FILIPI 4
4
1Cucaah ka dawtmi le ka ngaihtuk hrinhranmi unau, kâ lawmhnâk le ka bawi luchin hna, dawtmi hna, cubantukin Bawipa ah fek tein dir u. 2Bawipa ah ruahnâk pakhat ngeiin Evodia le Sintikhe kan nawl hna. 3Cun nang ka ṭuanpi hawi taktak kan nawl ko, kha nu hna, thawngṭha i ka ṭuanpi mi hna kha bawm hna. Klemen he, ka ṭuanpi hawi, Nunnâk cauk i min an ṭialmi hna he khan. 4Bawipa ah i lawm zungzal u, ka nolh ṭhân lai, i lawm u! 5Lungnemmi nan sinâk kha mi vialte hmuhah siseh, Bawipa cu a nai ko. 6Zeithilhmanhah lungrethei in um hlah u, zeizong vialte ah thlacam le hal in, lawmhnâk bia chimchih pengin, nan duhnâk hna cu Pathian sinah hngalhter u, 7cun Pathian daihnâk, theihthiamnâk vialte a lonhtu nih khan nan lungthin le nan ruahnâk kha Krih Jesuh ah a kilven lai. 8A donghnâk ah unau hna, a dikmi, hmaizah awk a tlâkmi, a thiangmi, duh a nungmi, a thangṭhami, ṭhatnâk a um i thangṭhat awktlâk a si ahcun, cucu ruat hna u. 9Nan cawnmi, nan pommi, nan theihmi le keimah i nan hmuhmi zong kha, khabantuk kha tuah u, cuticun daihnâk Pathian nih an umpi hna lai. 10Ka zawn nan ruahnâk nai te ah nan tharchuah ṭhân caah kâ lawm taktak. Cubantuk cu nan timh peng ko nain cân rem nan hmuh lo bia a si. 11Ka chamhbaunâk kong lawng ka chim lo, kei cu zeitipauh in um hmanh ninglaw lungtlin ka thiam cang. 12Niamte i um ka thiam i rum zong ka thiam. Khuazei pauh ah, zeizong vialte ah pawkhim le rawlṭâm i um le rum le chamhbau i umning biathli cu ka hngalh cang. 13A ka ṭhawntertu Krih ah zeizong vialte ka tuah khawh. 14Zei a si zongah, ka vansânnâk nan i hrawm ve caah nan ti ṭha ngaingai. 15Nannih Filipi mi hna, thawngṭha a phanh ka i Masidonia ram in ka chuah ah khan nanmah dah ti lo cu, kawhhran dang pakhat hmanh nih thilpêk le hmuh kongah anka bawm lo ti kha nan hngalh. 16Zeitintiah Thesalonika khua i ka um lio ah, ka chamhbaunâk tlinter awkah voikhat lawng hmanh si loin voihnih tiang nan rak kuat. 17Thilpêk ka kawl lo, nanmah ah theitlai kha karh hna seh ti kha ka kawlmi a si. 18A ngaingai tiah zeizong vialte tam ngaiin ka ngei, zeihmanh ka bau lo, Epafarodistas kutah nan rak kuatmi thil kha ka hmuh hna, cucu a rim a hmuimi, cohlan awktlak raithawinâk le Pathian lomhtertu ṭha an si. 19Ka Pathian nih Krih Jesuh i a sunglawi ngaimi a rumnâk chungin nan herhmi vialte an pêk hna lai. 20Cubangin kan Pathian le kan Pa sinah sunparnâk cu zungzal in zungzal tiang um ko seh. Amen. 21Krih Jesuh ah mithiang vialte kha an kut ka tlaih piak hna u. Ka sinah a ummi unau hna nih nan kut an in tlaih hna. 22Mithiang vialte nih nan kut an in tlaih, a hlei in Sizar chungkhar hna nih an in tlaih hna. 23Kan Bawipa Jesuh Krih zângfahnâk cu nan dihlak cungah um ko seh. Amen.
Currently Selected:
FILIPI 4: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
