KOLOSE 1
1
1Paul, Pathian duh ningin Jesuh Krih lamkaltu le kan unau pa Timote nih, 2Kolose khua i Krih-ah mithiang le zumhtlâk unau hna sinah: Pathian kan Pa le Bawipa Jesuh Krih sinin zângfahnâk le daihnâk nan sinah um ko seh. 3Krih Jesuh ah nan zumhnâk le mithiang vialte nan dawtnâk kan theih tikah; 4Pathian le kan Bawipa Jesuh Krih Pa sinah lomhnâk bia chimin nan caah thla kan cam tawn. 5Zeicatiah vanah nan ca i chiahmi ruahchannâk ruangah a si, cucu thawngṭha biatak kong nan rak theih cangmi kha a si, 6cucu vawlei vialte ah a phân i theitlai a chuah bantukin nan sin zongah a rak phân, Pathian zângfahnâk biatak nan ngaih i nan hngalh hnuah nanmah lak zongah theitlai a chuah cuahmah lio a si; 7Epafaras, kan dawtmi kan sal hawi, nanmah ai awh i Krih rianṭuantu zumhtlâk sin zongin nan rak theih cang, 8amah nih Thlarau i nan dawtnâk kong zong a kan chimh. 9Hiruangah kannih zong nih thlarau lei fimnâk le theihthiamnâk vialte nan ngeih i Amah duhning i hngalhnâk in nan khah khawh nâkhnga, nan kong kan theih ni in nan ca thlacam le nawlpiak kan ngol lo; 10Bawipa lawmhter awktlâk in tling tein nan nun i thilṭha phunkip tuahnâk ah theitlai chuah in Pathian hngalhnâk i nan ṭhân khawh nâkhnga, 11lungsaunâk le inkhawhnâk le lomhnâk in nan um khawh nâkhnga a liannganmi a ṭhawnnâk nih thazâng pein an ṭhawnter hna lai, 12cuticun ceunâk chungah mithiang hna co hngami ro hrawm awktlâk i a kan cantertu Pa sinah lawmhnâk bia kan chim. 13Amah nih khuamui nawlngeihnâk chungin a kan chuahter i a dawtmi Fapa pennâk chungah a kan luhpi; 14A thisen thawngin Amah ah tlanhnâk le sual ngaihthiamnâk kan co. 15Amah cu hmuh khawh lomi Pathian muisam sermi thil vialte ah hrin-hmasa bik a si; 16Zeitintiah thil vialte, van i a ummi siseh, lei i a ummi siseh, hmuh khawhmi siseh, hmuh khawh lomi siseh, bawi ṭhutdan siseh, pennâk le nawlngeihnâk vialte hna hi Amah in ser an si. Zeizong vialte hi Amah thawng le Amah caah sermi an si; 17Amah cu zeizong vialte hlanah a um cang, cun zeizong vialte hi Amah ah an i fu dih. 18Amah cu taksa pum kawhhran lu, a hramthawknâk a si, zeizong vialte ah cungnungbik a si khawh nâkhnga thihnâk in a tho hmasa bik a si; 19Zeitintiah Amah ah tlamtlinnâk vialte umter hi Pa lawmhnâk a si; 20cun van i a ummi le lei i a ummi vialte zong Amah he remterṭhân kha a duh caah a vailam thisen in daihnâk kha a rak ser; 21Cun nannih sualnâk nan tuah ruang i lungput ah a ral nan si i Amah he ṭhen nan rak si, asinain atu cu Amah he remter`hânmi nan si; 22Ahmai ah thiang te le dotla le sawiawk um loin an umter khawh hna nâkhnga a thihnâk thisa le pum ah- 23vanrang tang sermi vialte sinah chimmi thawngṭha nan theihmi ah hninh khawh loin hram nan bunh i ruahchannâk le zumhnâk i nan um taktak ahcun, keimah Paul zong cu rianṭuantu ah ser ka si. 24Nanmah ca ah ka teminnâk ah atu zongah kâ lawm, Krih nih a pum, a kawhhran ca i a teminnâk ah a baumi hna cu ka taksa i ka teminnâk ah tlinter a si chin leng mang ko; 25Pathian bia tlinter dingin, Pathian nih nanca i ṭuanvo aka pêk bantukin kawhhran rianṭuantu ka si; 26cu hlan i chan vialte sinah thuh a rak simi biathli cu atu ah a mithiang hna sinah phuan a si; 27Gentel mi hna lakah hi a sung lawimi le a rummi biathli hi Pathian nih an sinah langhter a duhmi cu a si, cucu nan chungah a ummi Krih, nan i ruahchanmi sunparnâk kha a si; 28Kan chimmi cu Amah hi a si, mikip hi Krih Jesuh ah tlinter an si ti hi fimnâk vialte he cawnpiak in mi kip ralrin kan pêk hna. 29Cu rian ṭuan dingah, a liannganmi a ṭhawnnâk nih keimah i a ṭuan ningin biatak tein ka ṭuan tawn.
Currently Selected:
KOLOSE 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
