FILIPI 3
3
1A donghnâk ah ka ule nau hna, Bawipa ah i lawm u. Zeitintiah ṭial cangmi bia ṭial ṭhân hi ka neng lo i nan caah kilvengtu a si. 2Uico hna lakah i ral ring u, Ṭhatlonâk a tuahtu hna lakah i ralring u law, cuarpartan a uartu hna lak zongah i ral ring u. 3Zeitintiah kannih Thlarau in Pathian a bia i thisa i bochan loin Krih Jesuh ah â lawmmi hna hi cuarpar tanmi kan si deuh, 4a ngaingai tiah keizong thisa kongah bochan awk ka ngei ve. Thisa cungah bochan ding ka ngei a timi an um ahcun, ka ngei chin chin, 5niriat niah cuarpartan, Israel hrinthlâk, Benjamin tefa, Hebru le Hebru hrinmi ka si, nawlbia ah Farasih ka si. 6zuamnâk lei ah kawhhran serhsattu ka si, nawlbia i dinnâk ah dotla ka si. 7Asinain ka ca i miaknâk a simi hna cu Krih ruangah sunghnâk ah ka ruah dih. 8Asi taktak ko, a liannganmi ka Bawipa Jesuh Krih hngalhnâk ruangah thil vialte hi sungh cikcek ah ka ruah dih, asi zeizong vialte hi ka sung cikcek ko. Krih kha ka miakmi a si khawh ahcun thildang vialte cu hmunthûr ah ka rel hna. 9Amah i ummi ka si khawh nâkhnga, nawlbia zulh ruang i dinnâk si loin, Krih zumhnâk thawngin dinnâk, zumhnâk thawngin Pathian sinin dinnâk cu ka ngeihmi a si. 10A thihnâk ah thiin, a tuarnâk kâ hrawm ve ahcun, a thawhṭhannâk ṭhawnnâk zong ka co ve ko lai. 11Cuticun zeilei pauh in thih nâkin thawhṭhannâk cu ka co khawh ve lai. 12Tlâm ka tling cang ka ti lo i co awk ka co dihcang zong ka ti lo. Asinain Krih nih aka tlaihchan hi ka tlai kho ve hnga maw tiin a dawiin ka dawi. 13Unau hna ka tlaih dih cang tiah ka ruat lo, asinain thil pakhat ka tuah tawn - hnulei i a ummi thil hna kha philh in, hmailei i a ummi thil kha banh in, 14Krih Jesuh ah Pathian nih cung leiin a ka kawh chan ṭuanman hmu dingin kawltung lei cu ka panh. 15Cucaah kannih puitling deuh nih cubantuk lungput cu ngei u sih, cun zei lei pauhah ruahnâk dang nan ngeih ahcun Pathian nih an hngalhter hna ko lai. 16Zeiasihmanhah kan phanhnâk riin, kan kal ning tein, ruahnâk pakhat ngeiin hmai nawr u sih. 17Unau hna ka umtuning hi rak i zohchunh u. Zohchunhding nankan ngei, kan nun ningin a nungmi hna kha i zohchunh hna u. 18Zeitintiah mi tampi an kal i Krih vailam ralchanhtu an si tiah kan chimh cang hna kha, atu zongah ṭah buin kan chimh ṭhân hna. 19cuhna donghnâk cu rawhralnâk a si, an pathian cu an paw a si, vawlei thil lawng lawng an ruah caah an sunparnâk zong mualphonâk a si. 20Zeitintiah kannih cu vancung rammi kan si, van in a ra dingmi, khamhtu Jesuh Krih cu hngahhlang ngaiin kan cuan ko. 21Zeizong vialte Amah nawl i a umter khotu rianṭuannâk bangin a niam ngaimi kan pum hi a sunglawimi Amah pum bantukah a thlen te lai.
Currently Selected:
FILIPI 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
