintawi cu hrutngai in a cawlcang tawn, asinain misuaksual tinhmi cu huatnâk a si. 18Mi sawsawh comi ro cu hruknâk a si, asinain khuaruatmi cu hngalhnâk chinhter a si. 19Miṭha lo cu miṭha hmaiah an kun lai i misuaksual cu miding innka hramah a kun lai. 20Misifak cu a innpa zong nih an huat i mirum nih hawikawm tampi a ngei. 21A innpa a zomhtaihtu cu misual a si, asinain misifak zângfahtu cu lunglawmmi an si. 22Thilṭha lo a ruattu hna cu an kalsual a si lo maw? asinain vêl le biatak cu ṭhatnâk a ruattu hna ta a si. 23Ṭuannâk vialte ah hlawknâk a um i kâ in chim sawsawh cu chamhbaunâk men a si. 24Mifim hna bawiluchin cu an rumnâk a si i mihruthna hruhnâk cu an hruhmi hi a si. 25A dikmi biahngaltu nih nunnâk a khamh tawn, asinain hlenhmang hngalhpitu nih lih a chim tawn. 26BAWIPA ṭihzahnâk ah ralṭha in thazâng an ngei i a fale nih hmunhim an co lai. 27BAWIPA ṭihzah cu nunnâk tikhor a si i thihnâk rap in i mernâk a si. 28Mibupi tamnâk ah siangpahrang upatnâk a um, asinain mitlawmte lawng umnâk uktu hna cu rawhralnâk a si. 29A thin a hung zau lomi nih theihthiamnâk a ngei i mi lungrang cu hruh cawisawnnâk a si. 30Lungthin dam hi pum caah nunnâk a si i hnahchuahnâk cu ruh rawhtertu a si. 31Misifâk lamhchihtu cu anmah sertu zomhtaihtu a si, asinain sertu a upat tu nih michambau zângfahnâk a ngei. 32Misuaksual cu a suahsualnâk lila nih a ṭhawl, asinain miding cu a thihnâk ah himnâk hmun a ngei. 33Theithiamnâk a ngeimi hna lungthin ah fimnâk â dîn, asinain mihrut lungchung i a ummi cu langhter a si cang. 34Dinnâk nih miphun a cawisan, asinain sualnâk cu mikip caah minchiatnâk a si. 35A fimmi umpi cu siangpahrang nih a duhpiak tawn, asinain ningzahnâk phâktertu cungah a thin a hung tawn.
Currently Selected:
PHUNGTHLÛKBIA 14: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
